“Mwakoro 31: Te Taeka n Wanawana: Beberuare 1833,” Te Boki Wareware n Tuua ma Berita (2002), 119–22
“Mwakoro 31,” Te Boki Wareware n Tuua ma Berita, 119–22
Mwakoro 31
Te Taeka n Wanawana
(Beberuare 1833)
Ioteba Timiti e a kateirakea te reirei ibukia mwanne n te Ekaretia. E aranaki bwa te reirei ibukia Burabeti.
Te reirei e karaoaki n te ru teuana inanon ana titoa teuare Newel Whitney n te tabo ae Kirtland i Ohio. Ioteba e reireia mwaane taekan te Ekaretia. E reireia taekan te nakoa n ibonga ao taekan reirei aika bou.
Angia mwaane a moko baibu ke ni moko tika. E onrake te ru n te bubu. Tabeman mwaane a bwaronria te baake. E a barekareka nanon te auti. Te ru e a tangira kaitiakana ngke a okira mwengaia mwaane akanne.
Bun Ioteba are Emma e a riai ni kaitiaka nanon te ru ni katoa te botaki are kakaraoaki. E mimi Ioteba ngkai a kona ni kan moko ma n bwaronria te baake.
Ioteba e a tataro nakon te Atua ma n butia bwa e nga ae riai n karaoaki. Iesu e angan Ioteba te kaotioti. E aranaki bwa te Taeka ni Wanawana. E taku Iesu bwa aomata tabeman a karaoi mwakuri aika bubuaka. A tangiria aomata tabeman bwa a na karaoi mwakuri aika a aki raraoi ibukin rabwataia. N te Taeka ni Wanawana Iesu e tuangia Kain te Aro bwaai aika raraoi aika riai nakon rabwataia. E tuangia bwaai aika bubuaka ibukin rabwataia. Kain te Aro ana kakabwaiaki ngkana a ongeaba nakon te Taeka ni Wanawana.
E taku Iesu bwa nimakin ninima aika iai te arekoro iai e aki raoiroi i.bukia aomata. A riai n aki kamanenai moi aika iai arekoro iai. E riai ni kamanenaki te arekoro ti itinanikun te rabwata.
E taku Iesu bwa aki riai aomata ni kabongana te baake. A riai n aki moko tikareti, tika, ke baiti. A riai n aki baronria te baake. Te baake ti aki ibukin te nabwata ao e aki raoiroi ibukin te aomata, anne ana taeka Iesu.
E taku Iesu bwa Kain te Aro a riai n aki moi n ninima aika kabuebue. Te ii ao te kobe bon mooi aika kabuebue. A aki raoiroi ibukin te rabwata.
E taku Iesu bwa a mwaiti aroka ma maan aika raoiroi ibukia aomata bwa a na kang. A riai aomata ni karabwa Tamara Are I Karawa ibukin amwarake aika raraoi.
E taku Iesu bwa aaki riai aomata ni kabatia kanakin irikoia maan. A riai ni kang irikon maan ngkana e a roko tain te kamwaitoro. A riai ni kang irikon maan ngkana e aki tau mwaitin amwarake ake a kona ni bon karekeaki.
E taku te Uea bwa kwa karaoan kaai nako a raraoi ibukin rabwatara. Tabeua aekan kai n amwarake akanne te wiita, te raiti, te koon, ma te outi. E bon rangi n tamaroa te wiita ibukira. Taian uaan kai ma aekan kain amwarake riki tabeua a raraoi ibukia aomata.
E taku Iesu bwa Kain te Aro ni kabane a riai n ongeaba nakon te Taeka ni Wanawana. Ngkanne e kona te Atua ni kakabwaiaia. A na rangi ni marurung raoi. A na wanawana. A na kona n rabakau bwaai riki tabeua. A na kakabwaiaki ngkana a kang amwarake aika katauaki.