O a upumoni faaleagaga e mafai ona ou aoaoina mai sauniga o le talalelei?

O sauniga e paia, o ni faatinoga aloaia o loo faia i lalo o le pule o le perisitua. O sauniga o ni faatusa o upumoni o le talalelei ma e o loo aoaoina ai i tatou i le ata o le faaolataga a le Tama Faalelagi ma le Togiola a Iesu Keriso. O sauniga o loo aoaoina ai foi i tatou po o ai i tatou ma faamanatu mai ia i tatou lo tatou tiute i le Atua. O le aoao e uiga i faatusa i sauniga e fesoasoani ia i tatou ina ia tatou malamalama atili atoatoa i le talalelei ma faamalosia lo tatou faatuatua ia Iesu Keriso.

Saunia oe lava ia faaleagaga

Mafaufau i sauniga ua e mauaina ma lou aiga (e pei o le papatisoga, faamanatuga, ma sauniga o le malumalu). O a upumoni o le talalelei ua e aoaoina mai nei sauniga?

Pe o faafetaia ea e le autalavou i lau vasega le taua o sauniga o le talalelei? Pe ua latou malamalama ea i le faatusa o le papatisoga ma le faamanatuga?

Ia suesue ma le agaga tatalo ia mau ma punaoa nei. O le a se mea e mafai ona aoao e le autalavou mai faatusa o loo i sauniga o le talalelei?

Luka 22:19–20; 3 Nifae 18:1–11 (O le faamanatuga e suitulaga i le tino ma le toto o le Faaola)

Roma 6:3–6; MF&F 76:51 (O le papatisoga i le faatofuina e faatusa i le maliu ma le toetu o Keriso ma lo tatou lava toefanauina faaleagaga)

MF&F 84:19–22 (O le mana faaleatua o loo faaalia e ala mai sauniga o le perisitua)

Boyd K. Packer, “O Le Malumalu Paia,” Ensign po o le Liahona, Oke. 2010, 29–35

Dennis B. Neuenschwander, “Sauniga ma Feagaiga,” Liahona, Aok. 2001, 20–26

“Faamanatuina o le Faaola ma Lana Togiola,” Faamaoni i le Faatuatua (2004), 45–46

“Sauniga,” Faamaoni i le Faatuatua (2004), 154–155

Aoao atu i le ala a le Faaola

Sa valaaulia e le Faaola isi e galulue i le faatuatua ma ola i upumoni sa Ia aoaoina atu. Na Ia maua avanoa mo Ona soo e aoao ai e ala atu i aafiaga mamana. E mafai faapefea ona e fesoasoani i le autalavou e aoao e uiga i le Togiola mai sauniga na latou auai?

Vitio: Fesoasoani Mai ia Matou Iloa le Talalelei

Matamata atili

Ia fai fesootaiga

Tagai i isi manatu e aoao mai ai ma aoao atu.

I nai minute muamua o vasega taitasi, fesoasoani i le au talavou e fai ni fesootaiga i le va o mea o loo latou aoaoina i tulaga eseese (e pei o suesuega faaletagata, seminare, isi vasega i le Lotu, po o aafiaga ma a latou uo). E faapefea ona e fesoasoani ia i latou ia iloa le manaomia o le talalelei i aso taitasi o le olaga? O manatu nei e ono fesoasoani ia te oe:

• Valaaulia soo se talavou na maua se avanoa e faamatala ai se upumoni faaleaoaoga faavae i se uo e faasoa mai le aafiaga i le vasega.

• Fai atu i le autalavou pe na i ai nisi o i latou po o tagata o o latou aiga na mauaina se sauniga talu ai nei (e pei o le papatisoga, faauuga i le perisitua, po o sauniga o le malumalu). Uunaia i latou e faasoa mai o latou aafiaga. O a mea na faagaeetia ai i latou e uiga i le sauniga?

Aoao faatasi

Tagai i isi manatu e aoao mai ai ma aoao atu.

O gaoioiga taitasi nei o le a fesoasoani i le autalavou ia maua upumoni faaleagaga i sauniga o le talalelei. I le mulimuli ai i le uunaiga a le Agaga, filifili se tasi pe sili atu e aoga mo lau vasega:

• Vaevae le vasega i ni vaega se lua.Tofi le tasi vaega e suesue po o le a le mea o faatusa i ai le papatisoga, ae tofi le isi vaega e suesue po o le a le mea o faatusa i ai le faamanatuga, e faaaogaina ai ia tusitusiga paia ma isi punaoa (e pei o mea na o loo fautuaina mai i lenei otootoga). O a mea o loo aoaoina mai e nei sauniga ia i latou e uiga i le Togiola? Fai atu i vaega taitasi e aoao atu ia mea sa latou aoaoina i le isi vaega o le vasega. E mafai ona latou faaaogaina ata 103–4 ma le 107–8 i le Tusi Ata o le Talalelei. Fesili i le autalavou pe faapefea e le malamalama i faatusa o nei sauniga ona aafia ai o latou manatu ma lagona i le isi taimi latou te auai atu ai i sauniga.

• Valaaulia le autalavou e faitau le vaega ua faaautuina “O se Auala e Iloa ai le Atua” mai le saunoaga a Elder Dennis B. Neuenschwander “O Sauniga ma Feagaiga,” ma vaai mo tali i le fesili “O a mea ua aoao mai e sauniga ia i tatou e uiga i le Atua?” Fai i ai e faasoa mai mea ua latou maua. Uunaia i latou e fesili ifo ia i latou lava i le fesili lenei i le isi taimi latou te molimauina ai pe auai i se sauniga ma tusi i lalo o latou manatu ma uunaiga e faasoa mai i se vasega o i le lumanai.

• O a nisi o upumoni po o mataupu faavae ua aoaoina i tatou e le Alii e ala mai sauniga o le papatisoga ma le faamanatuga? Uunaia le autalavou e vaai mo tali o le fesili lenei i mau o loo lisiina i lenei otootoga po o tusiga o le papatisoga ma le faamanatuga i le Faamaoni i le Faatuatua.

Fai atu i le autalavou e faasoa mai mea ua latou aoaoina i le aso. O a ni o latou lagona po o ni uunaiga? Pe latou te malamalama i le ala e maua ai upumoni faaleagaga i sauniga o le talalelei? Pe o i ai ni a latou fesili faaopoopo? Mata e aoga le faaaluina o se isi taimi i lenei autu?

Tomai e suesue ai le talalelei

Malamalama i faatusa. Ina ia malamalama i faataoto ma faatusa i tusitusiga paia, e manaomia e le autalavou le malamalama i faatusa, faailoa mai vaega o faatusa, ma faamatalaina o o latou uiga. O se tasi o auala e iloa ai se faatusa o le vaai lea mo upu e pei o faapei, faatusaina, e pei o, pei a, po o pei a sa. Ona fai lea e le autalavou o se lisi o vaega o le faatusa (e pei o le falaoa po o le vai). Ina ia faamatalaina faatusa, e mafai ona latou faasino i isi punaoa o le Ekalesia (e pei o mekasini a le Ekalesia, lauga o konafesi, po o isi tusitusiga paia) ma mafaufau pe o faapefea ona fesoasoani le faatusa ia i latou ina ia malamalama ai i se mataupu faavae o le talalelei. Uunaia i latou e fai lenei mea i soo se taimi lava latou te tau ai i se faataoto po o se faatusa ia latou suesuega patino faaletalalelei.

Valaaulia e faatino

Tagai i isi manatu e aoao mai ai ma aoao atu.

• Fautua atu i le autalavou e auai i se papatisoga ma se faamauga o loo loma. O faapefea ona aafia o latou manatu i le papatisoga ona o mea na latou aoaoina i le aso? E uiga i le fetagofi atu i le faamanatuga?

• Faasoa atu lau molimau e uiga i le mana o sauniga o le talalelei.