1 Áádóó índa éí nááháasdzo yę́ę baa hodoolzhish: Hótaał, O doo ołchíinii, tʼáadoo ashíníłchíinii, haʼdíʼaahgo; dóó yéego hadílgháásh, awééʼ tʼáadoo ńdiiʼnééhii; háálá íiyisíí ndaʼiichííh góneʼ doo ałchíihii baʼáłchíní éí asdzání ayéehii biláahgo ląʼí áłchíní dooleeł, ní Diyin Bóhólníihii.

2 Niníbaal siʼą́ągi hótsaago áhólééh, dóó bíniʼ biiʼ dabighanii bináheezbaalii deidíłtsʼǫǫd; łaʼ tʼáá biʼoh óhłéʼé lágo, niníbaal bitłʼóól nineezgo ádanileʼ dóó bá anídaalkałígíí daniłdzilgo adaniłkaał;

3 Háálá nishtłʼajígo dóó nishʼnáájígo chʼídoohjah, dóó naʼáłchíní éí Gentile dineʼé daabíhę́ę ńdeididoolééł dóó kin hadaalʼá doo yiiʼ dabaghanii yiiʼ ńdahidooʼnééł.

4 Tʼáadoo náníldzidí, háálá doo ádaa yádiníizįįł da; doo ndóʼ niʼ kónihidiʼdoolníił da, háálá baa yáhásinii doo biiʼ ndooháał da; háálá ániid nanináhą́ądą́ą́ʼ baa yáhasinii biiʼ tádííníyáhą́ą éí bee yidiyíínah, dóó baa yáhasinii biiʼ nisíníyáhą́ą doo béénílniiʼ da dooleeł, dóó naa áhásdįįdyę́ędą́ą́ʼ bá yá nínízinée doo béénílniiʼ da dooleeł.

5 Háálá ániilaaígíí, nahastiin, Diyin Tʼáá Ałtsoní bee Bóhólníihii wolyé; dóó niNináʼnídláii, Israel biDiyin Ayóóʼátʼéii—nahasdzáán tʼáá dasiʼą́ą́ ńtʼę́ę́ʼ biDiyin God biʼdiʼníi doo.

6 Háálá Diyin Bóhólníihii nihichʼįʼ ádííniid asdzání nahjįʼ kóbiʼdiilyaaí dóó yínííł naagháii nilínéedą́ą́ʼ, dóó hweʼesdzáán ániid naagháhę́ędą́ą́ʼ, dooda niʼdooʼniidyę́ędą́ą́ʼʼ, ní nihiDiyin God.

7 Háálá tʼóó kónízáhájįʼ éí yóó anihidiiʼą́, ndi ayóó átʼéego nihaa jiinishbaʼgo áłah ánánihideeshdlííł.

8 Tʼóó kónízáhijįʼ shá háchįʼgo nitsʼą́ąjįʼ shiniiʼ kwíínísin ńtʼę́ę́ʼ, ndi hoolʼáágóó joobaʼii bee naa jiinishbaʼ dooleeł, ní Diyin Bóhólníihii, nihiNináʼnídláii.

9 Háálá díí, éí Noah naagháhą́ądą́ą́ʼ tó yíląądgo, háálá íídą́ą́ʼ éí háadida doo nahasdzáán tó bił náádidoolkǫ́ǫł da dííniid, kótʼéego háadida éí doo nihichʼįʼ shá nááhodoochįįł da.

10 Háálá dził éí ádadoodįįł dóó dah daaskʼidę́ę éí nahjįʼ kódadoolnííł, ndi sheʼajoobaʼii éí doo nahjįʼ kódoolníił da, doo ndi sheʼakʼéhwiinidzin bee nihił ahadaʼdinishtʼánée doo nahjįʼ kódoolníił da, Diyin Bóhólníihii nihaa joobaʼígíí ání.

11 O nichʼįʼ nahwiisnáaʼii, níyoltsoh nanihiisxanii, dóó tʼáadoo nihíká eelwodii! Áko shooh, nitseʼ ałʼąą átʼéego ndaashchʼąąʼii ndeeshnił, dóó tséghádiʼnídíín dootłʼizhii daʼílíinii ayaadi aheedeeshtłʼį́į́ł.

12 Áádóó tséghádiʼnídínii daʼílį́ dalchiiʼii éí nitsésǫʼ ádeeshłííł, dóó tséghádiʼnídínii daʼílíinii éí dáńdítį́hí ádeeshłííł, dóó ndaneelʼą́ąjįʼ éí tsé danizhóní ałtaasʼéí bee ahéénínil dooleeł.

13 Áádóó naʼáłchíní eí tʼáá ałtso Diyin Bóhólníihii ndabinitin dooleeł; dóó naʼáłchíní éí ayóó átʼéego kʼé danilį́į dooleeł.

14 Tsʼídá diyingo yáʼátʼéehii tʼéiyá bee hanídidoolnííł; achʼįʼ nahwiiʼná éí tsʼídá nitsʼą́ą́ʼ nízaadi tʼéiyá hólǫ́ǫ doo háálá doo éiyá náníldzid da dooleeł, dóó bádahadzidii da háálá éí doo nihitʼahjįʼ dadikááh da dooleeł.

15 Áko shooh, tʼáá aaníí nihikʼijįʼ danilį́įgo ahíidookah, doo éí shí áshtʼį́į da dooleeł; háíshį́į́ nihikʼijįʼ danilíinii ahíidookahígíí éí chʼééh ádaazhdootʼį́į́ł nihiyáʼátʼéehii biniinaa.

16 Áko shooh, shí atsidii kǫʼ biyiʼ tsííd deisołígíí íishłaa, dóó biyiʼdę́ę́ʼ bee naʼanishí yee naalnish dooleełígíí hayíʼą́; dóó bee naʼatseedii bee atídoolníiłgo íishłaa.

17 Bee ndaʼabaahii niniiyé ályaaii éí doo náás kódooníił da; dóó tsʼídá tʼáá ałtso ałʼąą dineʼé nihikʼijįʼ ándahwiiʼaahii yóó ádadoolnííł. Díí éí Diyin Bóhólníihii yá ndaalnishii biyáʼátʼéehii tʼáá ałkʼidą́ą́ʼ bidineʼé baa heesyáii átʼé, dóó biyáʼátʼéehii éí shí shitsʼą́ą́dę́ę́ʼ, ní Diyin Bóhólníihii.