Bili nga dili Masukod
Makatagamtam kita sa maanindot nga mga hunghong sa Espiritu Santo nga nagsulti sa kamatuoran sa atong espirituhanong bili.
Samtang nagbisita sa nasud sa Sierra Leone sa West Africa, miapil ko sa miting nga gipahigayon sa stake Primary leader. Si Mariama migiya uban sa gugma, grasya, ug pagsalig nga morag dugay na siyang miyembro sa Simbahan. Apan si Mariama, bag-o pa nga nakabig.
Ang iyang manghud nga babaye mipasakop sa Simbahan ug midapit ni Mariama sa pagtambong og klase sa Simbahan uban niya. Nadani pag-ayo si Mariama sa mensahe. Ang leksyon bahin sa balaod sa kaputli. Mihangyo siyang magpatudlo pa sa mga misyonaryo ug sa wala madugay nakadawat og pagpamatuod ni Propeta Joseph Smith. Nabunyagan siya niadtong 2014, ug iyang anak nga babaye nabunyagan sa miaging bulan. Hunahunaa, ang duha ka sukaranang mga pagtulun-an nga nakakabig ni Mariama mao ang balaod sa kaputli ug si Propeta Joseph Smith, duha ka punto nga nakita sa kalibutan nga dili importante, kinaraan, o makasamok. Apan mipamatuod si Mariama nga sama siya sa aninipot nga nadani sa kahayag. Miingon siya, “Sa dihang nakaplagan nako ang ebanghelyo, nakaplagan nako ang akong kaugalingon.” Nadiskobrehan niya ang iyang bili pinaagi sa diosnong mga baruganan. Ang iyang bili isip anak sa Dios gipadayag ngadto niya sa Espiritu Santo.
Karon himamaton nato ang mga managsoong babaye nga Singh gikan sa India. Si Renu, naa sa tuo, ang una sa limang mga babaye nga mipasakop sa Simbahan, mipakigbahin niini:
“Sa wala pa ko moimbestigar sa Simbahan, wala gyud ko mobati nga espesyal ko. Usa lang ko sa daghang mga tawo, ug ang akong katilingban ug kultura wala magtudlo nako nga ako adunay bili isip indibidwal. Sa dihang nakat-unan nako ang ebanghelyo ug nakahibalo nga anak ko sa atong Lagitnong Amahan, nakapausab kini nako. Sa kalit mibati ko nga espesyal—ang Dios milalang nako ug milalang sa akong kalag ug sa akong kinabuhi nga dunay bili ug katuyoan.
“Sa wala pa ang ebanghelyo sa akong kinabuhi, naningkamot ko nga imatuod ngadto sa uban nga ako espesyal. Apan sa dihang akong nahibaloan ang kamatuoran, nga ako anak sa Dios, dili na kinahanglan nga akong imatuod ang bisan unsa ngadto ni bisan kinsa. Nasayud ko nga ako espesyal. … Ayaw gyud paghunahuna nga ikaw walay bili.”
Si Presidente Thomas S. Monson perpekto nga misulti niini sa dihang iyang gikutlo kini nga mga pulong: “Ang bili sa kalag mao ang kapasidad nga mahimong sama sa Dios.”1
Karong bag-o ako napanalanginan nga mahimamat ang batan-ong babaye kinsa nakasabut niining susamang kamatuoran. Ang iyang ngalan mao si Taiana. Nahimamat nako siya sa Primary Children’s Hospital sa Siyudad sa Salt Lake. Si Taiana usa ka junior sa high school sa dihang nadayagnos siya og kanser. Maisugon siyang nakigbisog sulod sa 18 ka bulan sa wala pa mamatay pipila ka semana na ang milabay. Si Taiana puno sa kahayag ug gugma. Nailhan siya sa iyang makatakod nga pahiyom ug sa iyang ilhanan nga “double thumbs-up.” Kon ang uban mangutana, “Nganong ikaw, Taiana?” ang iyang tubag mao, “Nganong dili ako?” Si Taiana naningkamot nga mahisama sa iyang Manluluwas, nga iyang gihigugma pag-ayo. Sa among mga pagbisita, nakat-unan nako nga si Taiana nakasabut sa iyang balaanong bili. Nakahibalo nga anak siya sa Dios nakahatag niya og kalinaw ug kaisug sa pag-atubang sa iyang grabing pagsulay sa positibo nga paagi.
Si Mariama, Renu, ug Taiana nagtudlo nato nga ang Espiritu momatuod sa matag usa nato sa atong balaanong bili. Sa tinuod ang pagkahibalo nga ikaw anak sa Dios makaapekto sa matag aspeto sa imong kinabuhi ug makagiya nimo sa pagserbisyo nga imong ihatag matag adlaw. Si Presidente Spencer W. Kimball mipasabut pinaagi niining mahimayaong mga pulong:
“Ang Dios mao ang inyong Amahan. Siya nahigugma kaninyo. Siya ug ang inyong inahan sa langit mihatag og bili ninyo nga dili masukod. … Talagsaon kamo. Walay sama, gihimo sa mahangturong salabutan nga makaangkon og kinabuhing dayon.
“Kinahanglan dili na kamo magduha-duha bahin sa inyong bili isip usa ka indibidwal. Ang tibuok tuyo sa plano sa ebanghelyo mao ang paghatag og oportunidad sa matag usa ninyo nga makaabut sa inyong hingpit nga potensyal, nga mao ang mahangturong kauswagan ug sa posibilidad sa pagkadios.”2
Tuguti ko sa pagpasabut sa panginahanglan sa paghatag og kalainan tali sa duha ka kritikal nga mga pulong: bili ug katakus. Dili kini pareha. Ang espirituhanong bili nagpasabut sa paghatag og bili sa atong kaugalingon sama sa paghatag og bili sa Langitnong Amahan, dili sama sa paghatag og bili kanato sa kalibutan. Ang atong bili natino na sa wala pa kita moanhi niini nga yuta. “Ang gugma sa Dios walay sukod ug kini mohangtud.”3
Sa laing bahin, ang katakus makab-ot pinaagi sa pagkamasulundon. Kon makasala ta, dili kaayo ta takus, apan dili gyud nga wala na tay bili! Magpadayon ta sa paghinulsol ug maningkamot nga mahisama ni Jesus uban sa atong bili nga bug-os. Sama sa gitudlo ni Presidente Brigham Young: “Ang pinakaubos, ang labing kubos nga espiritu ania na sa yuta … dunay bili sama sa mga kalibutan.”4 Bisan unsa pa, kita bililhon kanunay sa mga mata sa atong Langitnong Amahan.
Bisan pa niining talagsaong kamatuoran, pila man nato ang nakigbisog, matag karon ug unya, sa negatibo nga mga hunahuna o pagbati sa atong kaugalingon? Ako ingon ana. Sayop kini. Si Satanas mao ang amahan sa tanang mga bakak, ilabi na kon bahin sa pagtuis sa atong diosnong kinaiya ug katuyoan. Ang paghunahuna nga gipakaubos ang kaugalingon dili makaayo nato. Hinoon makapugong kini nato. Sama sa gitudlo nato kanunay, “Walay usa nga makapaubos ninyo kon kamo dili mouyon.”5 Makahunong ta sa pagkomparar sa atong abilidad ngadto sa uban. “Ang pagkomparar makapawala sa atong kalipay.”6
Sa pagtandi, misiguro ang Ginoo nga kon kita dunay mahiyason nga hunahuna, panalanginan ta Niya og pagsalig, bisan sa pagsalig nga makahibalo kinsa ta. Walay laing importante nga panahon sa patalinghug sa Iyang mga pulong. “Himoa ang hiyas nga modayan-dayan sa inyong mga hunahuna nga walay paghunong,” Miingon siya. “Unya ang imong pagsalig mosamot pagkalig-on diha sa atubangan sa Dios; ug … ang Espiritu Santo mao ang inyong kauban sa kanunay.”7
Ang Ginoo mipadayag niining dugang nga kamatuoran ngadto ni Propeta Joseph Smith: “Siya nga nakadawat sa Dios, himoa nga siya manubag niini sa Dios; ug himoa nga siya magmaya aron siya pagaisipon sa Dios nga takus sa pagdawat.”8 Kon mobati kita sa Espiritu, sama sa gipasabut niini nga bersikulo, makahibalo kita nga ang atong gibati naggikan sa atong mahigugmaong Langitnong Amahan. Moila ug modayeg kita Kaniya ug modayeg Kaniya sa pagpanalangin kanato. Dayon malipay kita nga pagaisipon nga takus sa pagdawat.
Hunahunaa nga nagbasa mo sa mga kasulatan usa ka buntag ug ang Espiritu hinay nga naghunghong ninyo nga unsay inyong gibasa tinuod. Makaila ba kamo sa Espiritu ug magmalipayon nga inyong gibati ang Iyang gugma ug takus nga modawat?
Mga inahan, tingali nagluhod kamo tupad sa inyong kwatro anyos nga anak samtang siya nag-ampo sa dili pa matulog. Usa ka pagbati ang imong gibati samtang ikaw naminaw. Gibati nimo ang kainit ug kalinaw. Mubo ra ang pagbati, apan nakahibalo ka nga ikaw nianang higayona, takus nga makadawat. Panagsa ra kita, kon duna man, makadawat og dakong espirituhanong timailhan sa atong kinabuhi; apan sa kanunay makatagamtam kita sa maanindot nga mga hunghong sa Espiritu Santo, nga nagkumpirma sa tinuod nato nga espirituhanong bili.
Mipasabut ang Ginoo sa relasyon tali sa atong bili ug sa Iyang maulaong sakripisyo sa dihang miingon Siya:
“Hinumdumi ang bili sa kalag mahinungdanon sa panan-aw sa Dios;
“Kay, tan-awa, ang Ginoo nga imong Manunubos nag-antus sa kamatayon diha sa lawas; busa siya nag-antus sa kasakit sa tanan nga mga tawo, nga unta ang tanan nga mga tawo maghinulsol ug moduol ngadto kaniya.”9
Mga sisters, tungod sa Iyang gibuhat kanato, “sa gugma niya kita bugkuson.”10 Miingon Siya, “Ang akong Amahan mipadala kanako nga Ako unta ituboy nganha sa krus; ug human niana nga Ako matuboy diha sa krus, nga Ako unta makadala sa tanan nga mga tawo ngari kanako.”11
Mipasabut usab si Haring Benjamin niining koneksyon sa pagkabugkos uban sa Manluluwas: “Ug sud-onga, siya moantus sa mga pagsulay, ug sakit sa lawas, kagutom, kauhaw, ug kakapoy, gani labaw nga ang tawo makaantus, gawas kini ngadto sa kamatayon; kay tan-awa, dugo manggawas gikan sa matag lungag sa iyang mga panit, hilabihan ka dako sa iyang kasubo tungod sa pagkadautan ug pagkasalawayon sa iyang katawhan.”12 Kana nga pag-antus ug ang mga resulta niana nga pag-antus mopuno sa atong mga kasingkasing uban sa gugma ug pasalamat. Mitudlo si Elder Paul E. Koelliker, “Sa pagtangtang nato sa mga makabalda nga mobira nato sa kalibutan ug mogamit sa kabubut-on sa pagtinguha Kaniya, giablihan nato ang atong kasingkasing sa celestial nga pwersa nga mopaduol nato Kaniya.”13 Kon ang gugma nga atong gibati alang sa Manluluwas ug sa unsay Iyang gibuhat alang nato mas dako pa kay sa enerhiya nga atong gihatag sa mga kahuyang, pagduha-duha, o dili maayong kinaiya, nan motabang Siya nato nga mabuntog ang mga butang nga nakaingon sa pag-antus sa atong kinabuhi. Luwason kita Niya gikan sa atong mga kahuyang.
Balikon nako sa pagpasabut: kon ugaling ang impluwensya sa kalibutan mas kusog kay sa atong pagtuo ug pagsalig sa Manluluwas, nan ang impluwensya sa kalibutan magpabilin kanunay. Kon mopili kita nga mag-focus sa atong negatibo nga mga hunahuna ug pagduha-duha sa atong bili, imbis magpalambo og relasyon sa Manluluwas, mas lisud ang pagbati sa mga impresyon sa Espiritu Santo.
Mga sister, dili nato libug-libugon kinsa kita! Samtang mas sayon nga wala kitay pagpakabana sa espirituhanon kay sa maningkamot sa paghinumdom ug pagdawat sa atong balaang pagkatawo, dili kita makatugot nga magpasagad niining katapusang mga adlaw. Hinaut nga kita, isip mga sister, “magmatinud-anon diha kang Kristo … ug hinaut unta nga si Kristo mobayaw [kanato], ug unta ang iyang mga pag-antus ug kamatayon, … ug sa iyang kalooy ug pagkamainantuson, ug ang paglaum sa iyang himaya ug kinabuhi nga dayon, moabut sa [atong salabutan] sa kahangturan.”14 Samtang bayawon kita sa Manluluwas ngadto sa mas taas nga lugar, mas klaro natong makita dili lang kon kinsa kita apan kita usab mas mahiduol ngadto Kaniya nga sukad atong mahunahuna. Sa sagradong pangalan ni Jesukristo, amen.