ពរជ័យនៃការឈានទៅមុខ
ការរស់នៅជាសមាជិកស្មោះត្រង់នៃសាសនាចក្រនាំមកនូវពរជ័យដ៏អស្ចារ្យ ។ ប៉ុន្តែនោះពុំមានន័យថា ជីវិតនឹងពុំមានការលំបាកម្តងម្កាលនោះទេ ។ ការល្បួង មិត្តភក្ដិដែលពុំមានចិត្តស្មោះត្រង់ បញ្ហាក្នុងគ្រួសារ អ្នកអាចនិយាយរៀបរាប់ជាច្រើន ។ មានរឿងជាច្រើនដែលវានឹងព្យាយាមទាញអ្នកឲ្យចេញពីផ្លូវនៃសេចក្ដីសញ្ញា ។
នោះជាមូលហេតុដែលបាវចនាម៉្ញូឆលឆ្នាំនេះគឺ « ឈានទៅមុខដោយខ្ជាប់ខ្ជួននៅក្នុងព្រះគ្រីស្ទ » ( នីហ្វៃទី ២ ៣១:២០ ) មាននូវសារលិខិតដ៏មានអានុភាពដូច្នេះ ។ នៅពេលអ្នកឈានទៅមុខដោយខ្ជាប់ខ្ជួននៅក្នុងព្រះគ្រីស្ទ កាន់យ៉ាងខ្ជាប់តាមសេចក្ដីសញ្ញារបស់អ្នក នោះព្រះអាចធ្វើនូវការណ៍ដ៏អស្ចារ្យសម្រាប់អ្នក និងតាមរយៈអ្នក ។ ហើយទ្រង់អាចជួយអ្នកមានអារម្មណ៍នៃសេចក្ដីសង្ឃឹម លួងលោមចិត្ត និងសុខសាន្ដនៅក្នុងពេលដំណាលគ្នា ។
វាជាអ្វីមួយដែលព្យាការី យ៉ូសែប ស៊្មីធ បានដឹងយ៉ាងច្បាស់ ។ លោកទើបតែមានអាយុ ១៤ ឆ្នាំប៉ុណ្ណោះ ពេលលោកទទួលបានការនិមិត្តដំបូង ។ នៅពេលលោកលុតជង្គង់ចុះអធិស្ឋាននៅក្នុងព្រៃពិសិដ្ឋ លោកត្រូវបានវាយប្រហារដោយថាមពលដែលមើលមិនឃើញមួយ ដែលមានអំណាចដ៏ធំអនេក ដែលវាបានគំរាមកំហែងចង់បំផ្លាញលោកចោល ។ មានតែតាមរយៈការខិតខំដោយអស់ពីសមត្ថភាពរបស់លោក ដើម្បីទទូចអង្វរទៅព្រះទេ ទើបលោកត្រូវបានជួយសង្គ្រោះ ហើយបានទទួលនូវការយាងមកជួបពីព្រះវរបិតា និងព្រះរាជបុត្រា ។
ក្រោយមកទៀត នៅពេលយ៉ូសែប បានចែកចាយបទពិសោធន៍របស់លោក លោកក៏ត្រូវបានមិត្តភក្ដិ និងអ្នកដឹកនាំក្នុងមូលដ្ឋានសើចចំអកដាក់លោក ( សូមមើលយ៉ូសែប ស្ម៊ីធ — ប្រវត្តិ ១: ១៥–១៧, ២១–២៦ ) ។ សេចក្ដីបៀតបៀននោះពុំបានបញ្ចប់ឡើយ ហើយនៅទីបំផុត វាបានដកយកជីវិតរបស់លោកនៅរយៈពេល ២៤ ឆ្នាំក្រោយមក ។
ប៉ុន្តែយ៉ូសែប បានឈានទៅមុខដោយក្ដីសង្ឃឹម ហើយលោករីករាយដើម្បីធ្វើដូច្នោះនៅក្នុងការបម្រើព្រះអម្ចាស់ ។ នៅពេលលោកបន្ដខ្ជាប់ខ្ជួននៅក្នុងព្រះគ្រីស្ទ ហើយអនុវត្តសេចក្ដីជំនឿដើម្បីធ្វើអ្វីដែលត្រឹមត្រូវ នោះព្រះបានប្រទានពរ ហើយគាំទ្រដល់លោក ។ ហើយទ្រង់នឹងធ្វើដូចគ្នាចំពោះអ្នក ។
ដូច្នេះចូរឈានទៅមុខ ។ តាំងចិត្តរស់នៅតាមដំណឹងល្អ ។ ចូរអ្នកសម្លឹងដោយមុតមាំទៅលើព្រះអង្គសង្គ្រោះជានិច្ច ។ « ដោយមានការភ្លឺថ្លានៃសេចក្ដីសង្ឃឹមដ៏ឥតខ្ចោះ ហើយដោយមានចិត្តស្រឡាញ់ព្រះ និងមនុស្សគ្រប់រូប » ។ « [ ទទួលទាន ] នូវព្រះបន្ទូលទាំងឡាយនៃព្រះគ្រីស្ទ » ។ បម្រើនៅក្រោមការដឹកនាំរបស់បព្វជិតភាព ។ ព្យាយាមធ្វើនូវអ្វីដែលព្រះសព្វព្រះទ័យឲ្យអ្នកធ្វើ ។
នៅពេលអ្នកឈានទៅមុខ ធ្វើ និងរក្សាសេចក្ដីសញ្ញាទាំងឡាយនៅលើមាគ៌ានៃជីវិតអស់កល្បជានិច្ច នោះយើងសូមថ្លែងទីបន្ទាល់ថា អ្នកនឹងរកឃើញសុភមង្គល ។