តើការសិក្សារបស់ខ្ញុំបានគ្រប់គ្រាន់ឬទេ ?
អ៊ែនជី នីកូឡាស រដ្ឋ តិចសាស ស.រ.អា
ខ្ញុំបានអានព្រះគម្ពីរមរមនប្រចាំថ្ងៃដោយសេចក្ដីជំនឿ ចាប់តាំងពីខ្ញុំនៅជាយុវវ័យមកម្ល៉េះ ។ ទោះជានៅយប់ដែលខ្ញុំដេកលក់ទាំងអស់កម្លាំង ហើយបានដឹងថា ខ្ញុំពុំបានអានព្រះគម្ពីរនៅថ្ងៃនោះ នោះខ្ញុំនឹងលើកគម្ពីរឡើងអានឲ្យបានយ៉ាងហោចណាស់ពីរបីខដែរ ។
ពីរឆ្នាំកន្លងទៅ ខ្ញុំត្រូវបានសុំឲ្យបង្រៀនគម្ពីរសញ្ញាចាស់ នៅក្នុងថ្នាក់សិក្ខាសាលាពេលព្រឹកព្រលឹម ។ ខ្ញុំពុំសូវស្គាល់គម្ពីរសញ្ញាចាស់ដូចគម្ពីរផ្សេងៗទេ ដូច្នេះថ្ងៃខ្លះ ខ្ញុំបានចំណាយពេលបីទៅបួនម៉ោងដើម្បីសិក្សា និងរៀបចំមេរៀនរបស់ខ្ញុំ ។ ដោយសារតែខ្ញុំបានចំណាយពេលច្រើនសិក្សាព្រះគម្ពីរប៊ីប និងវិវរណៈថ្ងៃចុងក្រោយ នោះខ្ញុំបានឈប់អានព្រះគម្ពីរមរមនប្រចាំថ្ងៃ ។ យើងបានអានវាជាគ្រួសារនៅពេលយប់ ហើយខ្ញុំនឹងប្រើវាសម្រាប់សេចក្ដីយោងខគម្ពីរម្ដងម្កាល ដូច្នេះខ្ញុំមានអារម្មណ៍ថា ខ្ញុំបានសិក្សាដំណឹងល្អប្រចាំថ្ងៃគ្រប់គ្រាន់ហើយ ។
នៅពាក់កណ្ដាលឆ្នាំសិក្សានៅខែមករា ប្រធានស្ដេករបស់ខ្ញុំ បានសំណូមពរដល់ស្ដេកទាំងមូលឲ្យអានគម្ពីរមរមនមួយជំពូកជារៀងរាល់ថ្ងៃ ។ ទោះជាខ្ញុំបានងឿងឆ្ងល់ថា តើខ្ញុំនឹងរកពេលយ៉ាងណាដើម្បីសិក្សាសម្រាប់ថ្នាក់សិក្ខាសាលាដ៏ច្រើនរបស់ខ្ញុំក្ដី ក៏ខ្ញុំបានសម្រេចចិត្តថាខ្ញុំគប្បីទទួលយកសំណូមពរនោះដែរ ។ ខ្ញុំចាំបាច់ត្រូវធ្វើវា ពុំគ្រាន់តែដើម្បីពង្រឹងខ្លួនខ្ញុំនោះទេ ប៉ុន្តែក៏ដើម្បីធ្វើជាគំរូដល់កូនៗ និងសិស្សរបស់ខ្ញុំផងដែរ ។
ចាប់តាំងពីគ្រានោះមក ខ្ញុំបានអានព្រះគម្ពីរមរមនមួយជំពូកជារៀងរាល់ថ្ងៃ នៅពេលខ្ញុំចាប់ផ្ដើមរៀបចំមេរៀនថ្នាក់សិក្ខាសាលារបស់ខ្ញុំ ឬនៅពេលខ្ញុំហៀបនឹងចូលដេក ។ អារម្មណ៍ និងអំណាចមួយ ដែលខ្ញុំពុំដឹងថាវាបានបាត់បង់ បានត្រឡប់មកក្នុងជីវិតរបស់ខ្ញុំវិញ ។ មេរៀនថ្នាក់សិក្ខាសាលារបស់ខ្ញុំ ដែលខ្ញុំបានធ្វើយ៉ាងល្អ នោះបានប្រែក្លាយទៅជាកាន់តែល្អប្រសើរឡើង ។ ចំណុចជាច្រើនក្នុងព្រះគម្ពីរសញ្ញាចាស់ ដែលពិបាកយល់ បានក្លាយទៅជាកាន់តែច្បាស់ឡើងវិញ ។ ខ្ញុំក៏បានដឹងផងដែរថា ខ្ញុំបានយល់ព្រះគម្ពីរមរមនល្អប្រសើរ ជាលទ្ធផលមកពីការសិក្សាដ៏មុតមាំដែលខ្ញុំបានសិក្សាអំពីពួកព្យាការីទាំងឡាយ និងក្រឹត្យវិន័យរបស់ម៉ូសេ ។
អារម្ភកថាអំពីព្រះគម្ពីរមរមន មានរួមបញ្ចូលទាំងពាក្យដកស្រង់នេះ ចេញមកពីព្យាការី យ៉ូសែប ស៊្មីធ ៖ « ខ្ញុំបានប្រាប់បងប្អូនទាំងឡាយ ថាព្រះគម្ពីរមរមន គឺជាគម្ពីរដ៏ត្រឹមត្រូវបំផុតជាងគម្ពីរនានាទាំងអស់នៅលើផែនដីនេះ ហើយជាមូលដ្ឋាននៃសាសនាចក្ររបស់យើង ហើយបុគ្គលម្នាក់ៗអាចចូលទៅជិតព្រះបាន ដោយសារធ្វើតាមសិក្ខាបទទាំងឡាយនៃគម្ពីរនេះ ជាជាងគម្ពីរដទៃទាំងអស់ » ។
ព្រះគម្ពីរមរមន មាននូវផ្នែកទាំងអស់នៃដំណឹងល្អ ហើយមាននូវទីបន្ទាល់ដ៏មានអានុភាពអំពីព្រះយេស៊ូវគ្រីស្ទ និងផែនការនៃសេចក្ដីសង្គ្រោះ ។ វាជួយធ្វើឲ្យអ្វីៗផ្សេងទៀតនៅក្នុងជីវិតរបស់ខ្ញុំ មានន័យ ។ ខ្ញុំមានអំណរគុណចំពោះព្រះគម្ពីរមរមន ជាចំណែកនៃជីវិតប្រចាំថ្ងៃរបស់ខ្ញុំ ។