E faapefea ona galulue faatasi i latou e umia le perisitua ma tamaitai e fausia le malo o le Atua?

I le faapaaga ai ma e umia le perisitua a le Atua, e taua tamaitai e fesoasoani i le Tama Faalelagi i le aumaia o le tino ola pea ma le ola faavavau o le tagata. I lalo o le taitaiga a i latou o e umia ki o le perisitua, e soalaupule faatasi i latou e umia le perisitua ma tamaitai e faamanuia olaga o le fanau a le Atua. E mafai ona tupu lenei mea i fonotaga a aufono a le uarota ma le siteki, i aiga, ma i le tele o isi nofoaga.

Saunia oe lava ia faaleagaga

O le a se taimi sa e vaaia ai le galulue faatasi o e umia le perisitua ma tuafafine i le fausia o le malo o le Atua? O a ni aafiaga e mafai ona e faasoa atu i le autalavou?

Aisea e taua ai i le autalavou ona iloa le auala e galulue faatasi ai tamaitai ma e umia le perisitua i le Ekalesia a le Alii? O a ni avanoa o i ai i le taimi nei mo alii ma tamaitai talavou e auauna faatasi atu ai? Aisea e tatau ai ona latou malamalama a o latou auauna atu i isi i le taimi nei ma sauniuni mo auaunaga i le lumanai?

A o e sauniuni, ia suesue ma le agaga tatalo i mau ma punaoa nei. O le a se mea e te lagona o le a aoga i le autalavou o loo e aoaoina?

“O Le Aiga: O Se Folafolaga i le Lalolagi,” Ensign po o le Liahona, Nov. 2010, 129 (O tane ma ava e galulue faatasi o se paaga tutusa i le tausiga o o latou aiga; tagai i parakalafa 6 ma le 7)

Russell M. Nelson, “O Se Talosaga i Ou Tuafafine,” Ensign po o le Liahona, Nov. 2015, 95–98

Quentin L. Cook, “E Ofoofogia Tamaitai o le AAG!” Ensign po o le Liahona, Me 2011, 18–21

“O Faamanuiaga o le Perisitua e mo Tagata Uma: O Se Sootaga e le Mavavaeeseina ma le Perisitua,” O Afafine i Lo’u Malo: O Le Talafaasolopito ma le Galuega a le Aualofa (2011), 135–53

Vitio: “Galuega a Agelu,” Potutusi o Aoaoga Faaleautaitai

Vitio: “Lagolagoina o Tagata Taitasi i le Aiga”

Aoao atu i le ala a le Faaola

Sa valaaulia e le Faaola e na mulimuli ia te Ia e molimau atu, ma a o latou faia, sa pai atu le Agaga i o latou loto. E mafai faapefea ona e uunaia le autalavou o loo e aoaoina e molimau atu le tasi i le isi e uiga i le moni o le talalelei?

Ia fai fesootaiga

I nai minute muamua o vasega taitasi, fesoasoani i le au talavou e fai ni fesootaiga i le va o mea o loo latou aoaoina i tulaga eseese (e pei o suesuega faaletagata, seminare, isi vasega i le Lotu, po o aafiaga ma a latou uo). E faapefea ona e fesoasoani ia i latou ia iloa le manaomia o le talalelei i aso taitasi o le olaga? O manatu nei e ono fesoasoani ia te oe:

Fai atu i le autalavou e faasoa mai se aafiaga sa latou oo i ai lata mai nei sa toe faamautu atu ai ia i latou le moni o mea sa latou suesueina i le lotu po o i latou lava.
Tusi le autu o le lesona i luga o le laupapa. Fai atu i tagata taitoatasi o le vasega e tusi se tali i le fesili. Ona fai atu lea ia i latou e galulue i ni paga ma tuufaatasi a latou tali i se fuaiupu se tasi. Valaaulia i latou e faasoa mai a latou fuaiupu i le vasega.

Aoao faatasi

O le a fesoasoani gaoioiga taitasi nei i le autalavou e malamalama ai i le auala e galulue faatasi ai tamaitai ma e umia le perisitua e fausia le malo o le Atua. I le mulimuli ai i le musumusuga a le Agaga, filifili se gaoioiga se tasi pe sili atu o le a sili ona aoga mo lau vasega:

Valaaulia le autalavou e iloilo le saunoaga a Peresitene Nelson, e amata i le parakalafa lona sefulu. O a ni faamaoniga ua latou vaaia o le faataunuuina o le valoaga a Peresitene Kimball? O le a se mea e mafai e le autalavou, alii ma tamaitai, ona faia e fesoasoani ai i le faataunuuina o lenei valoaga? Uunaia le autalavou e iloilo le vaega o totoe o le saunoaga a Peresitene Nelson, vaavaai mo ni auala e galulue faatasi ai tamaitai ma le au perisitua. Mafaufau e valaaulia tagata o le vasega e faasoa mai ni o latou lagona e uiga i le faatosinaga a tamaitai i le tusia o ni tusi o le loto faafetai i tamaitai i o latou olaga po o le faia o se faasalalauga i luga o ala faasalalau faaagafesootai.
Vaevae le mataupu e 8 o le Afafine i Lo’u Malo i ni vaega laiti e mafai ona faitau e le autalavou i le taimi o le vasega, ma tuu atu ia i latou taitoatasi se vaega. Valaaulia i latou e vaavaai mo se upusii po o se tala e faaalia ai le auala na galulue faatasi i latou e umia le perisitua ma tamaitai i le fausiaina o le malo o le Atua. Valaaulia talavou e faasoa mai i le vasega a latou upusii po o tala. O a ni tala talitutusa e mafai ona faasoa mai e le autalavou mai o latou lava aafiaga?
Pe a faatagaina e le epikopo, ia valaaulia ni nai tuafafine ma e umia le perisitua o i ai ni valaauga i le uarota e faasoa mai i le vasega o latou aafiaga i le galulue faatasi ai i le Ekalesia. Na faapefea ona faamanuiaina i latou mai aafiaga ma faamoemoega o le tasi ma le isi? Fai atu i le autalavou e faasoa mai soo se aafiaga sa latou oo i ai.
Fai atu i le autalavou e faitau le vaega ua faaautuina “Matafaioi a Tuafafine i le Ekalesia” mai le lauga a Elder Quentin L. Cook “E Ofoofogia Tamaitai o le AAG!” Fai atu ia i latou e faasoa mai i le tasi ma le isi mea ua latou aooaina. E mafai faapefea ona faaaoga e le autalavou le savali a Elder Cook e fesoasoani atu ai i isi ia malamalama i le taua o tamaitai i le Ekalesia?
Faaali atu le vitio “Galuega a Agelu” po o nai uluai minute muamua o le “Faataitaiga o le Fonotaga a le Uarota,” ma fai atu i le autalavou e faasoa mai soo se manatu ua latou maua e uiga i le auala e galulue faatasi ai tamaitai ma e umia le perisitua. Uunai le autalavou e faasoa mai ni auala ua latou vaaia ai tamaitai ma alii i o latou aiga ma uarota o fausia le malo o le Atua. E mafai faapefea e alii ma tamaitai talavou ona faatatau mea ua latou aoaoina mai nei vitio a o latou galulue faatasi i le Ekalesia?
Fai atu i talavou taitoatasi e faitau filemu parakalafa 6 ma le 7 o le “O Le Aiga: O Se Folafolaga i le Lalolagi” ma faailoa mai ni auala e galulue faatasi ai alii ma tamaitai e faataunuu le fuafuaga e faavavau a le Atua. Fai atu i le autalavou e faasoa mai mea ua latou maua. O anafea na latou vaaia ai ni faataitaiga a tane ma avā o mulimuili i le mataupu faavae i le folafolaga i le aiga? O le a se mea e mafai ona latou faia i le taimi nei e saunia ai ia maua ituaiga mafutaga faaleaiga ia ua faamatalaina i le folafolaga i le aiga?

Fai atu i le autalavou e faasoa mai mea ua latou aoaoina i le asō. Pe ua latou malamalama i le auala e galulue faatasi ai alii ma tamaitai i le Ekalesia? O a ni o latou lagona po o ni manatu? E i ai nisi a latou fesili faaopoopo? Mata e aoga le faaaluina o se isi taimi i lenei autu?

Motugaafa faafaiaoga

“O lau lava sauniuniga faaleagaga e tele sona sao i le atemosifia mo le aoaoina. Afai e te saunia faaleagaga, e te aumaia se agaga o le filemu, alofa, ma le faaaloalo. O i latou e te aoaoina o le a sili atu ona lagonaina le malupuipuia i le mafaufau loloto ma le talanoaina o mea e faavavau le aoga” (O Le Aoao Atu, E Leai Se isi Valaauga E Sili Ai [1999], 85).

Valaaulia e faatino

Fesili i le autalavou po o a ni mea ua musuia i latou e fai ona o mea sa latou aoaoina i le aso. Fautuaina i latou e faatino na lagona. Saili le Agaga a o e mafaufau ma le agaga tatalo i ni auala e mafai ai ona e tulitataoina.