E faapefea ona fesoasoani le Tusi a Mamona e faamalosia lou faatuatua i le Togiola a Iesu Keriso?

O le faamoemoega autu o le Tusi a Mamona o le faatalitonuina lea o tagata o Iesu o le Keriso. Na te aoao mai e tatau ona tatou “o mai ia te Ia pe le mafai ona faaolaina i [tatou]” (1 Nifae 13:40). O loo maua ai le tele o faataitaiga o soo faatuatua na i ai le faatuatua ia Iesu Keriso ma maua faamanuiaga o Lana Togiola. Na tuuina mai e perofeta o le Tusi a Mamona ni molimau maoae i le Faaola, ina ia tatou “iloa po o le a le puna e mafai ona [tatou] tepa taulai i ai mo se faamagaloga o a [tatou] agasala” (2 Nifae 25:26).

Saunia oe lava ia faaleagaga

Na faapefea e le Tusi a Mamona ona aumaia oe ia latalata atili ia Iesu Keriso? O a nisi mau i le Tusi a Mamona na faamalosia ai lau molimau i le Faaola?

Na faapefea ona faamalosia e le Tusi a Mamona le faatuatua o le autalavou o loo e aoaoina? E faapefea ona latou faamalosia e le tasi le faatuatua o le isi ia Iesu Keriso e ala i le faaaogaina o le Tusi a Mamona.

A o suesueina ma le agaga tatalo tusitusiga paia, ae maise lava le Tusi a Mamona, o le a se mea e te manatu o le a fesoasoani e faamalosia ai lo latou faatuatua ia Iesu Keriso?

Itulau autu ma faatomuaga i le Tusi a Mamona

2 Nifae 25:26 (Ua tautalatala ma tusitusi Sa Nifae e uiga ia Keriso e faamalosia ai le faatuatua o a latou fanau)

3 Nifae 27:13–14 (Ua molimau atu le Faaola ia Sa Nifae i Lana misiona paia)

Neil L. Andersen, “O Le Tusi a Mamona: Faamalosia ai le Faatuatua ia Iesu Keriso,” Ensign po oLiahona, Oke. 2011, 39–45

Vitio: “Faatomuaga i le Tusi a Mamona”

Aoao atu i le ala a le Faaola

I soo se tulaga lava, na avea Iesu ma faataitaiga ma fautua ia i latou na Ia aoaoina. Na ia aoaoina i latou pe faapefea ona tatalo, aoao atu, alofa, ma auauna atu i le ala na Ia soifua ai. E faapefea e au faataitaiga ona musuia le autalavou o loo e aoaoina? O a aafiaga faaletagata e mafai ona e faasoa atu e mafai ona fesoasoani i le autalavou e iloa ai pe na faapefea ona faamalosia e le Tusi a Mamona lou faatuatua ia Iesu Keriso?

Ia fai fesootaiga

I nai minute muamua o vasega taitasi, fesoasoani i talavou e fai ni fesootaiga i le va o mea o loo latou aoaoina i tulaga eseese (e pei o suesuega faaletagata, seminare, isi vasega i le Lotu, po o aafiaga ma a latou uo). E faapefea ona e fesoasoani ia i latou ia iloa le manaomia o le talalelei i aso taitasi o le olaga? O manatu nei e ono fesoasoani ia te oe:

O a aafiaga na latou oo i ai e foliga mai na faamalosia ai mea ua latou aoaoina e uiga ia Iesu Keriso ma le Togiola?
Tuu atu i talavou e vaai faalemafaufau i se uo o fesili atu ia i latou pe o ni Kerisiano ia tagata Mamona. Tuu atu se lui ia i latou e faaaoga mau mai le Tusi a Mamona (e pei o mau ua fautuaina mai lenei otootoga) e tali ai le fesili lea.

Aoao faatasi

O gaoioiga taitasi nei e mafai ona fesoasoani i le autalavou e malamalama ai pe faapefea ona faamalosia e le Tusi a Mamona lo latou faatuatua ia Iesu Keriso. I le mulimuli ai i le taitaiga a le Agaga, filifili se tasi pe sili atu o le a sili ona aoga i lau vasega:

Tusi i le laupapa “E faapefea ona fesoasoani le Tusi a Mamona ia te au e faamalosia lo’u faatuatua i le Togiola a Iesu Keriso?” Vaevae le vasega i ni vaega laiti, ma tofi vaega taitasi e faitau se vaega o le tusiga a Elder Neil L. Andersen “O Le Tusi a Mamona: Faamalosia ai lo Tatou Faatuatua ia Iesu Keriso.” Valaaulia i latou e saili mo tali i le fesili i le laupapa. Fautuaina vaega taitasi e tuuina mai a latou tali i le vasega, faatasi ai ma se mau fesootai na latou iloa e taua mai la latou vaega na tofia i ai.
Faaali le vitio “Faatomuaga i le Tusi a Mamona.” Valaaulia le autalavou e galulue taitoalua e fuafua se vitio puupuu a i latou lava ia latou te faasoaina atu ai pe faapefea ona uunaia a latou molimau i le Faaola ma Lana Togiola e le Tusi a Mamona. E faapefea ona latou faamatalaina po o le a le Tusi a Mamona? O a fuaiupu po o tala o le a latou faasoaina atu? Fautuaina i latou e mafaufau ni auala o le a latou faasoaina atu ai nei vitio i isi.
Faatasi ai ma le faatagaga mai le epikopo, valaaulia se tagata faatoa liliu mai e faasoa mai sona aafiaga i le mauaina o se molimau i le Tusi a Mamona. Fai atu ia te ia e sau saunia e faasoa mai ni mau e fiafia i ai mai le Tusi a Mamona e uiga i le Togiola a Iesu Keriso. Na faapefea ona aumaia e le Tusi a Mamona o ia ia latalata atili atu i le Faaola? Na faapefea ona fesoasoani le tusi ia te ia e malamalama atili ai i Lana misiona? Valaaulia tagata o le vasega e faasoa atu a latou lava molimau ma mau e fiafia i ai e uiga ia Iesu Keriso mai le Tusi a Mamona.
Mafaufau faatasi, i faataitaiga o ni tagata i le Tusi a Mamona na salamo ma maua le faamagaloga o a latou agasala (e pei o Alema le Itiiti, Enosa, po o le Tupu o Lamonae). Faitau nisi o a latou tala i le Tusi a Mamona. O a mea ua aoao mai e nei aafiaga ia i tatou e uiga i le Togiola?

Fai atu i talavou e faasoa mai mea na latou aoaoina i le aso. Pe ua latou malamalama pe faapefea ona faamalosia e le Tusi a Mamona lo latou faatuatua i le Togiola? O a ni lagona ma uunaiga ua latou maua? Pe o i ai nisi a latou fesili? Pe mata e aoga le toe faaalu o se isi taimi i lenei autu?

Motugaafa faafaiaoga

“Molimau atu i soo se taimi lava e uunaia ai oe e le Agaga, ae le na o le faaiuga o le lesona. Saunia avanoa mo i latou o loo e aoaoina e fai ai a latou molimau” (O Le Aoao Atu, e Leai se Valaauga e Sili Ai [1999], 45).

Valaaulia e faatino

Valaaulia le autalavou e faaaoga le Tusi a Mamona e faamalosia ai lo latou faatuatua ia Iesu Keriso. Tuu atu ia i latou avanoa i vasega i le lumanai e faasoa mai ai mau latou te maua i le Tusi a Mamona o loo molimau ia Iesu Keriso ma Lana Togiola.
Tuu atu lau molimau i le Tusi a Mamona o se tasi molimau ia Iesu Keriso.