O a ni avanoa o i ai iina mo le aoao mai ma le aoao atu i totonu o le aiga?

O le aiga o le nofoaga sili lea mo le aoaoina, aoao atu, ma le faaaogaina o mataupu faavae o le talalalelei. Ua uunaia e perofeta o aso e gata ai ia aiga ina ia tuu atu le faamuamua aupito maualuga i tatalo faaleaiga, afiafi faaleaiga, suesuega ma aoaoga faaletalalelei, ma gaoioiga lelei faaleaiga.

Saunia oe lava ia faaleagaga

O a ni aafiaga sa e mauaina i le aoaoina ma le aoao atu o le talalelei i totonu o lou aiga? O a mea e mafai ona e faasoa atu i le autalavou?

E faapefea ona e uunaia le autalavou ia faamalosia le aoaoina o le talalelei i totonu o o latou aiga? O a faamanuiaga folafolaina e ono uunaia i latou?

Faaaoga punaoa nei e saunia ai le autalavou e aoao atu ma aoaoina ia upumoni o le talalelei i totonu o o latou aiga. O le a fesoasoani ou lava aafiaga e te aoao atu ai ma le mataalia ia le autalavou. Mafaufau pe faapefea ona fesoasoani atu ia te oe ia gaoioiga o i lenei otootoga e fuafua ai ni auala e faamalosiau ai i le autalavou.

Mosaea 4:14–15; MF&F 68:25–28 (Ua i ai i matua se tiutetauave o le aoao atu o le talalelei i a latou fanau)

Valeri V. Cordón, “O Le Gagana o le Talalelei,” Ensign po o le Liahona, Me 2017, 55–57

M. Russell Ballard, “Aufono Faaleaiga,” Ensign po o le Liahona, Me 2016, 63–65

Quentin L. Cook, “O Le Alii o Lou Malamalama Ia,” Ensign po o le Liahona, Me 2015, 62–66

“Afiafi Faaleaiga,” Faamaoni i le Faatuatua (2004), 3–4

“Tatalo Faaleaiga,” Faamaoni i le Faatuatua, 170

“Taua o le Suesue i Tusitusiga Paia i Aso Taitasi,” Faamaoni i le Faatuatua, 190–91

“O Le Aiga ma le Ekalesia” Tusitaulima2: Taitaiina o le Ekalesia (2010), 1.4

Vitio: “O Se Polokalama Musuia-mai le Lagi”

Ia fai fesootaiga

I nai minute muamua o vasega taitasi, fesoasoani i le autalavou e fai ni fesootaiga i le va o mea o loo latou aoaoina i tulaga eseese (e pei o suesuega faaletagata, seminare, isi vasega i le Lotu, po o aafiaga ma a latou uo). E mafai faapefea ona e fesoasoani ia i latou ia iloa le manaomia o le talalelei i aso taitasi o le olaga? O manatu nei e ono fesoasoani ia te oe:

Valaaulia le autalavou e faasoa mai le auala na latou faaaoga ai mea sa latou aoaoina i le vasega o le vaiaso ua tea i le aluga o le vaiaso.
Fai atu i le autalavou e mafaufau faapea o latou o ni matua. O a ni o latou tiutetauave mo a latou fanau? Fai i se tamaitiiti o le vasega e lisiina i luga o le laupapa, ma valaaulia le autalavou e tagai mo nisi tiutetauave faaopoopo o i le Mosaea 4:14–15 ma le Mataupu Faavae ma Feagaiga 68:25–28. O a ni avanoa o maua e matua e faataunuu ai ia tiutetauave o loo faamatalaina mai i nei fuaiupu? O le a se mea e mafai ona faia e le autalavou e fesoasoani atu ai?

Aoao faatasi

O le a fesoasoani gaoioiga nei e saunia ai le autalavou mo, ma sailia avanoa mo le aoaoina ma le aoao atu o le talalelei i o latou aiga. I le mulimuli ai i le taitaiga a le Agaga, filifili se tasi pe sili atu e aoga mo lau vasega:

Faatasi ai ma le faatagaga mai le epikopo, ia valaaulia se tagata i lau uarota na aoaoina se gagana fou ma se aganuu fou ia sau i le vasega e talanoa atu i le autalavou e uiga i lona aafiaga. A o lei amataina le vasega, fai atu i le tagata e faitau le talafaatusa e uiga i le leiloa o le gagana lea na faaaoga e Elder Valeri V. Cordón i parakalafa muamua e ono o lana lauga “O Le Gagana o le Talalelei.” Fai atu i le tagata e faasoa mai pe faapefea ona talitutusa lona aafiaga i le talafaatusa a Elder Cordón. Vaevae le autalavou i ni vaega se tolu, ma tuu atu i vaega taitasi se tasi o vaega o loo faamatalaina ai ni auala e faasao ai le gagana o le talalelei i totonu o le aiga. Valaaulia ia vaega e faasoa mai mea sa latou aoaoina ma ni auala e mafai ona latou faasaoina ai le gagana o le talalelei i totonu o o latou aiga i le taimi nei.
Valaaulia tagata o le vasega e faitau i le lauga a Elder M. Russell Ballard “Aufono Faaleaiga,” sue ma faailoga fautuaga e faatatau ia i latou o ni fanau i le aiga. Fai atu i le autalavou e faasoa mai mea na sili ona taua ia i latou ao latou faitau. O le a le fautuaga na tuuina mai e Elder Ballard e faatatau i tekinolosi? E faapefea ona lagolago e le autalavou o latou matua ma tei i aufono faaleaiga? Atonu e mafai ona e valaaulia le autalavou e faatino mai i se tala le faiga o se fonotaga faaleaiga e faataitai ai pe faapei ia fonotaga po o aufono faaleaiga.
Fai atu i le autalavou e faitau le vaega o loo faaulutalaina “O Le Taimi Sao i le Aiga” i le saunoaga a Elder Quentin L. Cook “O Le Alii o Lou Malamalama Ia.” O le a se mea na aoaoina e le autalavou mai le faataitaiga a Vaughn Kimball ma lona aiga i le tala? O le a se mea aoaoina e le autalavou mai o latou matua? O le a faapefea ona latou fesoasoani e aoaoina ma aoao atu i o latou aiga?
Faaali le vitio ”O Se Polokalama Musuia-mai le Lagi,“ ma fai atu i le autalavou e vaavaai mo tulaga lamatia i le lalolagi e mafai ona puipuia mai ai i latou ma po o a malosiga e mafai ona oo mai i tagata taitoatasi ma aiga o e suesue faatasi i le talalelei. Valaaulia le autalavou e faitau “Afiafi Faaleaiga” i le Faamaoni i le Faatuatua ma saunia se otootoga faigofie mo se lesona o le afiafi faaleaiga i se autu latou te filifilia. Valaaulia le autalavou e aoao atu e le tasi le isi i ni lesona sa latou saunia i se vasega a sau.
Faatasi ai o se vasega, fai tau le parakalafa lona fitu o le “O le Aiga: O Se Folafolaga i leLalolagi.” Valaaulia le autalavou e lisi i luga o le laupapa ia mataupu faavae lea o loo faavae ai i luga ni aiga faamanuiaina. Fai atu i le autalavou e faasoa mai nisi o gaoioiga lelei ma faafiafiaina latou te fiafia e auai faatasi ai ma o latou aiga. Valaaulia i latou e faasoa mai po o a ni upumoni po o mataupu faavae o le talalelei sa latou aoaoina ao latou auai atu i nei gaoioiga. Mo se faataitaiga, sauniaina faatasi o se taumafataga e ono aoao atu ai le auauna atu ma le alofa, po o le taaalo faatasi i se taaloga e ono aoao atu ai le onosai ma le naunautaiga. Uunaia le autalavou e fuafua ni gaoioiga faafiafiaina mo o latou aiga ma ia talanoaina ma i latou pe faapefea ona fesootai nei gaoioiga i le talalelei.
Fai atu i le autalavou e mafaufau i ni aitia e mafai ona faaaoga e tagata e uunaia ai o latou aiga ina ia auai i tatalo faaleaiga ma le suesueina o tusitusiga paia. Talatalanoa i faamanuiaga e oo mai i aiga mai nei gaoioiga. E mafai ona faitau e le autalavou “Tatalo Faaleaiga” ma le “Taua o le Suesue i Tusitusiga Paia i Aso Taitasi” i le Faamaoni i le Faatuatua mo ni fautuaga. Faatino atu se auala e mafai ona talanoa atu ai se talavou i se matua ma uunaia tatalo faaleaiga ma suesuega i tusitusiga paia fai soo. Valaaulia le autalavou e faasoa mai soo se aafiaga sa latou mauaina i tatalo faaleaiga ma suesuega i tusitusiga paia.

Fai atu i le autalavou e faasoa mai mea ua latou aoaoina i le aso. Pe o latou malamalama i le auala e saunia ai mo, ma sailia ai avanoa mo le aoaoina ma le aoao atu i le aiga? O a ni o latou lagona po o ni uunaiga o i ai? Pe o i ai ni a latou fesili faaopoopo? Mata e aoga le faaaluina o se isi taimi i lenei autu?

Tomai e suesue ai le talalelei

O le suesueina o tusitusiga paia e le o se tulaga masani ai i le toatele o tagata, e tutusa lava ma le taina o le piano po o le valiata. O le aoaoina ina ia suesue i tusitusiga paia ma le mataalia e masani lava ona manaomia ai le atiaeina o ni tomai. O tomai mo le suesueina o le talalelei lea o loo faamatalaina i nei otootoga mo le aoaoina e mafai ona fesoasoani i le autalavou ina ia avea ai ma ni tamaiti aoga filiga o le talalelei. Faasino atu i le autalavou nei tomai, ma uunaia i latou e faaaogaina ao suesue le tagata lava ia i le talalelei.

Valaaulia e faatino

Valaaulia ia tagata o le vasega e vaavaai mo faamanuiaga lea o le a oo mai pe a latou auai faatasi ai ma o latou aiga i aoaoga o le talalelei e ala i le tatalo, suesue i tusitusiga paia, afiafi faaleaiga, po o gaoioiga malie.