“Natanggap nina Joseph at Oliver ang mga Susi ng Priesthood,” Mga Kuwento sa Doktrina at mga Tipan (2024)
“Natanggap nina Joseph at Oliver ang mga Susi ng Priesthood,” Mga Kuwento sa Doktrina at mga Tipan
Abril 1836
Natanggap nina Joseph at Oliver ang mga Susi ng Priesthood
Binisita ni Jesucristo at ng mga anghel ang Kirtland Temple
Isang linggo matapos ilaan ang Kirtland Temple, isang libong Banal ang nagtipon sa templo upang sambahin ang Tagapagligtas. Linggo ng Pasko ng Pagkabuhay noon. Sina Joseph Smith, Oliver Cowdery, at ang Labindalawang Apostol ay nagbigay ng sakramento sa mga Banal.
Doktrina at mga Tipan 110, section heading; Mga Banal, 1:274
Pagkatapos ng sakramento, nakahanap sina Joseph at Oliver ng tahimik na dako sa templo, sa likod ng kurtina, para manalangin.
Doktrina at mga Tipan 110, section heading; Mga Banal, 1:274
Nang matapos silang manalangin, tumingala sila. Si Jesucristo ay nakatayo sa harap nila! Alam Niya na pinaghirapan ng mga Banal na itayo ang templo. “Tinanggap ko ang bahay na ito,” sabi Niya. Sinabi ni Jesus kina Joseph at Oliver na magdudulot ng malaking kagalakan sa maraming tao ang mga pagpapala ng templo.
Doktrina at mga Tipan 110:1–10
Pagkaalis ni Jesus, nagpakita ang propetang si Moises ng Lumang Tipan kina Joseph at Oliver. Ibinigay niya sa kanila ang mga susi ng priesthood sa pagtitipon ng Israel. Ibig sabihin nito, maaari nilang pamunuan ang gawain ng pagbabahagi ng ebanghelyo. Maaari silang magpadala ng mga missionary sa iba’t ibang panig ng mundo upang dalhin ang mga tao sa Simbahan ng Tagapagligtas.
Pagkatapos, nagpakita ang propetang si Elias. Ibinigay niya kina Joseph at Oliver ang mga susi sa pagpapanumbalik ng tipang Abraham. Ibig sabihin nito, matatanggap ng mga Banal mula sa Panginoon ang tipang natanggap ni Abraham. Magkakaroon sila ng kakayahang ihatid ang ebanghelyo at ang mga pagpapala ng Diyos sa mga tao sa lahat ng dako sa loob ng maraming taong darating.
Sa huli, nagpakita ang propetang si Elijah. Ibinigay niya kina Joseph at Oliver ang mga susi ng priesthood para ibuklod, o pag-isahin, ang mga pamilya hanggang sa kawalang-hanggan. Ang gawaing isinasagawa ng mga Banal sa mga templo ay tatanggapin sa langit. Ngayon, ang Simbahan ay may kapangyarihang isagawa ang gawain ng Tagapagligtas at maghanda para sa Kanyang muling pagparito sa lupa.