Pagtitipon sa Ohio

Ang pananampalataya ni Lucy Smith at isang himala

Si Lucy Smith at mga miyembro ng pamilya na naghahandang lumipat sa Ohio.

Sa Ohio, dumami ang mga taong sumasapi sa Simbahan. Sinabi ng Panginoon kay Joseph Smith na ang mga Banal na naninirahan sa ibang lugar ay dapat magtipon sa Ohio. Mahabang paglalakbay iyon. Ngunit nangako ang Panginoon na matapos silang magtipon, ituturo Niya sa mga Banal ang Kanyang batas at pagpapalain sila ng kapangyarihang gawin ang Kanyang gawain.

Doktrina at mga Tipan 37; 38:32; Mga Banal, 1:124–26

Si Lucy at iba pang mga manlalakbay na nakasakay sa isang barko patungo sa Ohio.

Nilisan ng ina ni Joseph na si Lucy at ng mga 80 miyembro ng Simbahan ang kanilang tahanan sa New York at lumipat sa Ohio. Sumakay sila sa isang barko na magdadala sa kanila sa isang bahagi ng kanilang paglalakbay. Pagkatapos nilang maglakbay ng ilang araw, kinailangang huminto ang barko. Makapal na yelo sa tubig ang nakaharang sa kanilang dadaanan.

Mga Banal, 1:138–40

Ang barko na nahaharangan ng yelo sa daungan.

Kinailangang hintayin ng mga Banal na mabitak ang yelo. Sila ay pagod, gutom, basa, at giniginaw.

Mga Banal, 1:139–40

Ilan sa mga Banal ang nawalan ng pasensya at nagsimulang makipagtalo.

Mahirap maghintay. Ilan sa mga Banal ang nagsimulang makipagtalo sa isa’t isa.

Mga Banal, 1:139–40

Sinasabihan ni Lucy ang mga Banal na manalangin sa Diyos na mabitak ang yelo sa daungan.

Ayaw ni Lucy na marinig na nagtatalo ang mga Banal. Alam niya na kailangan niyang magsalita. “Nasaan ang inyong pananampalataya?” tanong niya. Sinabi ni Lucy sa mga Banal na kung magdarasal sila sa Diyos, mabibitak ang yelo para maipagpatuloy nila ang kanilang paglalakbay.

Mga Banal, 1:139–40

Nagkaroon ng awang sa yelo na madadaanan.

Bigla silang nakarinig ng ingay na parang kulog habang nabibitak ang yelo. Nagkaroon ng awang sa yelo, na sapat ang lapad para makadaan ang barko.

Mga Banal, 1:140

Mga Banal na nagsama-sama para magpasalamat sa Ama sa Langit.

Namangha at nagpasalamat ang mga Banal. Nagsama-sama sila para manalangin at magpasalamat sa Ama sa Langit. Ang kanilang barko ay ligtas na naglakbay patungo sa Ohio.

Mga Banal, 1:140

Mga Banal na masayang sinalubong sa Ohio.

Nang makarating ang mga Banal sa Ohio, sinalubong sila ng mga miyembro ng Simbahan doon at tinulungan silang makahanap ng matitirhan. Tinupad ng Panginoon ang Kanyang pangako na ituturo sa kanila ang Kanyang batas at bibigyan sila ng kapangyarihang gawin ang Kanyang gawain.

Doktrina at mga Tipan 42; Mga Banal, 1:144