“Mwakoro 2: Te Moan Kaoti Nakon Ioteba Timiti: 1820,” Te Boki Wareware n Tuua ma Berita (2002), 9–12
“Mwakoro 2,” Te Boki Wareware n Tuua ma Berita, 9–12
Mwakoro 2
Te Moan Kaoti Nakon Ioteba Timiti
(1820)
Ioteba Timiti ma ana utu a bon kakoaua te Atua ao a ikokotaki ni wawareka te Baibara. Taman Ioteba ma tinana a reireinia natia bwa a na raoiroi.
A rangi ni mwaiti taian aro i Palmyra. A bane n taku ba bon koaua ma aro nako irouia. A taku bwa aki koaua aro ake tabeua. E aki ataia Ioteba e nga te Aro are e na kainna. E ngae n anne ao e bon kan ataia bwa e nga ana aro Iesu Kristo ae bon te koaua.
N te bong teuana ao e a wareware n te Baibara Ioteba. Ai ana ririki n te tai aei. E tabe ni wareka are ngkana ti kan ata te koaua ao ti na bon tuanga te Atua. Bwa e na kaotia. E a moanna n tataro ao ma n butia bwa e nga te aro are e na kainna.
N te bong teuana ae moan te tikiraoi ao e a nako Ioteba nakon te buakonikai irarikin ana auti. E katorobubua ae e a kabaibati n tataro. Iai ana onimaki bwa e na bon tabe ni kaeka ana tataro Tamana are i Karawa.
Ma Tatan e aki tangira Ioteba bwa e na tataro ao e kataia ni katoka ana tataro ao ma ni katobibia Ioteba n te ro. E aki kona n taetae ao e a maaku.
Ma e ngae n anne ao e bon aki toki ana tataro Ioteba. E bon aki kona ni katokia Tatan.
Ma imwin anne ao e a roko te kaoti nakon Ioteba. E nora te ota ae moan te itiaki ao e a otabwaniniaki n te ota anne. E a n ora Tamara are i Karawa ao Iesu Kristo. A tei i aona n te ota anne ao Tamara are i Karawa e a kotea Iesu Kristo ao e kangai, “Aio Natiu ae moan te tangiraki. Ongora irouna.”
Ioteba e a titirakina Iesu bwa e nga te aro ae koaua. E tuatua naba bwa e nga te aro are e na kainna ma e tuangaki iroun Iesu bwa akea te aro are e na iria. E taku Iesu bwa a bane ni bure ao bon akea mai ibuakoia ae ana aro. E tuanga naba Ioteba bwaai riki aika bati. E a bua te kaoti nakoina ao e a tiku Ioteba n ti ngaia.
E a okira mwengana Ioteba. E a titirakinna tinan bwa e uara ao e taku bwa e marurung. E tuanga tinana bwa iai te kaoti nakoina ae noria. E kaotia naba nakon tinana bwa tera are e ataia man te kaoti nakoina anne.
Ioteba e a tuangia aomata tabeman n te kawa rongorongon te kaoti are e noria ao e bon aki kakoauaki irouia aomata. A taku bwa e kewe ao a un nakoina ao ma n riribaia.
Ma Ioteba e bon aki toki n kaota te koaua ibukin te kaoti are e noria. E bon ataia bwa e a tia n nora Tamara are i Karawa ao Iesu Kristo. E ataia naba bwa bon akea te aro teuana n te aonnaba aei ae koaua.