“Sidney at Phebe Rigdon,” Mga Kuwento sa Doktrina at mga Tipan (2024)
“Sidney at Phebe Rigdon” Mga Kuwento sa Doktrina at mga Tipan
Oktubre–Nobyembre 1830
Sidney at Phebe Rigdon
Pagbabago ng kanilang buhay para tanggapin ang ebanghelyo
Si Parley Pratt at ang iba pa ay magbabahagi ng ebanghelyo sa mga Katutubong Amerikano. Sa kanilang paglalakbay, nais ni Parley na huminto at bisitahin ang kanyang kaibigang si Sidney Rigdon. Si Sidney ay isang mangangaral na nagturo kay Parley tungkol kay Jesucristo sa Biblia. Ngayon ay gustong ituro ni Parley kay Sidney ang tungkol kay Jesus sa Aklat ni Mormon.
Doktrina at mga Tipan 32; Mga Banal, 1:113
Ikinuwento ni Parley kay Sidney ang tungkol sa Aklat ni Mormon at inanyayahan siyang basahin ito. Hindi sigurado si Sidney, pero dahil kaibigan niya si Parley, nangako siyang gagawin niya ito.
Mga Banal, 1:115
Nang basahin ni Sidney ang Aklat ni Mormon, alam niyang nagmula ito sa Diyos. Sinabi niya ang nadama niyang ito sa kanyang asawang si Phebe.
Mga Banal, 1:115
Pero hindi sigurado si Sidney sa susunod na gagawin. Kung magpapabinyag siya, mawawalan siya ng trabaho bilang mangangaral sa kanilang simbahan. Paano niya itataguyod si Phebe at ang anim nilang anak? Ano ang mararamdaman ng mga tao sa kanyang simbahan? Nanalangin siya sa Ama sa Langit para humingi ng tulong, at nakadama siya ng kapayapaan.
Mga Banal, 1:115; Doktrina at mga Tipan 19:23
Tinanong ni Sidney si Phebe kung handa siyang talikuran ang kanilang komportableng buhay at sumapi sa bagong simbahan na ito kasama niya. “Nais kong gawin ang kalooban ng Diyos,” sabi niya, “sa buhay man o sa kamatayan.” Nagpasiya silang magpabinyag.
Mga Banal, 1:115
Kalaunan, nakilala ni Sidney si Propetang Joseph Smith. Binigyan ng Panginoon si Sidney ng mensahe sa pamamagitan ni Joseph. Sinabi Niya na nakita Niya ang magagandang bagay na ginawa ni Sidney at narinig Niya ang mga panalangin nito. Sinabi ng Panginoon kay Sidney na may dakilang gawain Siya na ipagagawa rito. Maraming dakilang bagay ang gagawin ni Sidney.