“Mwakoro 5: Ioteba Timiti ao Oliver Cowdery: Beberuare–Eberi 1829,” Te Boki Wareware n Tuua ma Berita (2002), 22–25
“Mwakoro 5,” Te Boki Wareware n Tuua ma Berita, 22–25
Mwakoro 5
Ioteba Timiti ao Oliver Cowdery
(Beberuare–Eberi 1829)
Ioteba ma Emma Timiti a maeka n te o-n-aroka ae uakaan ma Harmony, Pennsylvania ao ikanne are a kawaraki iai iroun taman Ioteba. A kukurei ni manga noria. Taman Ioteba bon te aomata ae raoiroi.
Inanon te tai naba anne ao e anganaki Ioteba te kaotioti teuana are e kaineti nakon tamana ao n te kaotioti aio e a kaotaki iai bwa a na kanga aomata ni buoka ao n tangira Iesu. E kaotaki naba iai bwa a na riai aomata ni mwakuri korakora ibukin kabutan te euangkerio. A na riai naba ni itangitangiri imarenaia ao man ibuobuoki naba nakoia tabeman.
Aomata ake a kan riki ni mitinare ibukin buokan Iesu ana riai ni wanawana ao ma n kamatebwai ao man iai naba aia onimaki ao ma n bwaina te tataro. E taku Iesu bwa aomata ake a buokia a na bon kakabwaiaki.
Imwin tabeua te tai ao e a okira mwengana tamana Ioteba ao ikekei e a kataia iai ni karaoi bwaai ake a tia tuangnga Iesu bwa e na karaoi.
Iai ana mwakuri Ioteba ae e na riai ni karaoi n ana o-n-aroka. I rarikin anne ao e na riai naba n rairi karaki ake i aon raurau koora. A rang n uaatao ma ni bati ana mwakuri ao e a tataro ni butia te Atua buokana.
E a kaboaki ana tataro iroun te Atua are a kanakoa te aomata ae arana Oliver Cowdery. Teuaei e kan ataa rongorongon taian raurau ake koora ao e a tuangaki iroun Ioteba taekaia ao taekan naba Moroni. E tuangaki naba Oliver iroun Ioteba taekan te Boki ni Moomon.
E kakoauaki Ioteba iroun Oliver ao e taku bwa e na buoka Ioteba n rairii kanoan raurau ake taian koora. Ma ngaia are Ioteba e a wareki karaki akanne ni kabaibatii bwanana ao Oliver e a korei i aon te beba a rangi korakora aia mwakuri Ioteba ma Oliver n te tai aei.
A bati bwaai aika reireiaki iai Ioteba ma Oliver iroun Iesu n aron ae tuangia bwa a na aki tangira te kaubwai. A na riai naba n ata te Atua ao a na riai ni buokia aomata n ataa te euangkerio ao ma ni iai aia ommaki ao ni karaoi bwaai tabeua bwa ngkana a karaoa anna ao a na maeka ma tamaia arei karawa n taai nako.
E taku naba Iesu bwa Oliver e na riki bwa raraon Ioteba n taai nako ao ma n buoka Ioteba naba. E taku naba Iesu bwa e na riai Oliver n rabakau n rairairi naba n ai aron Ioteba. Aio e na buokaki iai iroun te Tamnei ae Raoiroi are e na buokia ni wareki taeka inanon te Boki ni Moomon. Ma e na riai moa ni iai te onimaki irouna ao ni iangoi bwa tera nanona.
E a kataia Oliver ni karaoi rairairi tabeua. E taku bwa te bwai ae e na bebete ao e aki iangoi raoi nanon taian taeka bwa e tangira te Atua bwa e na tuangnga nanon taeka akekei. E kunea bwa e bon aki kona n rairairi.
Ma imwin anne ao e a bon aki manga raira riki te Boki ni Moomon Oliver. E a manga bon ti karaoaki te rairairi iroun ti Ioteba ao Oliver e bon korei i aon te beba. E a tuangaki naba Oliver iroun Iesu bwa e na keiaki ma te korakora ngkana e buoka Ioteba bwa ngkana e karaoa anne ao e na reke te kakabwaia irouna.
E taku Iesu bwa Oliver e aki butia te Atua aron buokana n te kawai ae eti ma ngaia are Iesu e tuanga Ioteba Timiti bwa tera te anga are e na rinanona Oliver ma aomata ni kabane ngkana a tangira buokaia mai roun te Atua.
Ngkana a tangira buokaia aomata ao a na riai n iangoia moa bwa tera are ana karaoia ao ni iangoia naba bwa tera ae eti ae riai ni karaoaki.
Ao imwina anne ao a na butia te Atua bwa eti are a karaoia ke e aki ao ngkana eti ao a na iai te kaantaninga ae raoiroi nanoia ao ngkanne a na ataia bwa e bon eti are a karaoia.
Ngkana e kairua are a karaoia ao a na akea te kaantaninga ae a na namakinna inanoia.