“Mwakoro 45: Aomata Aika Taan Kakiriwe i Missouri 1833,” Te Boki Wareware n Tuua ma Berita (2002), 167–72
“Mwakoro 45,” Te Boki Wareware n Tuua ma Berita, 167–72
Mwakoro 45
Aomata Aika Taan Kakiriwe i Missouri
(1833)
Tabeman mai ibuakoia Kain te Aro a maeka n are Raroa i Maeao i Missouri. Ioteba Timiti e maeka ikanne. A bon kukurei aomata. A katei mwengaia ma aia reirei aika raraoi.
Ma e aki rangi ni maan te rau nakoia Kain te Aro. Aomata aika buakaka a karaoi mwakuri aika a na aki rau iai. A taekin rongorongo aika kairua ibukia Kain te Aro. A taekin bwaai aika bubuaka ibukia taan kairiri n te Ekaretia.
A ikotaki aomata aika buakaka ma n iangoi mwakuri aika a na kammarakaki iai Kain te Aro.
Aomata aika buakaka aikai a karaoi mwakuri aika bati aika bubuaka. A kakioia nako Kain te Aro mai i nanon mwengaia.
A kaurarakei mwengaia ma ni urui aia tabo n ununiki.
A oreaki mwaane ma n karinaki tabeman n auti ni kaikain.
Aomata aika bubuaka aikai a karaoi mwakuri aika aki riai nakoia aine ma n kamateia tabeman.
Tabeman Kain te Aro a maeka n te kawa ae Haun‘s Mill. N te bong teuana a mwakuri tabeman inanon aia marae. Tabemang a mwakuri inanon mwengaia. A roko aomata akana buakaka akanne ma n ninia nako.
Tabeman Kain te Aro a birinakon auti aika kateaki ni mwakoro ni kai aika bubura. A kati aomata aika buakaka akanne imarenan bwangabwangan aon te auti.
Teuare Boggs bon te kowana i Missouri. Aomata aika bubuaka a taekin karaki aika kairua nakoina ibukia Kain te Aro.
E a tuangia tautia te Kowana ae Boggs bwa a na tiringia Kain te Aro ngkana aaki kitana Missouri. A kukurei aomata aika bubuaka n aei. A karaoi mwakuri riki tabeua aika buakaka. E bon aki tukia te kowana ngkai a karaoi mwakuri akanne.
Aomata aika bubuaka a tiringia Kain te Aro aika karabaia. Tabeman ataei a katiaki ma n tiringaki.
Imwina aomata aika bubuaka a iraei bwain te auti ma aia kaa ake a katikitikaki irouia aoti. Kain te Aro. A tiringaki mwaane aika bati. Aine ma ataei a tiku n ti ngaia.
Tautia tabeman imwina a taua Ioteba Timiti ma taan kairiri n te Aro tabeman. A tuangaki tautia bwa a na katia Ioteba ma rao raona.
Ma mataniwia tautia e aki kan karaoa anne. E rawa ni katia Ioteba ma ake tabeman. E taku bwa bon te mwakuri n tiriaomata.
A karinaki Ioteba ma raoraona irouia tautia n te auti ni kaikain. A kabaeaki n taurekereke irouia taan tantani. E rangi ni kamariri nanon te auti n kaikain. A wene Ioteba ma raoraona ni matu i aon tano ae mwaitorotoro.
Taan tantani bon aomata aika buauaka. A tatabora ma n taekin rongorongo aika rangi ni bubuaka. A taekina aron aia mwakuri n ira ma n tiritiri nakoia Kain te Aro.
E rangi n riba are a taekinna Ioteba. E a bon aki manga tangiria n ongo. E a teirake man tuangia bwa n aran Iesu Kristo a riai ni katoka are a karaoia. E taku, “Katokia! Bwa kam rawa ke I rawa ni mate n te tai naba aei.” A maaku taan tantani. A tuanga Ioteba kabwaran aia bure. A tekateka n maninganingan te auti ma n aki kakarongoa.
Brigham Young bon temanna mai irouia Abotoro. E a tuangia Kain te Aro bwa a na bane n roko n te botaki are a karaoia n te tai ae mena iai, Ioteba n te auti n kaikain. E a tuangia Kain te Aro bwa riai ni kitana Missouri. Mwaitia Kain te Aro akea aia mwane ma n kananoanga. Ai akea aia kaa are a na toka iai ma aia aoti. N tain te botaki a taku mwaane bwa a na buokia Kain te Aro ake a kainnano man kananoanga n te mwananga.
Kain te Aro a kitana Missouri. Bon bongin tain te kamwaitoro ao e korakora te kamariri. Aomata aika bubuaka a kataia n kammarakia. Aomata aika bubuaka a kimoai aia aoti ma aia kao Kain te Aro.
A nako Kain te Aro nakon te tabo ae Quincy n te kawa ae Illinois. Kain te kawa ae Quincy a rangi n akoi nakoia.
Te Kowana are Boggs ma raoraona a kukurei bwa nako Kain te Aro. Ti nikiraia Kain te Aro n tiku ake a kainaki n te auti n kaikain i Missouri.