1 Áádóó baa hoolzhiizh Jesus díí ałtso naʼnitin yaa nahasneʼgo áłah jílínée hatah ahééníghal, dóó áháłní: Áko shooh, díí tʼahdoo nihiTaaʼ nilíinii bichʼįʼ dah ńdiishdáahgo naʼnítin bee naʼnétą́ʼąą dasidoohtsʼą́ą́ʼ, éí bąą, tʼáá háiida díí shinaʼnitin yénálniih dóó yikʼeh hółʼínígíí, éí akéeʼdi ayííłką́ągo hináago ándeeshdlííł.

2 Áádóó baa hoolzhiizh Jesus díí ałtso saad yee haadzíiʼgo, dineʼé łaʼ Moses bibee hazʼáanii shąʼ haadoonííł yaa ááh danízingo yaa ákoniizį́į́ʼ; háálá ałkʼidą́ą́ʼ ádaátʼéhę́ę éí ałtso bohoolyaa, dóó tʼáá ałtsoní ániidí daazlį́į́ʼ haʼnínígíí tʼáadoo yikʼidaʼdiitą́ą da.

3 Áádóó kóyidííniid: Ałkʼidą́ą́ʼ ádaátʼéhę́ę ałtso bił ahóóyá, dóó tʼáá ałtsoní ániidí daazlį́į́ʼ, dishnínígíí tʼáadoo haitʼáo da baa ááh danohsiní.

4 Áko shooh, nihichʼįʼ haasdziih Moses bee hazʼáanii beiyílyáhą́ą éí ałtso bohoolyaa.

5 Áko shooh, shí éí bee hazʼáanii ninílá, dóó shí éí shidineʼé Israel bił ahaʼdinishtʼánée áshtʼį́; éí bąą, bee hazʼáanii yę́ę shí shinahjįʼ ałtso bohoolyaa, háálá shí éí bee hazʼáanii bohodoolnííł biniyé níyá; éí bąą éí kojįʼ ninítʼiʼ.

6 Áko shooh, Diyin yá yádaałtiʼí haneʼ ádayiilaa yę́ę éí doo deeshchxǫǫł da, háálá ląʼí da tʼáadoo shinahjįʼ bohoolyaayę́ę, tʼáá aaníigo Nihichʼįʼ haasdziih, éí tʼáá ałtso bohodoolnííł.

7 Áádóó ałkʼidą́ą́ʼígíí ałtso bił ayííłką nihidishnínígíí, éí náasjįʼ ádahodoonííł daanínée doo yíłchxǫʼ da.

8 Háálá áko shooh, shidineʼé bił ahaʼdinishtʼánée éí tʼahdoo ałtso bohoolnéeh da; ndi bee hazʼáanii Moses beiyílyáhą́ą éí shinahjįʼ ałtso bohoolyaa.

9 Áko shooh, shí éí bee hazʼáanii, dóó adinídíín nishłį́. Shichʼįʼ dadínóhʼį́į́ʼ, dóó nihá ndahwiistʼą́ bijį́įjįʼ yéego ádaahtʼį́, dóó dahinohnáa doo; áko, háí shį́į́ bá nihootʼą́ bijį́įjįʼ yéego átʼíinii éí hoolʼáágóó iiná baa deeshłééł.

10 Áko shooh, bee hazʼáanii nihaanílá; éí bąą shibee hazʼáanii bikʼeh dahonołʼį́. Áádóó díí éí bee hazʼáanii dóó Diyin yá yádaałtiʼii bizaad ádaatʼé, háálá éí tʼáá aaníí shaa ndahasneʼ.

11 Áádóó baa hoolzhiizh Jesus díí saad yee haadzíiʼgo, hastóí naakitsʼáadah náyiizláʼą́ą éí kótʼéego yichʼįʼ haadzííʼ:

12 Nihí shikééʼ nisoozį́; dóó nihí díí Joseph bighandóó dineʼé danilínígíí, bibee adinídíín danohłį́.

13 Áádóó áko shooh, díí éí kéyah nihí; dóó nihiTaaʼ nilíinii éí nihaidiníʼą.

14 Áádóó hádą́ąʼda éí nihiTaaʼ nilíinii díí kéyah nihikʼisóó Jerusalemdi kéédahatʼíinii doo bił hodíílnih da shidííniid.

15 Áádóó ałdóʼ hádą́ą́ʼdiidah éí nihiTaaʼ nilíinii náánáłaʼ Israel bighan dooígíí ałʼąą dóoneʼé danilínígíí bee bił chʼídííʼááł tʼáadoo shidííniid da, éí nihiTaaʼ nilíinii kéyahdę́ę́ʼ chʼíyiizhʼeezh.

16 Díí kóníłtsoígo nihiTaaʼ nilíinii, bee bił hodíílnih shidííniid:

17 Áko łaʼ dibé shee nááhódlǫ́ éí éiyá doo kǫ́ǫ́ atah da; éídóʼ áádę́ę́ʼ deeshʼish, dóó shiinééʼ deididootsʼį́į́ł; dóó tʼááłáʼíjįʼ dibé hólǫ́ǫ dooleeł, dóó naʼniłkaadí tʼááłáʼí dooleeł.

18 Áádóó áko, bikʼos daniłdzil dóó doo daʼoodląągóó biniinaa shizaad tʼáadoo yikʼidaʼdiitą́ą da; Éí bąą nihiTaaʼ nilíinii áshidííniid díí baa haneʼígíí tʼáá ákódígo bee bił hodíílnih shidííniid.

19 Ákondi, tʼáá aaníigo, ánihidishní díí nihiTaaʼ nilíinii bee bił hodíílnih shiłnínígíí, dóó bee nihił hashneʼ, nihí bitsʼánihiʼdeeʼnil bąąhá yaa naakaigo biniinaa; Éí bąą bąąhá yaa naakaiígíí biniinaa kǫ́ǫ́ honohłónígíí doo bił béédahózin da.

20 Áádóó tʼáá aaníí, ánáánihidishní náánáłaʼ dóoneʼé danilínígíí ałdóʼ nihiTaaʼ nilíinii yitsʼéíninil; dóó bibąąhá yaa naakaiígíí biniinaa éí dahólǫ́ǫdi doo bił béédahózin da.

21 Áádóó tʼáá aaníigo Nihichʼįʼ haasdziih, baa haasdzíʼę́ę éí nihí ánihidishní: Dibé łaʼ shee nááhódlǫ́ éí doo kǫ́ǫ́ atah da; éídóʼ áádę́ę́ʼ deeshʼish, dóó shiinééʼ deididootsʼį́į́ł; dóó tʼááłáʼí dah yikah dooleeł dóó tʼááłáʼí yá sizį́į dooleeł.

22 Áádóó tʼáadoo shikʼidaʼdiitą́ą da, háálá Gentile dineʼé baa yájíłtiʼ danízin ńtʼę́ę́ʼ; háálá Gentile dineʼé éí binaʼnitinígíí binahjįʼ sodizin yihididookahígíí éí doo bił béédahózin da.

23 Áádóó tʼáadoo shikʼidaʼdiitą́ą da éí shiinééʼ deididootsʼį́į́ł dííniidígíí; dóó tʼáadoo shikʼináádaʼdiitą́ą da Gentile dineʼé éí tʼáá haaʼída doo shiinééʼ deididootsʼį́įł da—éí doo bichʼįʼ ííshją́ą́ ádiʼdideeshníił da tʼáá hazhóʼó Iiʼ Sizį́ Diyinii binahjįʼ tʼéiyá.

24 Ákondi shooh, nihí éí shiinééʼ dashidootsʼą́ą́ʼ, dóó dashoołtsą́; dóó nihí éí shidibé danohłį́, dóó nihí éí nihiTaaʼ nilíinii sheidiníʼánígíí bitah danohłį́.