1 Áádóó áko baa hoolzhiizh Nephi bidineʼé, tʼóó ahayóí áłah silį́įʼgo, kéyah Bountifulgi diyin bighan siʼánígíí binaagóó; áádóó bił dahooyóí dóó bił ádahoodzaayę́ę yee ałchʼįʼ yádaałtiʼ, dóó díí ayóó átʼáó dóó ayóó ádahonoolnin ádahoodzaa yę́ę deiyiiłtsą́ągo yee ahił dahalneʼ.

2 Áádóó ałdóʼ díí Jesus Christ bee ahił dahojilneʼ, daaztsą́ągo bee ééhózin doo haʼnínée éí hoł íishjání ádaalyaa.

3 Áádóó baa hoolzhiizh díigi átʼéego ahił dahalneʼgo, yáʼąąshdę́ę́ʼ hachʼįʼ haʼoodzííʼ nahalingo dazhdiiztsʼą́ąʼ, dóó ndajizghal, háálá díí hachʼįʼ haʼoodzíʼígíí dazhdiiztsʼą́ą́ʼ ńdi tʼáadoo bikʼidazhdiitą́ą da; doo éí tʼáá naʼnileʼdii haʼoodzííʼ da, doo ndóʼ éí ayóo íitsʼaʼ da; ákotʼée ndi, dóó azhą́ hazhóóʼógo yáłtiʼ ndi íiyisíí biyiʼ ałníidi dabidiisnááʼ, wónáásdóó bitsʼíís tʼááʼátʼé bitah dahoditłid; aooʼ, tsʼída bitsʼíís biiʼ sizíinii yidiisnááʼ, dóó bijéí diltłiʼ nahalingo ádabiilaa.

4 Áádóó baa hoolzhiizh iinééʼ náádeidiiztsʼą́ąʼ, dóó tʼáadoo yikʼidaʼdiitąą da.

5 Áádóó nááná tááʼ góneʼ hanááʼoodzíiʼgo índa iinééʼ dazhdiiztsʼą́ą́ʼ, dóó deididootsʼį́į́ł biniyé bijaaʼ ąą ádayiilaa; dóó hodiitsʼaʼígíí yichʼįʼ dadééʼį́į́ʼ, dóó yáʼąąshgódei, doo nahjįʼ kódaanééhgóó hodiiztsʼą́ą́ʼjígo dadééʼį́į́ʼ.

6 Áádóó áko shooh, táadi azlį́įʼgo índa iinééʼ deidiiztsʼą́ʼígíí yikʼidaʼdiitą́; dóó éí kóbidííʼniid:

7 Áko shooh shiYeʼ Ayóí Ííníshʼníi, éí íiyisíí baa shił hózhǫ́, éí bee shízhiʼ ayóó ánoolningo íishłaa—deiísínółtsʼą́ą́ʼ.

8 Áádóó baa hoolzhiizh, akʼidaʼdiitą́ągo yáʼąąshgódei náádadééʼį́į́ʼ; áádóó áko shooh, Diné léiʼ yáʼąąshdę́ę́ʼ adah yigáałgo dayiiłtsą́; dóó ééʼ łigai léiʼ yiiʼ sitį́įgo; dóó adááyá dóó hatahgi yiizįʼ; dóó diné tsʼída tʼáá átʼé dabinéłʼį́, dóó hadadoodzih ndi, yichʼįʼ daastiih, dóó díí átʼínígíí éí doo bił béédahózin da, háálá bí ádeinízingo éí Diyin yá naalʼaʼí łaʼ nihaa níyá daniizį́į́ʼ.

9 Áádóó baa hoolzhiizh bílaʼ yee dineʼé yichʼįʼ dah diilniiʼ dóó kótʼéego yichʼįʼ haadzííʼ, kóníigo:

10 Áko shooh, Shí éí Jesus Christ áshtʼį́, Diyin yá yádaałtiʼí nahasdzáán bikáaʼjįʼ tʼáá aaníigo doogááł daanínée áshtʼį́.

11 Áádóó áko shooh, shí nahasdzáán beʼadinídíín nishłį́ dóó bikááʼ siláhígíí shinahjįʼ dahiiná; dóó nihiTaaʼ nilíinii bąąh haʼíízhahí díchʼíiʼgo yee sheiníkánígíí yishdlą́ą́ʼ, dóó nihiTaaʼ nilíinii nihokááʼ dineʼé bibąąhági ádaatʼéii bá tiʼhwiiséniiʼgo ayóó átʼáo bá hodíísįįd, dóó nihiTaaʼ nilíinii íinízinígíí bikʼehgo éí tʼáá ałtsoní hodeeyáádą́ą́ʼ bá tiʼhwiiséniiʼ.

12 Áádóó baa hoolzhiizh Jesus kótʼéego haadzíiʼgo diné tʼáá ałtso nahasdzáán yikáaʼjįʼ naaʼaníídeeʼ; háálá Diyin God yá yádaałtiʼii Christ yáʼąąshgóó nináásdzáago díí dineʼé yaadoogááł dadííniidée éí yéédaasniiʼ.

13 Áádóó baa hoolzhiizh Diyin Bóhólníihii bichʼįʼ haadzííʼ kóníigo:

14 Daoohsįįh dóó wóshdę́ę́ʼ shaa hohkááh, áko shooshkʼiizh tídiilyaayę́ę bídadidoołnih, áádóó shílaʼ dóó shikeeʼ góneʼ bił adaʼaskaalę́ę bídadidoołnih, áko shí tʼáá aaníí Israel biDiyin God nishłį́, dóó nahasdzáán tʼáá átʼéé ńtʼę́ę́ʼ biDiyin God nishłį́, dóó nahasdzáán bibąąhági ádaatʼéii biniinaa shiʼdiisxínígíí nihił béédahodoozįįł.

15 Áádóó baa hoolzhiizh diné bichʼįʼ dah dadiikai, booshkʼiizh gónaa yídadeesniiʼ, dóó bílaʼ dóó bikeeʼ bił adaʼaskaalʼę́ę yídadeesniiʼ; dóó díigi éí ádáádzaa, tʼááłáʼí nízinígo áajįʼ nihiikáahgo, binááʼ yee deinééłʼį́į́ʼ dóó bílaʼ yee yídadeesniiʼ, dóó tʼááʼaaníí bił béédahoozįįd, díí éí, Diyin yá yádaałtiʼii, doogááł daaníigo, yee yikʼidaʼashchínée átʼį́.

16 Áádóó tʼáá átʼé áajįʼ niheeskai dóó tʼáá bí bił béédahoozingo, tʼáá átʼé tʼáá áłahjįʼ hadadeeshghaazh, kódaaníigo:

17 Hosanna! Aláahdi Diyin God Nilíinii nízhiʼ baa dahwiiʼniih! Áádóó Jesus deesʼeezjįʼ niʼ aníídeeʼ, dóó yichʼįʼ sodadoolzin.

18 Áádóó baa hoolzhiizh Nephi yichʼįʼ haadzííʼ (Háálá Nephi áłah jílínée ajítah ńtʼę́ę́ʼ) dóó wóshdę́ę́ʼ shaa nínááh hodííniid.

19 Áádóó Nephi ńdiiʼnaʼ dóó dah diiyá, dóó Diyin Bóhólníihii yidááhdóó ntsidinígoʼ dóó yikeeʼ yiztsʼǫs.

20 Áádóó Diyin Bóhólníihii ńdiiʼnééh bidííniid. Áádóó ńdiiʼnaʼ dóó yidááhdóó yiizįʼ.

21 Áádóó Diyin Bóhólníihii kóbidííniid: Tó bee alzį́į́hjí ádziilii naahninishłé áko yáʼąąshgóde anínáánáásdzáago díí dineʼé tó bee yidíísį́į́ł.

22 Áádóó nááná Diyin Bóhólníihii łaʼ wóshdę́ę́ʼ náánéidooʼniid, dóó kótʼéego yichʼįʼ hanáánáádzííʼ; dóó tó bee alzį́į́hjígo ádziilii yaa yiizlá. Áádóó yichʼįʼ haadzííʼ: Kótʼéego tó bee daʼoosį́į́h doo; dóó tʼáadoo bee ałghadaʼdohtʼáhí dooleeł.

23 Tʼáá aaníigo Nihichʼįʼ haasdziih, tʼáá háíshį́į́ nihizaad binahjįʼ bibąąhági ádaatʼéii yaa ńdaʼooskango, dóó shízhiʼ binahjįʼ tó bee shidiʼdoolzį́į́ł nízingo, éí kótʼéego tó bee dadoohsį́į́ł—Áko shooh, taah hohkááhgo dóó táyiʼ nisoozį́įgo, dóó shízhiʼ binahjįʼ tó bee deidohsį́į́ł.

24 Áádóó kʼad áko shooh, díí éí saad bee hadoohdzih, bízhiʼ bee yínóhshíigo, kódadohníigo:

25 Jesus Christ bee óhólníihii sheinílahígíí bee, shí tó bee niisįįh nihiTaaʼ nilíinii bízhiʼ binahjįʼ, dóó aYeʼ nilíinii, dóó Iiʼ Sizį́ Diyinii. Amen.

26 Áádóó índa tó bikʼih didoolkǫǫł, dóó táyiʼdę́ę́ʼ háádoodááł.

27 Áádóó díí bikʼehgo shízhiʼ binahjįʼ tó bee daʼoohsį́į́h dooleeł; háálá áko shooh, tʼáá aaníigo Nihichʼįʼ haasdziih, éí nihiTaaʼ nilíinii dóó aYeʼ, dóó Iiʼ Sizį́ Diyinii éí tʼááłáʼígíí yee naazį́; dóó nihiTaaʼ nilíinii bił honishłǫ́, dóó nihiTaaʼ nilíinii éí shił hólǫ́; dóó nihiTaaʼ nilíinii dóó shí éí tʼááłáʼí bee siidzį́.

28 Áádóó bee nihichʼįʼ haasdzíʼę́ęgiʼ átʼáo tó bee daʼoohsį́įh doo. Dóó tʼáadoo baa ałghadaʼdohtʼáhí doo, áłtséédą́ą́ʼ ádaahtʼínéegi átʼéego; doo ndi łahdóó shinaʼnitin tʼáadoo bee ałghadaʼdohtʼáhí dooleeł, ałtséédą́ą́ʼ ádaahtʼínéegi átʼéego.

29 Háálá tʼáá aaníí, tʼáá aaníigo Nihichʼįʼ haasdziih, tʼáá háíshį́į́ saad ahétʼáah biyiʼ hólǫ́ǫgo éí doo shikééʼ sizį́į da, ndi éí biʼiiníziinii yikééʼ sizį́, éí éiyá saad ahétʼááh yizhéʼé nilį́ dóó diné bijéí neiyiłná saad ahétʼáahgo, ałchʼįʼ bá dahachįʼgo ádeileʼ.

30 Áko shooh, diné bijéí biyiʼ áháchįʼ, dóó ałkʼijįʼ naʼadzil, éí doo shí shinaʼnitin da; ndi díí éí shinaʼnitin, kódaátʼéhígíí éí yóó ádidootʼááł.

31 Áko shooh, tʼáá aaníí, tʼáá aaníigo, Nihichʼįʼ haasdziih, shinaʼnitin bee nihił hodeeshnih.

32 Áádóó díí éí shinaʼnitin átʼé, dóó díí naʼnitinii éí nihiTaaʼ nilíinii shee nílá; dóó tʼáá aaníigo nihiTaaʼ nilíinii baa hashneʼ, nihiTaaʼ nilíinii ałdóʼ tʼáá aaníí shaa halneʼ, dóó Iiʼ Sizį́ Diyinii ałdóʼ nihiTaaʼ nilíinii dóó shí tʼáá aaníí nihaa halneʼ; dóó shí éí nihiTaaʼ nilíinii nihokááʼ dineʼé, tʼáá ałtso adahwiisʼáágóó, ádaańdaʼoohkąąh dóó deinohdlą yiłní.

33 Áádóó háíshį́į́ shoosdląądígíí dóó tó bee yilzį́ʼígíí, éí yisdádoodlóós; dóó éí éiyá Diyin God bił hazʼąądi bá hwiidooʼaał.

34 Áádóó háíshį́į́ doo shóodlánígíí, dóó doo tó bee yilzį́ʼígíí, tiʼhooʼnííhgóó bá nihodootʼááł.

35 Tʼáá aaníí, tʼáá aaníigo, Nihichʼįʼ haasdziih, díí shinaʼnitin átʼé, dóó nihiTaaʼ nilíinii ánínígíí baa hashneʼ; dóó háíshį́į́ shoodlánígíí ałdóʼ nihiTaaʼ nilíinii yoodlą́; dóó éí bichʼįʼ éí nihiTaaʼ nilíinii shí nishłínígíí yił íishjání íidoolííł, háálá éí éiyá kǫʼ dóó Iiʼ Sizį́ Diyinii yee yidoosį́į́ł.

36 Áádóó ákótʼáo nihiTaaʼ nilíinii tʼááʼaaníí shaa halneʼ doo, dóó Iiʼ Sizį́ Diyinii éí nihiTaaʼ nilíinii dóó shí yichʼįʼ ííshją́ą́ íidoolííł; háálá nihiTaaʼ nilíinii, dóó shí, dóó Iiʼ Sizį́ Diyinii éí tʼááłáʼí bee ndasiidzį́.

37 Áádóó ánáánihidishní; ádaańdaʼoohkąąh, dóó áłchínígi átʼéego ídaʼdółnééh, dóó shízhiʼ binahjįʼ tó bee danihiʼdilzį́į́h, éí doodago díí doo shódeidoołtʼeeł da.

38 Áádóó ánáánihidishní, ádaańdaʼdoohkąął, dóó shízhiʼ binahjįʼ tó bee danihiʼdiilzį́į́h, dóó áłchínígi átʼéego ídaʼdołnééh, doodago éí Diyin God bił hazʼąądi doo nihá hwiidooʼaał da.

39 Tʼáá aaníí, tʼáá aaníigo, Nihichʼįʼ haasdziih, díí éí shí shinaʼnitin átʼé, dóó tʼáá háíshį́į́ díí yoosdląądígíí éí shitsé bikáaʼgi haʼdoohtłʼį́į́ł, dóó chʼį́įdiitah bidáńdítį́hí doo bikʼehdidoodleeł da.

40 Áádóó tʼáá háíshį́į́ díí biláahgo índa biʼohgo baa hojilneʼígíí, dóó díí Bóhólníihii binaʼnítin jinínígíí, éí dóo yáʼáshóonii bitsʼą́ą́dę́ę́ʼ, dóó doo éí shí shitsé bikááʼ jiztłʼin da; ndi éí éiyá séí yikáaʼgi aztłʼin, dóó tó bił yiląąhgo dóó níyol dah nayiiłhango chʼį́įdiitah bidáńdítį́hí bichʼįʼ ąą átʼée dooleeł.

41 Éí bąą, díí diné bitah nohkááh, dóó díí saad bee nichʼįʼ haadzíʼę́ę bee bił dahołneʼ, nahasdzáán nineelʼąąjįʼ.