Faamanatuga
I le po a o lumanai ai Lona Faasatauroga, na faapotopoto ai Iesu ma Ana Aposetolo ma faia le faamanatuga. “Ona tago ai lea o Ia i le areto, ua faafetai, ua tofitofi, ma avatu ia te i latou, ua faapea atu, O lo’u tino lenei, ua foaiina atu mo outou; tou te faia le mea nei e fai ma faamanatuga ia te au. Sa faapea foi ona tago i le ipu, ina ua uma ona talisua, ua faapea atu, O lenei ipu o le feagaiga fou lea i lo’u toto, ua faamaligiina mo outou” (Luka 22:19–20). Ina ua mavae Lona Toetu mai, sa Ia faia foi le faamanatuga i tagata o Sa Nifae (tagai 3 Nifae 18:1–11).
O aso nei ua tatou aai i le areto [falaoa] ma feinu i le vai e fai ma faamanatuga o le taulaga togiola a Iesu Keriso. O lenei sauniga o se vaega taua o la tatou tapuaiga ma lo tatou atiinaega faaleagaga. O le faateleina ona tatou manatunatu loloto i ai i lona taua, o le faateleina foi lena ona avea o se mea e paia ia i tatou.
Faamanatuina o le Faaola ma Lana Togiola
O le faamanatuga e maua ai se avanoa mo oe e manatua ai ma le agaga faafetai le soifua, auaunaga, ma le Togiola a le Alo o le Atua.
O le areto po o le falaoa ua tofitofi, e te manatua ai Lona tino. E mafai ona e mafaufau i ai i Ona tiga faaletino—aemaise ai Lona mafatiaga i luga o le satauro. E mafai ona e manatua ai, ona o Lona alofa mutimutivale ma lona alofa tunoa, o le a toe tutu mai ai tagata uma ma maua ai le avanoa mo le ola e faavavau faatasi ma le Atua.
Faatasi ma sina ipu itiiti o le vai, e mafai ona e manatuaina ai sa faamaligiina e le Alii Lona toto i le tiga ma puapuaga matuia faaleagaga, e amata mai i le Faatoaga o Ketesemane. O iina na ia fetalai ai, “Ua matua tiga lo’u loto e oo i le oti” (Mataio 26:38). I le tuuina atu o Ia i le finagalo o le Tama, na matua tigaina ai o Ia e sili i mea e mafai ona tatou manatu i ai: “[na sau] le toto ai mea uma e afu ai, e faapea ona tele lona puapuaga ona o le amioleaga ma mea inosia a lona nuu” (Mosaea 3:7). E mafai ona e manatua ona o le faamaligiina o Lona toto, ua faasaoina ai oe ma isi tagata uma e Iesu Keriso mai le mea ua taua i tusitusiga paia o le “uluai sala” o le solitulafono a Atamu (Mose 6:54). E mafai foi ona e manatua na puapuagatia o Ia i agasala, faanoanoaga, ma tiga a fanau uma lava a le Tama Faalelagi, lea ua maua ai le faamagaloina o agasala mo i latou o e salamo ma ola i le talalelei (tagai 2 Nifae 9:21–23).
Faafouina o Feagaiga ma Faamanuiaga Folafolaina
Ao e taumafa i le faamanatuga, ua e molimau atu i le Atua o le a faateleina lou manatuaina o Lona Alo e sili atu i lo o le taimi puupuu o lena sauniga paia. Ua e folafola atu o le a e manatua pea o Ia. Ua e molimau atu ua e lotomalie e ave i ou luga le suafa o Iesu Keriso ma o le a e tausia Ana poloaiga. O le aai ma le feinu i le faamanatuga ma faia nei tautinoga, ua faafouina ai au feagaiga o le papatisoga (tagai Mosaea 18:8–10; MFF 20:37).
O le a e mauaina na faamanuiaga silisili pe a e tausia feagaiga o le papatisoga. A o e faafouina na feagaiga, o le a faafouina foi e le Alii folafolaga o le faamagaloina o au agasala. O le mama mai agasala, o le a mafai ai ona e “maua pea lona Agaga e faatasi ma [oe]” (MFF 20:77). O le mafutaga faifai pea ma le Agaga o se tasi lea o meaalofa silisili e mafai ona e mauaina i le olaga faaletino. O le a taitaiina oe e le Agaga i ala o le amiotonu ma le filemu, e taitaiina atu ai oe i le ola e faavavau faatasi ma lou Tama oi le Lagi ma Iesu Keriso.
Taumafa ma le Tatau
I le saunia ai mo le faamanatuga i vaiaso taitasi, ia faaaluina se taimi e suesueina ai lou olaga ma salamo mai au agasala. E le manaomia ona e matuai atoatoa ina ia mafai ai ona e ‘ai ma inu i le faamanatuga, ae e tatau ona ia te oe se agaga o le lotomaualalo ma le salamo i totonu o lou loto. E tatau ona e saunia i vaiaso uma lava mo lena sauniga paia faatasi ma se loto momomo ma le agaga salamo (tagai 3 Nifae 9:20).
Afai e te auai atu i le faamanatuga ma le migao ma le paia e pei ona tatau ai, o le a avea ma se avanoa o le vaiaso e toe iloiloina ai oe lava, salamo, ma toe faapaiaina—o se pogai o le malosi ma se faamanatu faifai pea o le Togiola a le Faaola.