Ang Tingog sa Ginoo
Mopamatuod ko nga niini nga komperensya, nakadungog kita sa tingog sa Ginoo. Ang pagsulay sa matag usa nato mao kon unsaon nato sa pagsanong.
Una, mabination nga pulong alang sa gagmayng mga bata. Oo, mao kini ang katapusan nga sesyon, ug oo, ako ang katapusang mamumulong.
Karong bag-o, samtang nagbisita sa Provo City Center Temple, nakadayeg ko sa usa ka painting nga giulohan og Unang Panan-awon gikan sa Layo. Ang painting naghulagway sa kahayag ug gahum gikan sa langit sa dihang mibisita ni Joseph Smith ang Amahan ug ang Anak.
Samtang wala ko magkompara sa sagrado kaayong hitabo nga nagsugod sa Pagpahiuli, mahunahuna nako ang sama nga panan-awon nga naghulagway sa kahayag ug espirituhanong gahum sa Dios nga ania niining kinatibuk-ang komperensya ug, kana nga gahum ug kahayag moabut sa tibuok kalibutan.
Mosaksi ako ninyo nga si Jesus mao ang Kristo, nga naggiya Siya sa kalihokan niining sagrado nga buhat, ug nga ang kinatibuk-ang komperensya mao ang usa sa pinakaimportante nga panahon nga Siya mohatag og direksyon sa Iyang Simbahan ug ngari nato sa personal nga paagi.
Gitudloan gikan sa Kahitas-an
Sa adlaw nga naorganisar ang Simbahan, ang Ginoo mitudlo ni Joseph Smith nga propeta, manalagna, ug tigpadayag, ug apostol ni Ginoong Jesukristo1 ug miingon ngadto sa Simbahan:
“Kay ang iyang pulong ikaw makadawat, ingon og gikan sa akong kaugalingon nga ba-ba, sa tanan nga pagpailub ug hugot nga pagtuo.
“Kay pinaagi sa pagbuhat niini nga mga butang ang mga ganghaan sa impyerno dili makabuntog batok kanimo; ug ang Ginoong Dios mopatibulaag sa mga gahum sa kangitngit gikan sa imong atubangan, ug mohimo sa mga langit sa pagkurog alang sa imong kaayohan.”2
Unya, ang tanang sakop sa Unang Kapangulohan ug ang Korum sa Napulog Duha ka mga Apostoles usab gipaluyohan ug giordinahan isip mga propeta, mga manalagna, ug mga tigpadayag.3
Karon, sa atong pagpundok ubos sa direksyon ni Presidente Thomas S. Monson, makapaabut kita nga madungog ang mga pulong sa kabubut-on sa Ginoo, … ang hunahuna sa Ginoo, … ang tingog sa Ginoo, … ug ang gahum sa Dios ngadto sa kaluwasan.”4 Misalig kita sa Iyang saad: “Bisan pinaagi sa akong kaugalingon nga tingog o pinaagi sa tingog sa akong mga sulugoon, kini managsama ra.”5
Sa kaguliyang ug kalibog sa atong moderno nga kalibutan, ang atong pagsalig ug pagtuo sa mga pulong sa Unang Kapangulohan ug sa Korum sa Napulog Duha ka mga Apostoles importante sa atong espirituhanon nga pagtubo ug paglahutay.6
Nagkapundok kita niining talagsaong komperensya. Minilyon ka mga Santos sa Ulahing mga Adlaw ug sa ubang mga tinuohan nga labaw sa 200 ka nasud, nagsulti og labaw sa 93 ka pinulongan, nagtambong niini nga mga sesyon o nagbasa sa mga mensahe sa komperensya.
Mianhi ta nga nag-ampo ug nag-andam. Daghan nato, dunay mga kabalaka ug sinsero nga mga pangutana. Gusto kitang mobag-o sa atong pagtuo sa atong Manluluwas, nga si Jesukristo, ug mopalig-on sa atong abilidad sa pagbatok sa tintasyon ug paglikay sa mga kaguliyang. Mianhi ta aron matudloan gikan sa Kahitas-an.
Ang Hunahuna ug Kabubut-on sa Ginoo
Alang sa Unang Kapangulohan ug sa Napulog Duha, kinsa sa kasagaran mamulong sa komperensya, ang dakong responsibilidad sa pag-andam sa ilang mga mensahe balik-balik nga buluhaton ug sagrado nga responsibilidad.
Mga tuig na ang milabay, sa wala pa moserbisyo isip usa ka General Authority, nangutana ko ni Elder Dallin H. Oaks kon mag-andam ba siya og lain nga pakigpulong sa matag komperensya sa stake. Mitubag siya nga dili apan midugang, “Apan ang akong mga pakigpulong sa kinatibuk-ang komperensya lahi. Moabut og 12 hangtud 15 ka mga draft aron pagsiguro nga masulti nako unsay gusto sa Ginoo nga akong isulti.”7
Kanus-a ug sa unsang paagi moabut ang inspirasyon alang sa pakigpulong sa kinatibuk-ang komperensya?
Nga walay mga topic nga gi-assign, makita nato nga ang langit nanginlabut sa mga hilisgutan ug mga tema sa mahangturong kamatuoran sa matag komperensya.
Usa sa akong Kaigsoonan misulti nako nga ang iyang hilisgutan alang niini nga komperensya gihatag ngadto niya human dayon sa iyang pakigpulong sa miaging Abril. Ang lain miingon tulo ka semana nang milabay nga nag-ampo pa gihapon siya ug naghulat sa Ginoo. Ang lain, sa dihang gipangutana unsa ka dugay mohimo og sensitibo nga pakigpulong, mitubag, “Baynte singko ka tuig.”
Dunay higayon nga ang importante nga ideya moabut dayon, apan ang sulod ug mga detalye nagkinahanglan gihapon og dakong espirituhanong paningkamot. Pagpuasa ug pag-ampo, pagtuon ug pagtuo kabahin kanunay sa proseso. Ang Ginoo dili gusto og pagpaka-aron-ingon nga makapakunhod sa Iyang tingog ngadto sa Iyang mga Santos.
Ang direksyon alang sa pakigpulong sa kinatibuk-ang komperensya sa kasagaran moabut sa gabii o sayo sa buntag, sa panahon nga ang pakigpulong wala pa sa hunahuna. Sa kalit, ang wala paabuta nga panglantaw ug usahay, piho nga mga pulong moabut isip lunsay nga pagpadayag.8
Samtang kamo maminaw, ang mga mensahe nga inyong nadawat tingali literal o gihimo gyud alang ninyo.
Namulong daghang mga tuig na ang nakalabay sa kinatibuk-ang komperensya, misulti ko og mga pulong nga misulod sa akong hunahuna samtang namalandong kon andam ba ko nga magmisyon. Ang pulong “Ikaw wala masayud sa tanan, apan ikaw igo nga nasayud!”9 Usa ka batan-ong babaye nagtambong sa kinatibuk-ang komperensya nianang adlawa misulti nako nga siya nag-ampo bahin sa tanyag sa kaminyoon, naghunahuna kon nakaila ba gayud siya sa batan-ong lalaki. Sa dihang gisulti nako ang mga pulong, “Wala ka makahibalo sa tanan, apan igo na ang imong kahibalo,” ang Espiritu mikumpirma kaniya nga siya nakaila gayud kaayo kaniya. Malipayon silang naminyo sulod sa daghang mga tuig.
Mosaad ko nga kon andamon ninyo ang inyong espritu, ug moanhi nga magpaabut nga makadungog sa tingog sa Ginoo, ang mga hunahuna ug pagbati moabut sa inyong hunahuna nga gihimo alang gyud kaninyo. Gibati na ninyo kini niini nga komperensya, o inyong bation, samtang tun-an ninyo ang mga mensahe sa umaabut nga mga semana.
Alang Karon ug sa Umaabut nga mga Bulan
Si Presidente Monson miingon:
“Pangita og panahon sa pagbasa sa mga mensahe sa komperensya.”10
“Palandunga [kini]. … Akong nakaplagan … nga mas nadugangan ko gikan niining dinasig nga mga sermon kon kini tun-an nako pag-ayo.”11
Ang mga mensahe sa kinatibuk-ang komperensya mao ang gusto sa Ginoo nga atong paladungon sa umaabut nga mga bulan.
Ang magbalantay sa karnero “molakaw nga magauna sa [iyang mga karnero], ug kaniya magasunod ang mga karnero; kay sila makasabut man sa iyang tingog.”12
Sa kasagaran, ang Iyang tingog mogiya nato sa pag-usab og pipila ka butang sa atong kinabuhi. Nagdapit Siya nato sa paghinulsol. Nagdapit Siya nato sa “pagsunod Kaniya.
Hunahunaa kini nga mga pamahayag gikan niini nga kompersnya:
Presidente Henry B. Eyring kaganinang buntag: “Mosaksi ako nga ang Dios nga Amahan buhi ug gusto nga mouli kamo Kaniya. Kini ang tinuod nga Simbahan ni Ginoong Jesukristo. Siya nakaila kaninyo, Siya nahigugma kaninyo, ug Siya nagbantay kaninyo.”13
Presidente Dieter F. Uchtdorf sa kagahapon: “Mopamatuod ko nga kon kita mohimo o mopadayon sa talagsaong panaw nga padulong ngadto sa Dios, ang atong kinabuhi mahimong mas maayo ug ang Ginoo mogamit nato sa talagsaong mga paagi sa pagpanalangin niadtong anaa sa atong palibut ug ipahinabo ang Iyang mahangturong mga katuyoan.”14
Presidente Nelson sa kagahapon sa hapon: “Mosaad ko nga kon inyong isub-sob ang inyong kaugalingon sa Basahon ni Mormon, mapanalipdan kamo batok sa mga dautan niining panahona, lakip na ang grabing pagtakboy sa pornograpiya ug sa ubang matang sa adiksyon.”15
Elder Dallin H. Oaks kagahapon: “Ako mopamatuod nga ang pamahayag sa pamilya usa ka pahayag sa mahangturong kamatuoran, kabubut-on sa Ginoo alang sa Iyang mga anak kinsa nagtinguha og kinabuhing dayon.”16
Ug Elder M. Russell Ballard mga pipila ka minuto ang milabay: “Kinahanglan natong gakson ang mga anak sa Dios pinaagi sa kalooy ug wagtangon ang pagkamahukmanon, lakip sa kaliwatan sa sekso, ug nasyonalismo.”17
Tungod kay duna pa tay dugang minuto, gusto kong modugang og mubo nga paghandom bahin ni Elder Robert D. Hales. Ang Unang Kapangulohan misulti ni Elder Hales nga makahatag siya og mubo nga mensahe sa sesyon sa Dominggo sa buntag kon itugot sa iyang panglawas. Samtang wala motugot ang iyang panglawas, nag-andam siya og mensahe, nga iyang nahuman sa miaging semana ug mipakigbahin niini kanako. Kay namatay man siya mga tulo ka oras ang milabay, akong ipakigbahin ang tulo ka mga linya sa iyang pakigpulong.
Nagkutlo ni Elder Hales: “Kon kita mopili nga magbaton og hugot nga pagtuo, andam kita nga mobarug sa presensya sa Dios. … Human sa pagkalansang sa Manluluwas, nagpakita Siya ngadto lamang sa mga ‘matinud-anon sa pagpamatuod [Kaniya] samtang sila buhi pa sa pagkamortal.’ [D&P 138:12.] Kadtong ‘kinsa misalikway sa mga pagpamatuod … sa mga … propeta [dili] makatan-aw sa presensya [sa Manluluwas].’ [D&P 138:21.] … Ang atong pagtuo nag-andam nato nga maanaa sa presensya sa Ginoo.”
Pagkamaayo sa Ginoo sa pagdasig ni Presidente Russell M. Nelson pagkahuman sa sesyon kaganihang buntag nga daling mibiya sa building, nga wala maniudto, ug nagdali sa pag-adto ni Elder Hales, diin miabut siya ug nakaadto, ang iyang presidente sa korum, uban ni Mary Hales samtang migradwar si Elder Hales gikan sa pagkamortal.
Pagtubag sa Tingog sa Ginoo
Ako mopamatuod nga niining komperensya atong nadungog ug nabati ang hunahuna ug kabubut-on sa Ginoo.
Kinahanglan nga dili kita maalarma kon ang mga pulong sa mga sulugoon sa Ginoo supak sa panghunahuna sa kalibutan, ug, usahay, supak sa atong kaugalingong hunahuna. Mao gyud kini ang paagi. Nagluhod ko sa templo uban sa akong mga Kaigsoonan. Makapamatuod ko sa kaayo sa ilang pagkatawo. Ang ilang labing dakong tinguha mao ang pagpahimuot sa Ginoo ug sa pagtabang sa mga anak sa Dios nga makabalik ngadto sa Iyang presensya.
Ang Seventy, ang Bishopric, ang Kinatibuk-ang Kapangulohan sa Relief Society, Young Women, Primary, ug ubang mga lider sa auxiliary nakadugang og daghang inspirasyon niini nga kompersnya, sama sa maanindot nga musika ug sa sinsero nga mga pag-ampo.
Adunay kaban sa bahandi sa langitnong direksyon nga naghulat sa inyong pagdiskobre sa mga mensahe sa kinatibuk-ang komperensya. Ang matag usa nato nga pagsulay gihimo sa pagsuta kon unsay atong reaksyon sa atong nadungog, nabasa, ug gibati.
Mopakigbahin ko og kasinatian bahin sa pagtubag sa mapanagnaon nga mga pulong gikan sa kinabuhi ni PresidenteRussell M. Nelson:
Niadtong 1979, lima ka tuig sa wala pa matawag isip General Authority, si Brother Nelson mitambong og miting sa wala pa ang kinatibuk-ang komperensya. Si Presidente Spencer W. Kimball mihagit sa tanang nanambong sa pagpataas sa ilang lakang sa pagsangyaw sa ebanghelyo sa tibuok kalibutan. Sa mga nasud nga espesyal nga gihisgutan ni Presidente Kimball mao ang China, nagdeklarar, ‘Kinahanglang moserbisyo kita sa mga Chinese. Kinahanglang makat-on kita sa ilang pinulongan. Kinahanglan kitang mag-ampo ug motabang kanila.’”18
Sa edad nga 54, si Brother Nelson adunay pagbati atol sa miting nga kinahanglan siyang magtuon sa pinulongan nga Mandarin. Bisan og busy nga heart surgeon, nangita dayon siya og tutor nga motudlo niya.
Wala madugay human makasugod sa iyang mga pagtuon, si Dr. Nelson mitambong og convention sa silangang Estados Unidos ug wala damha nakatupad siya og “usa ka inila nga Chinese surgeon, nga si Dr. Wu Yingkai. … Tungod kay si [Brother Nelson] nagtuon og Mandarin, misugod siya sa pagpakig-istorya [ni Dr. Wu].”19
Ang tinguha ni Dr. Nelson sa pagsunod sa propeta misangpot sa pagbisita ni Dr. Wu sa Siyudad sa Salt Lake ug ni Dr. Nelson nga mibiyahe ngadto sa China aron mohatag og mga lecture ug mopahigayon og mga operasyon.
Ang iyang gugma alang sa mga Chinese, ug sa ilang gugma ug pagtahud kaniya, milambo.
Niadtong Pebrero 1985, napulo ka bulan human siya matawag ngadto sa Korum sa Napulog Duha, si Elder Nelson nakadawat og surprisa nga tawag sa telepono gikan sa China nanghangyo ni Dr. Nelson nga moadto sa Beijing aron maoperahan ang nasakit sa kasingkasing nga labing inila nga mag-aawit. Uban sa awhag ni Presidente Hinckley, si Elder Nelson mibalik sa China. Ang katapusang operasyon nga iyang gipahigayon didto sa People’s Republic of China.
Mga duha ka tuig lang ang milabay, niadtong Oktubre 2015, si Presidente Russell M. Nelson sa makausa gipasidunggan pinaagi sa opisyal nga pagdeklarar, mihingalan kaniya nga “Karaang Higala sa China.”
Dayon kagahapon atong nadungog ang 93 anyos na karon nga si Presidente Russell M. Nelson nga naghisgot sa pangamuyo ni Presidente Thomas S. Monson sa “matag usa kanato [sa milabayng Abril nga komperensya nga] mainampoong magtuon ug mamalandong sa Basahon ni Mormon matag adlaw.”
Sama sa iyang gibuhat isip busy nga heart surgeon, diha-diha nanuhol siya og Mandarin tutor, si Presidente Nelson misunod sa tambag ni Presidente Monson ug migamit niini sa iyang kaugalingong kinabuhi. Labaw pa kay sa magbasa lang, miingon siya “naglista ko kon unsa ang Basahon ni Mormon, unsa ang gipamatud-an niini, unsa ang gisupak unsa ang gituman unsa ang gipatin-awug unsa ang gipadayag niini.”20
Ug dayon makapaikag, nga karon lang buntag, isip ikaduhang saksi, si Presidente Henry B. Eyring naghisgot usab ganihang buntag sa iyang tubag sa pahimangno ni Presidente Monson. Nakahinumdom ba kamo niini nga mga pulong? “Sama sa daghan kaninyo, akong nadungog ang mga pulong sa propeta isip tingog sa Ginoo ngari kanako. Ug, sama usab sa daghan kaninyo, mihukom ko nga mosunod niadto nga mga pulong.”21
Hinaut nga makita nato kini nga usa ka ehemplo sa atong kaugalingong kinabuhi.
Usa ka Saad ug Pagpamatuod
Mosaad ko kaninyo kon paminawon ninyo ang tingog sa Ginoo pinaagi sa mga pagtulun-an niining kinatibuk-ang komperensya, ug dayon mosunod niadtong mga pag-aghat, mabati ninyo ang impluwensya sa langit, ug ang mga kinabuhi sa naglibut kaninyo mapanalanginan.22
Atol niini nga komperensya, naghunahuna kita sa atong minahal nga propeta. Gimahal ka namo, Presidente Monson. Tapuson nako uban sa iyang mga pulong nga gihatag gikan niini nga pulpito. Nagtuo ko nga usa ka panalangin nga gusto niyang ihatag sa matag usa nato karon, kon ania pa siya uban nato. Miingon siya: “Sa atong pagbiya niini nga komperensya, akong ihatag kaninyo ang mga panalangin sa langit sa matag usa kaninyo. … Mag-ampo ko nga ang Langitnong Amahan mopanalangin kaninyo ug sa inyong mga pamilya. Hinaut nga ang mga mensahe ug diwa niini nga komperensya magamit diha sa tanan ninyong pagabuhaton—sa inyong mga panimalay, sa inyong trabahoan, sa inyong mga miting, ug sa tanan ninyong mga kalihokan.”
Iyang gitapos: “Gimahal ko kamo. Ako nag-ampo alang kaninyo. Hinaut nga ang Dios mopanalangin kaninyo. Hinaut ang Iyang gisaad nga kalinaw maanaa kaninyo karon ug sa kanunay.”23
Sa pangalan ni Jesukristo, amen.