Nga ang Imong Hingpit nga Kalipay Mapuno
Si Jesukristo ang tinubdan sa tanang pagpang-ayo, kalinaw, ug mahangturong pag-uswag.
Mga kaigsoonan, usa kini ka hingpit nga kalipay nga makig-uban kaninyo. Ug kana ang akong gustong ipamulong nganha kaninyo karong buntaga—ang pagbaton og hingpit nga kalipay.
Usa ka bag-ohay nga ulohang balita mabasa, “Dautang mga hitabo miuyog sa nasud [ug] sa kalibutan.”1 Gikan sa dagkong bagyo ug mga baha ngadto sa nagdilaab nga kainit ug mga huwaw, gikan sa dagkong sunog ug mga linog ngadto sa mga gubat ug makamatay nga mga sakit, kini ingon og “ang tibuok yuta nagkaguliyang.”2
Minilyon ka mga tawo ang napahawa, ug dili maihap nga mga kinabuhi nabungkag niini nga mga hagit. Panagbangi sa mga pamilya ug mga komunidad ingon man sa tinago nga panlimbasug uban ang kahadlok, pagduda, ug wala matuman nga mga gipaabut nagbilin usab kanato diha sa kagubot. Kini malisud bation ang hingpit nga kalipay nga gitudlo ni Lehi nga mao ang katuyoan sa kinabuhi.3 Tanan kanato usahay mangutana, “Asa ako mangita og kalinaw? Hain ang akong kahupay … ?”4 Kita mahibulong, unsaon nako pagkakaplag og hingpit nga kalipay bisan pa sa mga kalisud sa mortal nga kinabuhi?
Ang tubag ingon og yano kaayo, apan namatud-an kini nga tinuod sukad sa mga panahon ni Adan. Ang malungtarong hingpit nga kalipay makaplagan sa pagpunting diha sa atong Manluluwas, si Jesukristo, ug sa pagsunod sa ebanghelyo ingon nga Iyang gipakita ug gitudlo. Kon kita mas magkat-on, magbaton og hugot nga pagtuo, ug mosunod ni Jesukristo, kita mas makasabut nga Siya mao ang tinubdan sa tanang pagpang-ayo, kalinaw, ug mahangturong pag-uswag. Siya nagdapit kanato sa pagduol ngadto Kaniya,5 usa ka pagdapit nga gihulagway ni Presidente Henry B. Eyring isip “ang labing importanting pagdapit nga madawat ni bisan kinsa.”6
Magkat-on bahin ni Jesukristo
Unsaon nato pagduol ngadto Kaniya? Sa miaging Abril, si Presidente Russell M. Nelson ug Elder M. Russell Ballard miawhag kanato sa pagtuon sa “The Living Christ”7 isip kabahin sa pagkat-on mahitungod sa Manluluwas. Daghan ang midawat sa hagit ug napanalanginan. Sa dili pa dugay usa ka mahal nga higala mihatag sa matag hamtong niyang mga anak og mga kopya sa dokumento nga may mga hulagway sa ebanghelyo aron sa pagpakita sa matag hugpong sa mga pulong. Siya miawhag sa iyang mga anak sa pagtabang sa iyang mga apo sa pagpasabut ug sa pagmemorya niini. Wala madugay gipakigbahin sa akong higala ang usa ka video sa iyang sayis anyos nga apong babaye, nga si Laynie, sa iyang memoryado nga bersion uban sa kadasig ug pamarog. Ako nakaamgo nga kon ang sayis anyos makahimo niini, ako makahimo usab!
Samtang akong natun-an ang kinabuhi ug mga pagtulun-an ni Jesukristo nga mas may tumong ug mipasalig sa “The Living Christ” sa panumduman, ang akong pasalamat ug gugma alang sa atong Manluluwas mitubo. Ang tanang sentence nianang dinasig nga dokumento naglangkob og wali ug nakapadugang sa akong pagsabut sa Iyang balaang mga tahas ug yutan-ong misyon. Unsay akong nakat-unan ug gibati sulod niining panahon sa pagtuon ug paghunahuna naghimatuod nga si Jesus sa tinuoray “mao ang kahayag, ang kinabuhi, ug ang paglaum sa kalibutan.”8 Ang karaang kasulatan ug ang mga pulong sa mga propeta sa ulahing mga adlaw gisulat o gipamulong sa pagdayeg Kaniya nagpamatuod nga ang “Iyang paagi mao ang dalan nga naggiya ngadto sa kalipay niini nga kinabuhi ug sa kinabuhing dayon sa kalibutan nga umaabut.”9
Pagbaton og Hugot nga Pagtuo kang Jesukristo
Samtang kamo magtuon sa kinabuhi ug mga pagtulun-an ni Kristo sa dili maihap nga mga paagi, ang inyong hugot nga pagtuo diha Kaniya motubo. Inyong mahibaloan nga Siya nahigugma kaninyo sa tagsa-tagsa ug hingpit nga nakasabut kaninyo. Sa iyang 33 ka tuig sa mortalidad, Siya nag-antus nga gisalikway; gigukod; gigutom, giuhaw, ug gikapoy;10 gimingaw, giabuso sa pulong ug sa pisikal, ug sa katapusan, usa ka sakit kaayo nga kamatayon diha sa mga kamot sa mga tawo nga makasasala.11 Didto sa Tanaman sa Getsemani ug didto sa krus sa Kalbaryo, gibati Niya ang tanan natong mga sakit, mga kasakit, mga pagtintal, mga balatian ug mga kahuyang.12
Dili igsapayan unsa ang atong giantus, Siya mao ang tinubdan sa pagpang-ayo. Kadtong kinsa nakasinati sa bisan unsang pang-abuso, makaguol nga pagkawala, naglaygay nga sakit o makaluya nga kasakit, bakak nga mga pasangil, madumtanong pagpanggukod, o espirituhanong kadaot tungod sa sala o mga walay pagsinabtanay mamaayo sa Manunubos sa kalibutan. Hinoon Siya dili moduol kon walay pagdapit. Kita kinahanglan gayud nga moduol ngadto Kaniya ug motugot Kaniya sa pagbuhat sa Iyang mga milagro.
Usa ka nindot nga adlaw sa tingpamulak giablihan nako ang pultahan aron makatagamtam og presko nga hangin. Usa ka gamay nga langgam milupad pasulod sa abling pultahan ug unya nakaamgo nga dili kini ang gusto niini. Walay paglaum nga milupad kini libut sa kwarto, mibalik-balik og lupad ngadto sa bildo nga bintana sa pagsulay og eskapo. Misulay ako sa paggiya niini og hinay ngadto sa abling pultahan, apan nahadlok kini ug nagsige og lukso-lukso palayo. Sa katapusan mitugpa kini ibabaw sa nagbitay nga mga kurtina sa bintana nga naglibug sa kakapoy. Mikuha ko og silhig ug sa hinay gikuhit ang tumoy diin ang langgam nahadlok nga nagtugdon. Samtang gigunitan ko ang ulo sa silhig tupad sa mga tiil niini, ang langgam misulay og tugdon ngadto sa mga lanot. Sa hinay, hinay kaayo, milakaw ko ngadto sa abling pultahan, naggunit sa silhig nga dili lihokon kutob sa akong mahimo. Sa pag-abut dayon namo sa abling pultahan, ang langgam kusog nga milupad ngadto sa kagawasan.
Sama niana nga langgam, usahay mahadlok kita nga mosalig tungod kay wala kita makasabut sa hingpit nga gugma sa Dios ug sa tinguha nga motabang kanato. Apan kon atong tun-an ang plano sa Langitnong Amahan ug ang misyon ni Jesukristo, atong masabtan nga ang Ilang katuyoan lamang mao ang atong mahangturong kalipay ug pag-uswag13 Sila mahimuot sa pagtabang kanato kon kita mangayo, mangita, ug motuktok.14 Kon atong gamiton ang hugot nga pagtuo ug mapainubsanong ablihan ang atong mga kaugalingon sa Ilang mga tubag, magawasnon kita gikan sa mga kapig-ot sa atong mga dili pagsinabtanay ug mga pangagpas, ug mapakita kanato ang dalan sa unahan.
Si Jesukristo mao usab ang tinubdan sa kalinaw. Siya nagdapit kanato sa “pagsandig diha sa [Iyang] bukton”15 ug gisaad ang “kalinaw … nga lapaw sa tanang panabut,”16 pagbati nga moabut kon ang Iyang Espiritu “misulti[g] kalinaw sa among mga kalag”17 walay pagsapayan unsa nga mga hagit ang naglibut kanato. Personal man nga mga paningkamot, kagubot sa pamilya, o krises sa komunidad, ang kalinaw moabut samtang nagsalig kita nga ang Bugtong Anak sa Dios adunay gahum sa paghupay sa atong nagsakit nga mga kalag.
Si Snježana Podvinski, usa sa diyutay nga mga Santos sa Karlovac, Croatia, misandig sa Manluluwas sa dihang ang iyang bana ug ang duha niya ka ginikanan namatay sulod sa unom ka bulan sa miaging tuig. Nagbangutan, apan may pagpamatuod nga ang pamilya hangtud sa kahangturan, gigamit niya ang tanan niyang tiniguman sa pagbiyahe ngadto sa templo, diin gi-seal siya ngadto sa iyang bana ug mga ginikanan. Gipakigbahin niya nga kadtong mga adlawa didto sa templo mga kinanindotan sa iyang kinabuhi. Tungod sa iyang lig-on nga pagpamatuod kabahin ni Jesukristo ug sa Iyang Pag-ula, gibati niya ang kalinaw ug nakasinati og pagkanaayo nga nahimong kalig-on usab niadtong naglibut kaniya.
Ang hugot nga pagtuo diha ni Jesukristo nagdala og daghan pa nga mga gasa kay sa pagkanaayo ug kalinaw. Ingon sa gipakigbahin ni Presidente Henry B, Eyring: “Mapasalamaton ako sa daghang paagi nga giduaw ako sa Ginoo uban sa Maghuhupay sa dihang nagkinahanglan ako og kalinaw. Gani ang Amahan sa Langit wala lamang maghunahuna sa atong kahupayan apan mas labaw pa mahitungod sa atong pag-adto sa langit.”18
Tungod sa Pag-ula ni Jesukristo, nga naglakip sa mga gasa sa pagtubos ug pagkabanhaw, kita makahinulsol, makausab, ug mahangturong makauswag. Tungod sa gahum nga Iyang gihatag kanato samtang kita magmasulundon, kita mahimong mas labaw pa kay sa kaugalingon natong mahimo. Kita dili hingpit nga makasabut ngano, apan tanan kanato nga mibati og hugot nga pagtuo nga mitubo diha ni Kristo nagdawat usab og mas dako nga pagsabut sa atong balaang pagkatawo ug katuyoan, naggiya kanato sa paghimo og mga pagpili nga uyon niana nga kahibalo.
Bisan pa sa kalibutan nga moganoy kanato sa matang sa “pagkahayop lamang,”19 nasayud nga ang Dios mao ang atong Amahan nagsiguro kanato nga kita may balaang potensyal ug harianong saad. Bisan pa sa kalibutan nga nagsulti kanato nga kining kinabuhia walay lutsanan, nasayud nga ang Bugtong Anak naghimong posible kanatong matubos ug mabanhaw naghatag kanato og paglaum alang sa mahangturong pag-uswag.
Sunda si Jesukristo
Samtang kita nagkat-on pa og daghan ni Jesukristo, nagpalambo kita og mas dakong hugot nga pagtuo diha Kaniya ug dayag nga gusto kitang mosunod sa Iyang ehemplo. Ang pagsunod sa Iyang mga sugo nahimo nga atong labing dako nga tinguha. Ang atong mga kasingkasing nangandoy sa paghupay sa mga pag-antos sa uban, sama sa Iyang gihimo, ug gusto natong makasinati sila og kalinaw ug kalipay nga atong nakaplagan.
Ngano nga ang pagsulay sa pagbuhat sama sa Iyang gibuhat gamhanan kaayo? Tungod kay kon atong ibutang ang atong hugot nga pagtuo diha sa buhat, ang Espiritu Santo mopamatuod sa mahangturong kamatuoran.20 Si Jesukristo nagtudlo sa Iyang mga disipulo sa pagsunod sa mga sugo tungod kay nahibalo Siya nga samtang kita magsunod sa Iyang ehemplo magsugod kita sa pagsinati og hingpit nga kalipay, ug samtang kita magpadayon diha sa Iyang dalan, maabut nato ang hingpit nga kalipay. Siya mipasabut, “Kining mga butanga gisulti ko kaninyo, aron ang akong kalipay magapabilin diha kaninyo, ug ang inyong kalipay mamahingpit.”21
Ang ato bang mga pagpamatuod natukod diha sa tukurang bato ni Jesukristo ug sa Iyang ebanghelyo? Kon ang mga bagyo sa kinabuhi motukmod kanato, magkabuang ba kita sa pagpangita og libro nga motudlo o post sa internet alang sa panabang? Ang pagpaabut og panahon sa pagtukod ug paglig-on sa atong kahibalo ug pagpamatuod kabahin ni Jesukristo mamunga og bilihong mga pagtulun-an sa mga panahon sa pagsulay ug kalisdanan. Ang inadlaw nga pagbasa sa mga kasulatan ug pagpamalandong sa mga pulong sa buhing mga propeta; paghimo og makahuluganong personal nga pag-ampo; mahunahunaong pag-ambit sa sakrament matag semana; paghatag og serbisyo ingon nga ang Manluluwas mobuhat—matag usa niining yano nga mga kalihokan mahimong tukuran alang sa malipayong kinabuhi.
Unsay nagdala og hingpit nga kalipay? Ang pagtan-aw ba sa inyong minahal sa katapusan sa makapoy nga adlaw? Ang katagbawan ba sa usa ka trabaho nga maayong pagkabuhat? Ang sanag ba sa mga mata sa usa ka tawo sa imong pakigbahin sa iyang palas-anon? Ang mga pulong ba sa usa ka himno nga mituhop sa kahiladman sa inyong kasinkasing? Ang paglamano ba sa usa ka suod nga higala? Pamalandong nga mag-inusara sa inyong mga panalangin, ug dayon pangita og mga paagi sa pagpakigbahin niini. Samtang kamo maningkamot sa pagserbisyo ug pagbayaw sa inyong mga kaigsoonan diha sa inyong kasilinganan o niining kalibutan nga nagkaguliyang, bation ninyo ang mas dako nga kalinaw ug pagkaayo ug gani pag-uswag.
Duol ngadto Kaniya. Nagpamatuod ako nga samtang inyong i-sentro ang inyong kinabuhi diha ni Jesukristo, makaplagan ninyo ang hingpit nga kalipay sa inyong mga kahimtang, bisan unsa man kini. Sa tinuod, “Siya, lamang ang Mao,”22 nga tubag. Paghimo og panahon nga makaila ni Jesukristo pinaagi sa makugihong pagtuon, pagpalambo og mas dakong hugot nga pagtuo diha Kaniya, ug maninguha sa kanunay nga mas mahisama Kaniya. Samtang atong gihimo ang mao, kita usab matandog sa pag-ingon, uban sa batang Laynie, “Pasalamatan ang Dios alang sa dili katupngan nga gasa sa Iyang balaang Anak.”23 Sa balaan ug sagradong pangalan ni Jesukristo, amen.