1 Áádóó áko baa hoolzhiizh Jesus yáʼąąshgóde dah ńdiidzáago, diné áłah jílínée ałtso táoskai, diné tʼááłáʼí nízinígo beʼesdzáán dóó baʼáłchíní bighangóó yił anáheeskai.

2 Áádóó tʼáadoo hiłiijį́į́ʼgóó, tʼáadoo hodíinaʼí haneʼ diné bitahgo dideesdláád, diné áłah jílínée Jesus dayiiłtsą́, dóó ndabineestą́ąʼgo, dóó yiską́ągo diné áłah náánádlééhgo yaa náánádáhígíí.

3 Aooʼ, tłʼééʼ bíighah Jesus baa dahojilneʼ; dóó áko índa diné tʼóó ahayóí bitahgóó, aooʼ, tsʼídá tʼóó ahayóí, tłʼééʼ bíighah ndaalnish, áko yiską́ągo Jesus náánádááhdi dahoniidlǫ́ǫ doo danízingo.

4 Áádóó baa hoolzhiizh biiskání, diné áłah náánásdlį́įʼgo, áko shooh, Nephi dóó bikʼis, Timothy daaztsą́ ńtʼéeʼgo néidiisáhą́ą, dóó ałdóʼ Nephi biyeʼ, Jonas wolyéhígíí, dóó ałdóʼ Mathoni dóó bikʼis, Mathonihah, dóó Kumen, dóó Kumenonhi, dóó Jeremiah, dóó Shemnon, dóó Jonas, dóó Zedekiah, dóó Isaiah—kʼad díí éí Jesus naakitsʼáadahí akééʼ naazíinii náyiizláʼą́ą dabízhiʼ—Áádóó baa hoolzhiizh nagháijįʼ diné áłah jílínée yitahdóó naazį́.

5 Áádóó áko shooh, áłah jílínée tsʼídá tʼóó ahayóí áłah daazlį́įʼgo bąą naakitsʼáadahí diné naakitsʼáadahgo ałtsʼádeiznil.

6 Áádóó naakitsʼáadahí éí diné áłah jílínée ndeidíníitą́ą́ʼ; áádóó áko shooh, áłah jílínée niʼjįʼ ntsidadoohgeeh, dóó Jesus bízhiʼ binahjįʼ Diyin aZhéʼé nilíinii bichʼįʼ sodadołzin deidííniid.

7 Áádóó akééʼ naazíinii Jesus bízhiʼ binahjįʼ Diyin aZhéʼé nilíinii yichʼįʼ sodadilzin. Áádóó baa hoolzhiizh deizįʼ dóó diné nináádeidíníitą́ą́ʼ.

8 Áádóó Jesus yínaʼneestą́ʼą́ą tsʼídá kótʼéego yínadaʼneestą́ą́ʼ—tsʼídá tʼáadoo łahgo átʼéhé Jesus yínaʼneestą́ʼą́ą yíndaʼniłtin—áko shooh, ntsináádadeesgoʼ dóó Jesus bízhiʼ binahjįʼ Diyin aZhéʼé nilíinii yichʼįʼ sonáádadoolzin.

9 Áádóó tsʼídá aláahgo deinízinígíí éí yíká sodadoolzin; dóó éí díí Iiʼ Sizį́ Diyinii nihaa doolyééł danízin.

10 Áádóó ákótʼéego ałtso sodadoolzingo ńléí tábąąhgóó yíkai, dóó áłah jílínée bikééʼ yíkai.

11 Áádóó baa hoolzhiizh Nephi taah yíyá dóó tó bee biʼdoolzį́į́ʼ.

12 Áádóó táyiʼdóó hááyá dóó tó yee iʼniisį́į́ʼ. Áádóó hastóí Jesus náyiizláʼą́ą tʼáá átʼé tó yee yiyíísį́į́ʼ.

13 Áádóó baa hoolzhiizh tʼáá ałtso tó bee daalzį́įʼgo táyiʼdę́ę́ʼ hanáhaaskaigo, Iiʼ Sizį́ Diyinii bikʼidahooleʼ, dóó tʼáá ałtso Iiʼ Sizį́ Diyinii biiʼ hadadéébįįd dóó tʼáá ałtso kǫʼ biiʼ hadadéébįįd.

14 Áádóó áko shooh, kǫʼ bináztʼiʼ nahalin silį́į́ʼ; dóó éí yáʼąąshdę́ę́ʼ adaaldoh, áłah dajílínée dahóónááł, dóó baa dahojoolneʼ; dóó yáʼąąshdę́ę́ʼ Diyin yá ndaalʼaʼí adaakai dóó ndahoneeztą́ą́ʼ.

15 Áádóó baa hoolzhiizh tʼahdii Diyin yá ndaalʼaʼí akééʼ naazíinii diyinkʼehgo yíkáʼanáʼdaajahgo, áko shooh, Jesus níyá dóó yitahdóó yiizįʼ dóó diyinkʼehgo yíkáʼaalwod.

16 Áádóó baa hoolzhiizh áłah nilínée yichʼįʼ haadzííʼ, niʼjįʼ ntsináádadoohgeeh, dóó bikééʼ naazínée ałdóʼ ntsidadoohgeeh yidííniid.

17 Áádóó baa hoolzhiizh niʼjįʼ ałtso nitsidadeesgoʼgo, bikééʼ naazíinii sodadołzin yidííniid.

18 Áádóó áko shooh, sodadiʼniilzin; dóó Jesus, nihiDiyin Bóhólníihii dóó nihiDiyin God deiłníigo, yichʼįʼ sodadoolzin.

19 Áádóó baa hoolzhiizh Jesus akééʼ naazíinii binííʼdóó dah diiyá, dóó tʼáá áyídíjįʼ niníyá dóó niʼjįʼ ntsidinígoʼ, dóó ání:

20 Diyin ShiZhéʼé nilíinii, ahéheeʼ díí náhiséláʼígíí Iiʼ Sizį́ Diyinii bee bikʼidasínídliʼígíí; dóó díí éí nihokááʼ dineʼé bitahdóó náhálááʼ dashoodlánígíí biniinaa.

21 Diyin ShiZhéʼé nilíinii, díí bíká sodiszin tʼáá ałtso díí bizaad dayoosdląądígíí Iiʼ Sizį́ Diyinii shá bee bikʼidaazhdíídliił.

22 Diyin ShiZhéʼé nilíinii, Iiʼ Sizį́ Diyinii bee baa deisíníbaʼ dashoodlánígíí biniinaa; dóó níníłʼį́įʼgo éí dashoodlą́ dóó yísíníłtsą́ąʼgo, dóó shichʼįʼ sodadilzin; dóó shichʼįʼ sodadilzin bitah honishłónígíí biniinaa.

23 Áádóó áko Diyin ShiZhéʼé nilíinii, bá nichʼįʼ sodiszin, dóó tʼáá ałtso bizaad deidoodląąłígíí ałdóʼ, áko dashiidoodląął, áko biiʼ honishłǫ́ǫ doo, nígi átʼáo, Diyin ShiZhéʼé nilíinii, shiiʼ honílónígiʼ átʼéego, áko tʼááłáʼí daniidlį́į doo.

24 Áádóó baa hoolzhiizh Jesus ákótʼéego Diyin aZhéʼé nilíinii yichʼįʼ sodoolzingo, bikééʼ naazíinii yaanádzá, áádóó áko shooh, éí ńtʼę́ę́ʼ tʼahdii, doo niʼ ádaanééhgóó, bichʼįʼ sodadilzin; dóó doo éí tʼóó ałkʼińdeidiyiltʼéeh da, háálá bíká sohodidoozįįłígíí éí bił ííshją́ą́ ályaa, dóó deinízingo yíká sodadilzin.

25 Áádóó baa hoolzhiizh bichʼįʼ sodadilzingo Jesus yikʼijisdliʼ; dóó yaa bił hóózhǫǫd, dóó biniiʼ bitsʼádiʼńdínée éí yikʼiʼdiiłdláád; áádóó áko shooh tʼáá átʼé Jesus biniiʼjįʼ dóó biʼééʼ ałdóʼ łigaigi átʼéego daalgai daazlį́į́ʼ; áádóó áko shooh díí łigaigi átʼáo éí tʼáadoo beełtʼéhé da, aooʼ, niʼ bikááʼgóó doo kótʼéego łigai da.

26 Áádóó Jesus kóyidííniid: Tʼáá sodadołzin; dóó tʼáadoo sodizin niʼ ádayiilaa da.

27 Áádóó nááná hatsʼą́ądóó, tʼáá áyídíjįʼ nínáánádzá dóó niʼjįʼ ntsináádinígoʼ; dóó Diyin aZhéʼé nilíinii yichʼįʼ sonáádoolzin, kóníigo:

28 Diyin ShiZhéʼé nilíinii, ahéheeʼ díí náháláʼígíí doo bąąh chinígóó ádeinilaa, beʼoodląʼígíí biniinaa, dóó bá sodiszin, dóó bizaad binahjįʼ daʼiidoodląąłígíí ałdóʼ, éídóʼ shinahjįʼ doo bąąh dachiní da dooleeł, bizaad dayoosdląądígíí binahjįʼ, bí shinahjįʼ doo bąąh dachinígóó ádabiʼdiilyaaígi átʼáo.

29 Diyin ShiZhéʼé nilíinii, nihokááʼ dineʼé éí doo tʼáá átʼé bá sodiszin da, ndi tʼáá hazhóʼó nihokááʼ dineʼé beʼoodląʼ biniinaa, shaa dííníʼánígíí tʼéiyá, áko éí shinahjįʼ doo bąąh chinígóó ádadoolnííł, áko biiʼ dahonishłǫ́ǫ doo nígi átʼéego, Diyin ShiZhéʼé nilíinii, shiiʼ honílónígiʼ átʼáo, áko tʼááłáʼí niidlį́į doo, áko binahjįʼ biyiʼ hadideeshtʼeeł.

30 Áádóó Jesus díí saad yee haadzíiʼgo dóó akééʼ naazínée yaa nínáánádzá; áádóó áko shooh bichʼįʼ, tsʼídá yéego sodadilzin, doo niʼ ádaanééhgóó; dóó yaa bił nááhóózhǫǫd; áádóó áko shooh tsʼídá daalgai daazlį́į́ʼ, Jesus átʼéhígi átʼéego.

31 Áádóó baa hoolzhiizh nagháí nízahjįʼ nínáánádzá dóó Diyin aZhéʼé nilíinii yichʼįʼ sonáádilzin;

32 Áádóó saad yee sodoolzinígíí diné eii éigi átʼéego doo łaʼ yee hadoodzih da, doo ndi díí saad yee sodoolzinígíí diné nááyidíyóozohgo ałdóʼ doo yíighah da.

33 Áádóó diné áłah jílínée deidiiztsʼą́ą́ʼ dóó yaa dahalneʼ; dóó bijéí ąą ádáádzaa dóó bijéí biyiʼjįʼ yikʼidaʼdiitą́ saad yee sodilzinée.

34 Ákótʼée ndi, ayóó ábóodziil dóó ayóó ánoolningo saad yee sodilzin áko nááhídóodzohgo éí doo bíighah da, dóó ałdóʼ diné da yee hadoodzihígíí doo bíighah da.

35 Áádóó baa hoolzhiizh Jesus ałtso sodoolzingo bikééʼ naazínée yaa nínáánádzá, dóó yichʼįʼ haadzííʼ: Kótʼéego oodlánígíí éí Jew dineʼé bitahdi tʼáadoo łaʼ yiiłtsą́ą da; ákohgo kótʼéego álílee naʼanishígíí éí tʼáadoo hanááł áshłaa da, doo daʼjoodlánígíí biniinaa.

36 Tʼáá aaníigo Nihichʼįʼ haasdziih, tsʼídá tʼááłáʼí ndi díí ayóó átʼéego naʼanish danółʼínígíí łaʼ yiyiiłtsą́ą da; dóó ałdóʼ díí ayóó átʼéii dasidootsʼą́ʼígíí tʼáadoo deidiiztsʼą́ąʼ da.