E faapefea ona fesoasoani poloaiga ia te au ina ia aoao ia faapei atili o le Tama Faalelagi?

O poloaiga o faatonuga mai le Tama Faalelagi alofa e fesoasoani ina ia faapei atili i tatou o Ia. E ala mai poloaiga, ua aoao e le Tama Faalelagi tatou i Lona finagalo mo i tatou ma faaali mai le ala tatou te alolofa atu ai i isi ma faatoilalo le tagata natura. O le usiusitai i poloaiga e saunia ai i tatou e foi atu i le afioaga o le Atua ma maua le ola e faavavau. Pe a tatou malamalama i nei mea, tatou te iloa ai o poloaiga o faamanuiaga ae le o se avega.

Saunia oe lava ia faaleagaga

O faapefea le tuputupu ae o lou malamalama i poloaiga i le faagasologa o lou olaga? O a suiga ua e iloa ia te oe lava a o e taumafai e ola ai i poloaiga?

O a luitau o lo o feagai ma le autalavou ao latou taumafai e tausi ia poloaiga. O le a faapefea ona faamanuiaina i latou e ala i le malamalama i faamoemoega o poloaiga a le Atua? O a mea e mafai ona latou aoaoina e uiga i le Tama Faalelagi a o latou suesue i Ana poloaiga?

Ia suesue ma le agaga tatalo ia mau ma punaoa nei. O le a le mea o le a fesoasoani i le autalavou e malamalama ai i faamoemoega o poloaiga a le Atua?

Teuteronome 10:12–13; MF&F 82:8–10 (E fesoasoani poloaiga tatou te malamalama ai i le finagalo o le Atua mo i tatou)

Mataio 22:34–40 (Ua poloaiina i tatou e alolofa atu)

Ioane 14:15; 1 Ioane 5:1–3 (Tatou te usiusitai i poloaiga aua tatou te alolofa i le Atua)

MF&F 88:22 (Ina ia maua le mamalu faaselesitila, e ao ona tatou ola i le tulafono faaselesitila)

MF&F 93:20 (Afai tatou te tausi poloaiga, o le a tatou maua lava le atoatoaga o le Atua)

Dieter F. Uchtdorf, “Aua Nei Galo Au,” Ensign po o le Liahona, Nov. 2011, 120–23

D. Todd Christofferson, “‘Ou Te Aoai Atu ma Sasa ia i Latou Uma Ou te Alofa I Ai,’” Ensign po o le Liahona, Me 2011, 97–100

“Usiusitai,” Faamaoni i le Faatuatua (2004), 201–2

Aoao atu i le ala a le Faaola

Ina ua valaauina e le Faaola Ona soo e tausi ia poloaiga, sa Ia faia lea ma le alofa moni. O a ni auala e mafai ona e aoao ai le autalavou, i le alofa, e uiga i le tausia o poloaiga?

Ia fai fesootaiga

Tagai i isi manatu e aoao mai ma aoao atu ai.

I nai minute muamua lava o vasega taitasi, fesoasoani i le autalavou e faia fesootaiga i le va o mea latou te aoaoina i nofoaga eseese (e pei o suesuega faaletagata lava ia, seminare, isi vasega faale-Ekalesia, po o aafiaga ma a latou uo). E mafai faapefea ona e fesoasoani ia i latou ia iloa le taua o le talalelei i o latou olaga i aso taitasi? E mafai ona fesoasoani manatu nei:

• Valaaulia le autalavou e saili se viiga e faatatau i se mea sa latou faatoa aoao i ai (e fautua atu latou te faaaoga le faasinoala o “Mataupu” o loo i tua o le tusipese). Fai atu ia i latou e faasoa mai se fuaiupu mai le viiga ma faamatala pe faapefea ona fesoasoani ia i latou ina ia malamalama i se mataupu faavae o le talalelei.

• Valaaulia le autalavou e mafaufau faapea o loo latou malaga agai atu i se auala i le mauga, e latalata i le tofē pupū, ma se ala puipui i le itu o le auala. Fai atu e latou te talanoa ma se isi o le vasega ia fesili nei: E faapefea ona faapei ia poloaiga a le Alii o se ala puipui? E faapea ona faapei i latou o le auala? Valaaulia i latou e faasoa mai o latou manatu i le vasega.

Aoao faatasi

Tagai i isi auala e aoao mai ma aoao atu ai.

O gaoioiga taitasi o loo mulimuli mai o le a fesoasoani i le autalavou e malamalama ai i le ala e fesoasoani ai poloaiga ia i tatou e avea atili e faapei o le Tama Faalelagi. I le mulimuli ai i le Agaga, filifili se tasi pe sili atu e aoga mo lau vasega:

• I luga o le laupapa, tusi ni mau e fesoasoani e faamatala ai le mafuaaga o le i ai o a tatou poloaiga (e aofia ai mau na o loo i lenei otootoga ma nisi tou te mafaufau i ai). Faitau faatasi o se vasega ia mau, ma talanoa po o le a se mea o finagalo le Tama Faalelagi tatou te aoaoina mai poloaiga. Valaaulia le autalavou e faailoga nei fuaiupu ia latou tusitusiga paia ma tusi i autafa o le itulau se aotelega o mea sa aoao mai e lena mau ia i latou. Faaali atu i le autalavou le auala e faafesootai ai fuaiupu o a latou mau.

• Tusi i luga o le laupapa “Aisea na tuuina mai ai e le Atua ia i tatou poloaiga?” Valaaulia le autalavou e faitau le Mataupu Faavae ma Feagaiga 82:8–10 ma faasoa tali talafeagai i le fesili. Fesili atu i le autalavou pe aisea ua latou manatu ai e taua le iloa o faamoemoega e faatatau i poloaiga a le Tama Faalelagi. I le avea o se vaega o lenei talanoaga, fefaasoaai le palakalafa i le amataga o lenei otootoga pe faitau le vaega ua faaulutalaina “Lona Fa, aua nei galo le ‘aisea’ o le talalelei” mai le saunoaga a Peresitene Dieter F. Uchtdorf “Ina Nei Galo A’u.”

• Faiatu i le afa o le vasega e faitau le palakalafa muamua o le saunoaga a Elder D. Todd Christofferson “‘ Ou Te Aoai Atu ma Sasa ia i Latou Uma Ou te Alofa I Ai,’” ma fai i le isi afa e faitau le palakalafa lona lua. Valaaulia i latou e saili ia latou palakalafa mo tali i le fesili “Aisea ua tuuina mai ai e le Atua ia i tatou poloaiga? Talanoa i mea ua latou maua. Valaaulia le autalavou e fai se lisi o uiga o i ai i le Atua. Ona fesili lea ia i latou e mafaufau i poloaiga e mafai ona fesoasoani ia i latou e atiina ae ai na uiga ma avea ai atili e faapei o le Tama Faalelagi.

• Fai i le vasega e lisi i luga o le laupapa ia Tulafono e Sefulu (tagai Esoto 20:3–17) ma isi poloaiga ua latou mafaufau i ai. Fai i le autalavou e talanoa taitoalua pe i ni vaega toalaiti pe aisea ua latou manatu ai ua tuuina mai e le Tama Faalelagi ia i tatou poloaiga taitasi. Ona valaaulia lea o i latou e faitau le Mataio 22:34–40 ma talanoa pe faapefea e poloaiga taitasi o lo o lisi i luga o le laupapa ona fesoasoani ia i tatou e atiina ae lo tatou alofa mo le Atua ma le alofa mo o tatou tuaoi.

Fai atu i le autalavou e faasoa mai mea na latou aoaoina i le aso. Pe latou te malamalama o le tausia o poloaiga e fesoasoani e avea atili ai i tatou e faapei o le Tama Faalelagi? O a ni o latou lagona po o ni uunaiga? Pe o i ai ni a latou fesili faaopoopo? Mata e aoga le faaaluina o se isi taimi i lenei autu?

Tomai e suesue ai le talalelei

Fesootaiga o mau. I le gaoioiga muamua i le vaega lenei, ua valaaulia ai le autalavou e faafesootai fuaiupu ia latou mau, pe tusi i autafa o le itulau o a latou tusitusiga paia ia mau faasino i isi fuaiupu o loo aoao ai mataupu faavae ia e tasi. O lenei tomai e aoao ai le talalelei e mafai ona fesoasoani ia i latou e iloa ai fesootaiga o fuaitau eseese o mau. Uunaia le autalavou e fai le mea lenei i taimi o a latou suesuega o tusitusiga paia faaletagata lava ia ina ia faateleina ai lo latou malamalama i isi mataupu o le talalelei.

Vitio: “Talanoaina o Fesili”

Matamata atili

Valaaulia e faatino

Tagai i isi manatu e aoao mai ma aoao atu ai.

Fai atu i le autalavou e mafaufau loloto i mea na latou aoaoina i le aso. E faapefea ona aafia ai le auala latou te mafaufau ai i poloaiga a le Atua? Mata e faapefea ona aafia ai la latou amio e faatatau i le usiusitai i poloaiga? E faapefea ona aafia ai filifiliga latou te faia? Uunaia i latou tusi i lalo o latou mafaufauga i se api o talaaga.