1 Áádóó áko shooh, baa hoolzhiizh dineʼé tʼáá ałtso díí saad deidiiztsʼą́ą́ʼ, dóó yaa dahoolneʼ. Áádóó ałtso haʼoodzíiʼgo kéyah bikááʼgóó dooʼíítsʼaʼígo ląʼí ahééʼílkid;

2 Ayóó átʼáo dineʼé dadeesyizígíí biniinaa dabikʼéí nidaaztseed yę́ę yikʼee dadiʼní dóó daacha yę́ę niʼ kódeiyiilaa; éí bąą kéyah tʼáá átʼé bikááʼgóó ląʼí ahééʼílkid doo íítsʼaʼígóó.

3 Áádóó baa hoolzhiizh ázhí dineʼé yichʼįʼ hanááńáádzííʼ, dóó tʼáá ałtso dineʼé deidiiztsʼą́ą́ʼ, dóó deiyiiłtsą́, kóníigo:

4 O díí ayóó átʼáo kin dah naazhjaaʼ ndahaazkaad bidineʼé danohłíinii, Jacob bizází danohłíinii, aooʼ, éí Israel bitsʼą́ą́dóó deiyinohkáhígíí, díkwíidi lá naʼahóóhai bitʼaʼ biyaa biyázhí ahąʼánéíyilʼįįhígi átʼáo ahąʼánánihishʼįįh, dóó nihaa áháshyą́ą́ ńtʼę́ę́ʼ.

5 Áádóó ałdóʼ, díkwíidi lá ahąʼánánihiishdlaa naʼahóóhai bitʼaʼ biyaa biyázhí ahąʼánéíyilʼįįhígi átʼáo, aooʼ, O diné Israel bitsʼą́ą́dóó deiyinohkáhígíí, éí yóóʼadahisohkai; aooʼ, O diné Israel bitsʼą́ą́dóó deiyinohkáhígíí, Jerusalemdi kéédahohtʼinéé, yóóʼadahisohkai; aooʼ, díkwíidi lá ahąʼánánihiishdlaa naʼahóóhai bitʼaʼ biyaa biyázhí ahąʼánéíyilʼįįhígi átʼáo, dóó doo ádeinohsin da.

6 O Israel bitsʼą́ą́dóó deinókaahii yisdánihiiníiłii, díkwíidi lá ahąʼánhiishłaa naʼahóóhai bitʼaʼ biyaagi ahąʼáneiyilʼįįhígi átʼáo, ádaa ńdaʼsookango dóó nihijéí tʼáá átʼéé ńtʼééʼ bee ádeinohsingo shaa ndahokááh.

7 Ákondi doo ádaahdzaagóó, O Israel bighandóó danohłíinii, kéédahotʼį́įgi dahodoochxǫǫł danihizhéʼé bił ahaʼdinishtʼánée ałtso bohoolyaajįʼ ahoolzhiizhgo índá.

8 Áádóó áko baa hoolzhiizh dineʼé díí saad deidiiztsʼą́ąʼgo, áko shooh, adaʼniicha dóó hanáádadoolghaazh háálá dabikʼéí dóó dabikʼis nidaaztseedígíí biniinaa.

9 Áádóó baa hoolzhiizh tágíjį́ʼ ałtso ahóóyá. Áádóó abínígo, dóó chahałheeł kéyah bikááʼdóó ásdįįd, dóó nahasdzáán doo nahaʼnáa da silį́į́ʼ, dóó tseyę́ę doo ndahaltǫǫ da, dóó tʼóó báhádzidgo dadiitsʼaʼ yę́ę niʼkódaadzaa, dóó tʼáá átʼé dahodiitsʼaʼ yę́ę ałtso ádaasdįįd.

10 Áádóó nahasdzáán yę́ę ałchʼįʼ kóndaadzaa, áko yiizįʼ; dóó yínííł daʼdininéé, dóó daacha, dadilwosh yę́ę yisdáátʼéezh yę́ę ałtso ádaʼiilaa; yínííł danilíinii yę́ę ił hózhǫ́ daazlį́į́ʼ dóó daacha yę́ę Diyin Bóhólníihii Jesus Christ, bá Nináʼnídláii yaa dahaznih dóó ahééh daniidzį́į́ʼ.

11 Áádóó áko kojįʼ Diyin bizaad bee akʼedaʼashchínígíí bidahoolyaa éí Diyin yá yádaałtiʼii yee hadahaasdzííʼ.

12 Áádóó hózhǫ́ dineʼé yáʼátʼéehgo dahináanii éí yisdáátʼeezh, dóó éí Diyin yá yádaałtiʼii dayoosdląąd dóó tʼáadoo ndeineesneʼ da; dóó éí Diyin yá naazíinii tʼáadoo nideistseed da, éí yisdáátʼeezh—

13 Áádóó éí yisdáátʼeezh dóó tʼáadoo adahaazʼéél da dóó doo nahasdzáán bikʼííłdáaz da; dóó doo tónteel ditą́ądi ábidisdįįd da; dóó doo kǫʼ adabííłkʼą́ą́ʼ da, éí doodago doo bikʼídaʼiisdááz dóó dabiʼdishjizh da; dóó doo níyoltsoh dahdabidiijaaʼ da, éí doodaiiʼ łid dóó chahałheeł doo bikʼeh dadeesdlį́į́ʼ da.

14 Áádóó áko, háiida ooltaʼ yeehósingo, yikʼididootʼį́į́ł; Diyin bizaad bee akʼedaʼashchínígíí bee dahólóonii, háálá áko shooh bíniʼ nideiłkaah dóó deinéłʼį́ dóó yikʼidaʼdiitįįh díí ndaʼastseed dóó kǫʼ bee dahóóchxǫʼ, áádóó łid bee, dóó ndahałtin daníyol, dóó níyoltsoh bee, dóó nahasdzáán ąą ádzaago yiih dahineezdeeʼ, dóó díí tʼáá átʼé daʼ ádahoʼdooʼniid bidahodoolnííł ląʼí Diyin yá yádaałtiʼii dadiyinii yee hadahaasdzííʼ.

15 Áko shooh, ánihidishní, Aooʼ, ląʼí tʼáá aaníigo Christ doogáłígíí yaa ndahasneʼ, dóó díí tʼáá aaníigo yaa dahoolneʼígíí biniinaa nidabiʼdistseed.

16 Aooʼ, Zenos Diyin yá yáłtiʼii díí tʼáá aaníigo yaa hoolneʼ, áádóó Zenock ałdóʼ díí yaa hoolneʼ, háálá éí nihí tʼáá aaníigo nihaa nidahasneʼ, éí éí yitsʼą́ą́dóó yílástsiiʼ danilį́.

17 Áko shooh, nihizhéʼé Jacob ałdóʼ Joseph yitsʼą́ą́dóó tʼáá aaníigo yílástsiiʼ danilį́įgo yaa hoolneʼ. Áádóó áko shooh, daʼ nihí Joseph bílástsiiʼ daniidlį́? Áádóó díí tʼáá aaníigo nihaa dahalneʼígíí, dooʼísh béésh łitsoii tʼą́hí biyiʼ nídaháasdzo éí nihizhéʼé Lehi Jerusalemdę́ę́ʼ chʼííníʼą́?

18 Áádóó baa hoolzhiizh tádiin dóó biʼaan dį́į́ʼ ałtso náhááhgo, áko shooh, nihił ííshją́ą́ ádeeshłííł áko Nephi bidineʼé yisdáátʼeezhígíí, dóó ałdóʼ Laman dineʼé daolyéii, éí yisdáátʼeezhii, éí ayóó átʼáo bichʼihjí daʼasdlį́į́ʼgo bił ííshją́ą́ ádaalyaa, ayóó átʼáo bitsiiʼtsiin bikáaʼjįʼ bikʼidahojisdliʼ, Christ yáʼąąshgóó anáádzáádóó bikʼijįʼ tʼáá aaníigo yichʼįʼ ííshjání áʼdiilyaa—

19 Bitsʼíís yichʼįʼ ííshją́ą́ áyiilaa, dóó diyinkʼehgo yíkáʼaalwod; diyingo yíkáʼaalwodígíí díí bikééʼdóó baa hodoonih. Éí bąą kʼad éiyá tʼááʼákódíjįʼ bee haasdzííʼ doo.