1 Áádóó baa hoolzhiizh Jesus díí ałtso nanitin yaa náhasneʼgo áłah jílínée hatah ahééníghal, dóó áháłní: Áko shooh, díí tʼáhdoo nihiTaaʼ nilíinii bichʼįʼ dah ńdiishdáahgóó naʼnítin bee naʼnétąʼąą dasidoohtsʼą́ą́ʼ, éí bąą, tʼáá háiida díí shinaʼnitin yénálniih dóó yikʼeh hółʼínígíí, éí akéeʼdi ayííłką́ągo hiináago ándeeshdlííł.

2 Áádóó baa hoolzhiizh Jesus díí ałtso saad yee haadzíiʼgo, dineʼé łaʼ Moses bibee hazʼáanii shąʼ haadoonííł yaa ááh danízingo yaa ákoniizį́į́ʼ; háálá ałkʼidą́ą́ʼ ádaátʼéhę́ę éí ałtso bohoolyaa, dóó tʼáá ałtsoní ániidí daazlį́į́ʼ haʼnínígíí tʼáadoo yikʼidaʼdiitąą da.

3 Áádóó kóyidííniid: Ałkʼidą́ą́ʼ ádaátʼéhę́ę ałtso bił ahóóyá, dóó tʼáá ałtsoní ániidí daazlį́į́ʼ, dishnínígíí tʼáadoo haitʼáo da baa ááh danohsiní.

4 Áko shooh, nihichʼįʼ haasdziih Moses bee hazʼáanii beilyáhą́ą éí ałtso bohoolyaa.

5 Áko shooh, shí éí bee hazʼáanii ninílá, dóó shí éí shidineʼé Israel bił ahaʼdinishtʼánée áshtʼį́; éí bąą, bee hazʼáanii yę́ę shí shinahjįʼ ałtso bohoolyaa, háálá shí éí bee hazʼáanii bohodoolnííł biniyé níyá; éí bąą éí kojįʼ ninítʼiʼ.

6 Áko shooh, Diyin yá yádaałtiʼí haneʼ ádayiilaa yę́ę éí doo deeshchxǫǫł da, háálá ląʼída tʼáadoo shinahjįʼ bohoolyaayę́ę, tʼáá aaníigo Nihichʼįʼ haasdziih, éí tʼáá ałtso bohodoolnííł.

7 Áádóó ałkʼidą́ą́ʼígíí ałtso bił ayííłką nihidishnínígíí, éí náasjįʼ ádahodoonííł daanínée doo yíłchxǫʼ da.

8 Háálá áko shooh, shidineʼé bił ahaʼdinishtʼánée éí tʼáhdoo ałtso bohoolnéeh da; ndi bee hazʼáanii Moses beilyáhąą éí shinahjįʼ ałtso bohoolyaa.

9 Áko shooh, shí éí bee hazʼáanii, dóó adinídíín nishłį́. Shichʼįʼ dadínóhʼį́į́ʼ, dóó nihá ndahwiistʼą́ bijį́įjįʼ yéego ádaahtʼį́, dóó dahinohnáa doo; áko, háíshį́į́ bá nihootʼą́ bijį́įjįʼ yéego átʼíinii éí hoolʼáágóó iiná baa deeshłééł.

10 Áko shooh, bee hazʼáanii nihaanílá; éí bąą shibee hazʼáanii bikʼeh dahonołʼį́. Áádóó díí éí bee hazʼáanii dóó Diyin yá yádaałtiʼii bizaad ádaatʼé, háálá éí tʼááʼaaníí shaa ndahasneʼ.

11 Áádóó baa hoolzhiizh Jesus díí saad yee haadzíiʼgo, hastóí naakitsʼáadah náyiizláʼąą éí kótʼéego yichʼįʼ haadzííʼ:

12 Nihí shikééʼ nisoozį́; dóó nihí díí Joseph bighandóó dineʼé danilínígíí, bibee adinídíín danohłį́.

13 Áádóó áko shooh, díí éí kéyah nihí; dóó nihiTaaʼ nilíinii éí nihaidiníʼą.

14 Áádóó hádą́ą́ʼda éí doo nihiTaaʼ nilíinii díí kéyah nihikʼisóó Jerusalemdi kéédahatʼíinii bił hodíílnih shidííniid da.

15 Áádóó ałdóʼ hádą́ą́ʼdiidah éí nihiTaaʼ nilíinii náánáłaʼ Israel bighan dooígíí ałʼąą dóoneʼé danilínígíí bee bił chʼídííʼááł tʼáadoo shidííniid da, éí nihiTaaʼ nilíinii kéyahdééʼ chʼíyizheezh.

16 Díí kóníłtsoígo nihiTaaʼ nilíinii, bee bił hodíílnih shidííniid:

17 Áko łaʼ dibé shee nááhódlǫ́ éí éiyá doo kǫ́ǫ́ atah da; éídóʼ áádę́ę́ʼ deeshʼish, dóó shinééʼ deididootsʼį́į́ł; dóó tʼááłáʼíjįʼ dibé hólǫ́ǫ dooleeł, dóó tʼááłáʼí dibé yá sizíi dooleeł.

18 Áádóó áko, bikʼos daniłdzil dóó doo daʼoodląągóó biniinaa shizaad tʼáadoo yikʼidaʼdiitąą da; Éí bąą nihiTaaʼ nilíinii áshidííniid díí baa haneʼígíí tʼáá ákódígo bee bił hodíílnih shidííniid.

19 Ákondi, tʼááʼaaníigo, ánihidishní díí nihiTaaʼ nilíinii bee bił hodíílnih shiłnínígíí, dóó bee nihił hashneʼ, nihí bitsʼánihiʼdeeʼnil bąąhá yaa naakaigo biniinaa; Éí bąą bąąhá yaa naakaiígíí biniinaa kǫ́ǫ́ honohłónígíí doo bił béédahózin da.

20 Áádóó tʼááʼaaníí, ánáánihidishní náánáłaʼ dóoneʼé danilínígíí ałdóʼ nihiTaaʼ nilíinii yitsʼéíninil; dóó bibąąhá yaa naakaiígíí biniinaa éí dahólǫ́ǫdi doo bił béédahózin da.

21 Áádóó tʼáá aaníigo Nihichʼįʼ haasdziih, baa haasdziʼę́ę́ éí nihí ánihidishní: Dibé łaʼ shee nááhódlǫ́ éí doo kǫ́ǫ́ atah da; éídóʼ áádę́ę́ʼ deeshʼish, dóó shinééʼ deididootsʼį́į́ł; dóó tʼááłáʼí dayikah dooleeł dóó tʼááłáʼí yá sizíi dooleeł.

22 Áádóó tʼáadoo shikʼidaʼdiitąą da, háálá Gentile dineʼé baa yájíłtiʼ danízin ńtʼę́ę́ʼ; háálá Gentile dineʼé éí binaʼnítinígíí binahjįʼ sodizin yihididookahígíí éí doo bił béédahózin da.

23 Áádóó tʼáadoo shikʼidaʼdii tąą da éí shinééʼ deididootsʼį́į́ł dííniidígíí; dóó tʼáadoo shikʼi náádaʼdiitąą da Gentile dineʼé éí tʼáá haaʼída doo shinééʼ deididootsʼį́įł da—éí doo bichʼįʼ ííshją́ą́ ádiʼdideeshníił da tʼáá hazhóʼó Iiʼ Sizį́ Diyinii binahjįʼ tʼéiyá.

24 Ákondi shooh, nihí éí shinééʼ dashidootsʼą́ą́ʼ, dóó dashoołtsą́; dóó nihí éí shidibé danohłį́, dóó nihí éí nihiTaaʼ nilíinii shee diníʼánígíí bitah danohłį́.