1 Áádóó baa hoolzhiizh Jesus kótʼéego Nephi, dóó bikʼidahodiiniiʼę́ę yichʼįʼ haadzííʼ, (áko díí diné bikʼidahodiiniiʼę́ę, dóó óhólníihii bikʼehgo tó bee alzį́į́h baa dahasyáhą́ą, éí naakitsʼáadah) áádóó áko shooh, diné áłah jílínée bílaʼ yee yichʼįʼ dahdiilniiʼ, dóó yichʼįʼ haadzííʼ, kóníigo: Nihikʼijideeshdliił díí nihitahdóó naakitsʼáadah ndanihinitin, dóó nihá nidaalnish doo biniyé bikʼidadiishniiʼígíí deísínóołtsʼą́ą́ʼ; dóó éí éí tó bee alzį́į́h bee adziil baa hélá tó yee danihidoosį́į́ł biniyé; áádóó tó bee nihiʼdoolzį́į́ʼ dóó shí éí kǫʼ dóó Iiʼ Sizį́ Diyinii bee nihideesįįł; Éí bąą nihikʼihojídlí dóó shiisoohdląądgo dóó tó bee nihiʼdoolzį́įʼgo, éí bikʼijįʼ dashoołtsą́ągo honishłónígíí nihił béédahodoozįįł.

2 Áádóó nááná, nihizaad dayoosdląądígíí łą́ągo bikʼidahojidoodliił háálá dashoołtsánígíí tʼáá aaníí baa dahodoołnih, dóó tʼáá aaníí honishłónígíí nihił béédahodoozįįł. Aooʼ, nihizaad dayoosdląądígíí éí bikʼidahojídlíi dooleeł, dóó hojoobaʼ ńdaasdlį́ʼígíí dóó tó bee dabiʼdoolzį́ʼígíí, háálá kǫʼ dóó Iiʼ Sizį́ Diyinii bił hodooleeł, dóó bąąhági ádáátʼįįdyę́ę baa ńdaʼdidootʼááł.

3 Aooʼ, hojoobaʼ ádeinízingo shaa hakááhígíí éí bikʼidahojídlí, háálá yáʼąąshdi hazʼáanii daabí.

4 Áádóó nááná, tʼáá ałtso yínííł nidaakai bikʼidahojídlí, háálá éí hadaʼólníigo ádadoolnííł.

5 Áádóó baa hojoobaʼígíí bikʼidahojídlí, háálá éí nahasdzáán daabí dooleeł.

6 Áádóó tʼáá ałtso diyinkʼehgo yíká dichin dóó dibááʼ danízinii bikʼidahojídlí, háálá éí éí Iiʼ Sizį́ Diyinii bił dahólǫ́ǫ doo.

7 Áádóó aa aʼááh danízinii bikʼidahojídlí, háálá éí aa aʼááh daabí dooleeł.

8 Áádóó aʼátʼeʼ doo bijéí biiʼ dahólóonii bikʼidahojidlí, háálá Diyin God deidoołtsééł.

9 Áádóó kʼé nídahoołeełii bikʼidahojidlí, háálá Diyin God baʼáłchíní dabidiʼníi doo.

10 Áádóó tʼáá ałtso shízhiʼ biniinaa atídabiʼdiilyai éí bikʼidahojídlí, háálá yáʼąąshdi hazʼáanii daabí.

11 Áádóó shiniinaa tʼáá ádzaagóó diné nihaa ndahalneʼgo dóó nihichʼįʼ ndahwiiłnáago, dóó doo yáʼáshǫ́ǫ́góó aseezį́ nihikʼijįʼ ádeiłʼį́įgo, nihikʼidahojídlí;

12 Háálá tʼáá íiyisíí ił hózhóonii nihiiʼ dooleeł dóó tʼáá íiyisíí baa nihił dahodoozhǫǫł, háálá ayóó átʼéii yáʼąąshdi yisołbą dooleeł; háálá tʼáá díigi átʼéego nihiląąjįʼ Diyin yá yádaałtiʼii atídeiłʼį́į́ ńtʼę́ę́ʼ.

13 Tʼáá aaníí, tʼáá aaníigo, Nihichʼįʼ haasdziih, nahasdzáán beʼáshįįh danohłį́į doo; ndi áshįįh doo halniih da silį́įʼgo shąʼ haʼátʼíí nahasdzáán bikʼídooʼnił? Áshįįhę́ę éí áádóó tʼáadoo biniyéhé da doo, ndi tʼóó chʼídoolkał dóó diné yikʼi naaldeeh doo.

14 Tʼáá aaníí, tʼáá aaníigo, Nihichʼįʼ haasdziih, díí diné bá adinídíín danohłį́į doo. Kin hókʼąądi dashijaaʼgo éí doo ńdidoolʼį́įł da.

15 Áko shooh, dinéésh akʼahkǫʼ deidiiłtłiʼ dóó ásaaʼ yistłʼónígíí yił yaa ninádeiʼááh? Nda shį́į́, ákondi akʼahkǫʼ anátsihígi ańdeitsih, dóó hoghan góneʼ hojílónígíí há bee adinídíin doo;

16 Éí bąą niheʼadinídíín bíniʼdii diné bilą́ąjįʼ adiníłdíín, áko da naanish yáʼátʼéehgo ółʼínígíí deinéłʼį́ dóó nihiTaaʼ yáʼąąshdi hólóonii yaa dahaniih doo.

17 Tʼáadoo bee hazʼáanii dóó Diyin yá yádaałtiʼii yee hadahasdzíʼę́ę biʼniiłchxǫʼ danohsiní. Doo éí deeshchxǫǫł biniyé níyáa da ákondi tʼáá ałtso bohodoolnííł biniyé.

18 Háálá tʼáá aaníigo Nihichʼįʼ haasdziih, tʼááłáʼígo dah alzhin dóó tʼááłáʼígo adeesdzoh ndi doo bee hazʼáanii bitsʼą́ą́dóó nahjįʼ kólyaa da, ákondi shinahjįʼ tʼáá ałtsoní bohoolyaa.

19 Áádóó áko shooh, shiTaaʼ nilíinii bibee hazʼáanii dóó saad bikʼeh dahonołʼį́į dooleełígíí nihił ííshją́ą́ʼ íishłaa, áko dashiidoohdląął, dóó nihibąąhági ádaatʼéii baa ńdaʼdoohkąął, dóó nihijéí dóó nihiyiʼsizʼíinii yínííł danohłį́įgo shaa hohkááh. Áko shooh, saad bikʼeh dahonołʼį́į dooleełígíí éí nihidááhgóó, dóó bee hazʼáanii éí ałtso bohoolyaa.

20 Éí bąą shaa hohkááh dóó yisdánihideeshʼish; háálá tʼáá aaníigo Nihichʼįʼ haasdziih, tʼáá hazhóʼó shibee hazʼáanii bikʼeh dahonołʼį́įgo tʼéiyá, éí kʼad bikʼeh dahonołʼį́ nihidííniidyę́ę, éí biniinaa yáʼąąsh hazʼą́ądi doo yah ahidoohkah da.

21 Ałkʼidą́ą́ʼ díí yee hadahaasdzíiʼgo dasidootsʼą́ą́ʼ, dóó ałdóʼ nihidááhdóó bee akʼeʼeshchį́, doo niʼdziłtseed da, dóó háí shį́į́ naʼałtseedgo éí Diyin God binahwiitʼaah bikʼijįʼ kótʼée dooleeł.

22 Ákondi nihichʼįʼ haasdziih, tʼáá háiida bikʼis yichʼįʼ báhóóchįįdígíí éí bibee nihwiitʼaahii báhádzidgo bikʼijįʼ kótʼée dooleeł. Áádóó tʼáá háiida bikʼis, Raca yiłníigo, éí báhádzidgo ándaahwiiʼaahii há ndahodooʼááł; dóó tʼáá háiida, Diigis nínígíí, éí chʼį́įdiitah bił hodookʼą́ąłdi hojílǫ́ǫ doo.

23 Éí bąą, háí shį́į́ shaa nooyáhígíí, éí doodaiiʼ shaa doohááł nohsinígíí, dóó nihikʼis tʼáá haʼátʼííshį́į́ nikʼijįʼ yisʼánígíí béénílniih—

24 Nikʼis bichʼįʼ dinááh, dóó áłtsé nikʼis kʼénábididííʼniił, áádóó índa nijéí biyiʼdę́ę́ʼ tʼáá aaníí nínízingo shaa díínááł, dóó shił hónílǫ́ǫ doo.

25 Nihitsʼą́ąjįʼ danilínígíí tʼahdii kʼé dabidohnínídą́ą́ʼ tsxį́įłgo yaa yáłtiʼígíí tʼáá ákótʼé bidohní, háálá náasdi doo nihikʼehdidoodleeł da, dóó doo awáalyah góneʼ anihidoołtʼeeł da.

26 Tʼáá aaníí, tʼáá aaníigo, Nihichʼįʼ haasdziih, ákogo doo éí chʼééh dohdáał da tsʼídá ałtso nihá nihootʼánée senine bíighah ninooláago tʼéiyá. Áádóó awáalyah góneʼ sínídáagoósh senine tʼááłáʼí ndi nináʼdíídlééł? Tʼáá aaníí, tʼáá aaníigo, shí éiyá Ndayeeʼ nihidishní.

27 Áko shooh, ałkʼidą́ą́ʼ díí yaa ndaʼiizohyę́ę daołtsą́, doo azhdilée da dadííniid;

28 Ákondi nihichʼįʼ haasdziih, tʼáá háiida asdzání yinéłʼį́įgo, yídanoosnííʼgo, éí tʼáá íídą́ą́ʼ bijéí biyiʼdi aaʼdííláa doo.

29 Áko shooh, díí bee hazʼą́ągo bee nichʼįʼ haasdziih, háálá díí doo łaʼ nijéí biyiʼ doo bá hwiidííłʼaał da.

30 Háálá díigi ádaátʼéhígíí atsʼádinootʼąągo éí nihá yáʼátʼéeh doo, ákótʼéego nihitsin ałnáozʼáí ndadidoohtį́į́ł, áko doo chʼį́įdiitahgóó anihidiʼyoolghą́ą́ł da.

31 Éí ałkʼidą́ą́ʼ bikááʼ ályaa, tʼáá háiida beʼasdzą́ą́ nahjįʼ kóyiilaaígíí, éí ałtsʼátʼáásh binaaltsoos bikʼeʼeshchį́įgo yeidoołtsos.

32 Tʼáá aaníí, tʼáá aaníigo, Nihichʼįʼ haasdziih, tʼáá háiida beʼasdzą́ą́ nahjįʼ kóyiilaaígíí, doo diné bee tsiʼnaʼadá biniinaagóó, éí aaʼdilyé bee bá hojiiłʼaʼ dooleeł; áádóó háí shį́į́ yóó abiʼdootʼą́ą́shį́į́ bizyehgo éí aaʼdííláa doo.

33 Áádóó bikʼinááʼásdzoh, tʼáadoo tʼóó ádíníigo bee ádee hadídziihí, ákondi bee ádee hadídziihígíí Diyin God binááł biʼołʼį́;

34 Ákondi tʼáá aaníí, tʼáá aaníigo, Nihichʼįʼ haasdziih, tʼáadoo ádee hadahodziihí; yádiłhił ndi bee dooda, háálá éí Diyin God yikááʼ dah sidáhí átʼé;

35 Nahasdzáán ndi dooda, háálá éí yikááʼ dah ndílʼisígíí átʼé;

36 Doo ndóʼ nihitsiitsʼiin bee ádee hadadohdzih da, háálá nihitsiiʼ łaʼ łizhingo dóó łaʼ łigaigo ádoołíiłgo doo bíínóhghah da;

37 Ákondi ałchʼįʼ yádaałtiʼgo Aooʼ, aooʼ; Dooda, dooda dadohníi dooleeł; háálá tʼáá haʼátʼííshį́į́ bínáánéitʼąągo éí doo yáʼáshóonii átʼé.

38 Áádóó áko shooh, éí nááháasdzo, anááʼ lá anááʼ bikʼé naazlá, dóó awooʼ lá awooʼ bikʼé naazlá;

39 Ákondi nihichʼįʼ haasdziih, éí tʼáadoo doo yáʼátʼéehii nátʼą́ą́ʼ doo yáʼátʼééh bee akʼeedohniihí, ndi tʼáá háiida nihinishʼnáájí nihiniiʼ néidííkaadgo, éí łahjígíí ałdóʼ baa náádidooʼááł.

40 Áádóó tʼáá háiida diné nihee niʼníłtsoozgo nihiʼéétsoh nihighai níłtsoozgo, niʼééʼ bikʼínáltihí ałdóʼ baadííłtsos;

41 Áádóó háiida łaʼ tsin sitą́ąjįʼ shił niníʼaash nidííniidgo, naaki tsin sitą́ąjįʼ bił ndííʼash.

42 Tʼáá háiida tʼáadoo leʼé nihíyííkeedgo baa doohłééł, dóó tʼáá háiida tʼáadoo leʼé shaʼnílé nihidííniidgo tʼáadoo dooda diníní.

43 Áádóó áko shooh éí ałdóʼ bikʼeʼeshchį́, nihinaagóó kéédahatʼínígíí ayóóʼádeiyínohní dóó niheʼenaʼí éí dajiinohłá;

44 Ákondi shooh nihichʼįʼ haasdziih, niheʼenaʼí ayóó ádeiyínohní, danódziihii éí bikʼijinídlí, dóó danjoołáii yáʼátʼéehgo tʼéiyá bił nanilnish, dóó atínihiłʼínígíí dóó nihichʼįʼ nahwiiłnánígíí éí bá sodílzin.

45 Áko nihiTaaʼ yáʼąąshdi hólóonii baʼáłchíní danohłį́į doo; háálá bijóhonaaʼéí doo yáʼáshóonii dóó yáʼátʼéehii yikááʼ hanádáahgo áyósin.

46 Éí bąą tʼáadoo leʼé ałkʼidą́ą́ʼ yę́ę bee hazʼáanii, bikʼidaastiʼę́ę, éí tʼáá ałtso shinahjįʼ bidahoolyaa.

47 Ałkʼidą́ą́ʼ ádaátʼéhę́ę éí nahjįʼ kódaalyaa, dóó tʼáá ałtso ániidí nídaasdlį́į́ʼ.

48 Éí bąą shí, éí doodago nihiTaaʼ yáʼąąshdi hólóonii haałtʼéhígi átʼáo nihídóʼ hadanołtʼée doo.