“Mwakoro 53: Te Atua ma Taian Anera: Beberuare–Eberi 1843,” Te Boki Wareware n Tuua ma Berita (2002), 194–97
“Mwakoro 53,” Te Boki Wareware n Tuua ma Berita, 194–97
Mwakoro 53
Te Atua ma Taian Anera
(Beberuare–Eberi 1843)
N te bong teuana e roko temanna te aomata bwa e na nora Ioteba Timiti. E taku te aomata anne bwa e nora te anera. E kaota aron te anera n kunnikaia nakon Ioteba Timiti. E taku Ioteba Timiti nakoina bwa e kairua. E taku bwa anera a aki kunnikaiaki n aron are taku te aomata anne.
E rangi n un te aomata anne. E tua bwa e na bwaka te ai mai karawa bwa e na kabueka te burabeti ma ana auti. Ma bon akea mwakan te aomata anne mai roun te Atua. Bon akea te ai ae bwaka mai karawa.
Iesu e angan Ioteba Timiti te kaotioti ae taekaia anera. E taku Iesu bwa anera bon aomata aika tia ni maeka n te aonnaba. A tia ni mate ma n manga kautaki. Boni iai rabwataia ma irikoia ao riia.
E taku Iesu bwa Tatan e kataia ni burebureia aomata. N taai tabetai e a karaoia aomata bwa a na taku bwa te anera. E kataia ni karaoia aomata bwaa na karaoi mwakuri aika bubuaka. Ma aomata aika raoiroi a kona n ataia ngkana Tatan e kataia ni mwamwanaia.
Imwina Ioteba Timiti e tuangia aomata bwaai riki tabeua aika taekan karawa. Aomata aika kakaraoa ae raoiroi n te aonnaba a na maeka rimwi i karawa ma Iesu Kristo. A na atai bwaai ni kabane ake a reireiaki n te aonnaba i karawa.
E taku Ioteba Timiti bwa ana tua ni kabane te Atua a bon karaoaki i karawa imwain rokora nakon te aonnaba. Bon iai te kakabwaia ae kaineti nakon te tua teuana. Ti riai n ongeaba nakon taian tua bwa ti aonga n anganaki te kakabwaiaki.
E taekina taekan Iesu Kristo Ioteba nakoia Kain te Aro ma Tamara Are I Karawa. Iesu ai aron taraan te mwa E maeka i aon te aonnaba. E mate ao e a manga kautaki. Boni iai rabwatana ae iai irikona ma riina.
Tamara Are I Karawa boni iai rabwatana ma irikona ao riina. E maeka n te tabo ae moan te raneanea ma n tikiraoi.
D&C 130:7, 22; Abraham 3:4
E taku naba Ioteba Timiti bwa te Tamnei Ae Raoiroi bon te tamnei. Bon akea rabatan Te Tamnei Ae Raoiroi ma irikona ao riina.