E mafai faapefea ona ou fesoasoani i isi ia aoao e uiga i le Tama Faalelagi?

E toatele tagata i le lalolagi i aso nei e le o i ai se manatu faavae e uiga i le Atua po o se vaaiga e uiga i le Atua e matua ese lava mai Lona natura moni. Ona ua i ai ia i tatou le atoaga o le talalelei, o lea ua mafai ai ona tatou fesoasoani atu i isi ia malamalama i le natura moni o le Tama Faalelagi ma lo latou sootaga ma Ia.

Saunia oe lava ia faaleagaga

O a ni ou aafiaga i le aoaoina o isi po o le aoaoina o oe e uiga i le Atua le Tama? Aisea e te manatu ai o le a aoga le malamalama i talitonuga o i latou e te aoaoina?

O a ni avanoa e maua e le autalavou e faamalamalama atu ai i isi o latou talitonuga e uiga i le Atua le Tama? E mafai faapefea ona e fesoasoani ia i latou ia saunia mo nei avanoa?

Suesue ma le agaga tatalo nei mau ma isi punaoa. O le a se mea e te lagona o le a sili ona aoga i le autalavou o loo e aoaoina?

Alema 18:24–40; 22:4–23 (Ua aoao e Amona ma Arona tupu o sa Lamana e uiga i le Atua)

Alema 30:12–15, 37–53 (Ua fefinauai Korioa ma Alema e uiga i le moni o le Atua)

“O Le Atua o Lo Tatou Tama Faalelagi Alofa,” Talai La’u Talalelei (2004), 31–32

“Le Atua le Tama,” Faamaoni i le Faatuatua (2004), 85–87

Aoao Atu i le Ala a le Faaola

Na silafia ma malamalama le Faaola ia i latou na Ia aoaoina. Sa Ia mauaina ni auala tulagaese e fesoasoani ai ia i latou e aoao ma tuputupu ae. O le a se mea ua e iloaina e uiga i le autalavou o loo e aoaoina? E mafai faapefea ona e malamalama atili ia i latou? O le a faapefea ona uunaia e lenei mea le ala e te aoaoina ai i latou?

Ia fai fesootaiga

I nai minute muamua lava o vasega taitasi, fesoasoani i le autalavou e faia fesootaiga i le va o mea latou te aoaoina i nofoaga eseese (e pei o suesuega faaletagata lava ia, seminare, isi vasega faale-Ekalesia, po o aafiaga ma a latou uo). E mafai faapefea ona e fesoasoani ia latou iloa le taua o le talalelei i o latou olaga i aso taitasi? E mafai ona fesoasoani manatu nei:

Fai atu i le autalavou e faasoa mai se mea na latou aoaoina talu ai nei e uiga i le Aiga Atua. O a ni fesili o ia i latou? E mafai faapefea ona latou fesoasoania’i e sue ni tali i a latou fesili?
Valaaulia le autalavou e faaalu se minute e tusi ai i lalo mea tatou te talitonu i ai e uiga i le Tama Faalelagi (a talafeagai ai, faasino atu i latou i le “O Le Atua o Lo Tatou Tama Faalelagi Agaalofa,” Talai La’u Talalelei, 31–32; po o le “Le Atua le Tama,” Faamaoni i le Faatuatua, 74–76). Valaaulia nisi o i latou e faasoa mai mea na latou tusia. Fai atu i le autalavou e faasoa mai soo se aafiaga na latou maua sa latou talanoaina ai o latou talitonuga e uiga i le Atua ma se tasi e ese ni ona talitonuga (pe faasoa atu foi sou lava oe ia aafiaga). O le a se mea na latou aoaoina mai lena aafiaga?

Aoao faatasi

O gaoioiga taitasi nei o le a fesoasoani i le autalavou e aoao ai i auala e faamalamalama atu ai i isi o latou talitonuga e uiga i le Atua. E ala i le mulimuli i le musumusuga a le Agaga Paia, filifili se tasi pe sili atu o mea nei o le a sili ona aoga mo lau vasega:

Ia iloilo o se vasega po o ni vaega laiti le Alema 30:12–15, 37–53. Fai atu i nisi o le autalavou e faailoa mai ni mafuaaga na le talitonu ai Korioa i le Atua, ma fai atu i le isi vaega o totoe e tagai mo ni mafuaaga na talitonu ai Alema. Pe o iloaina e le autalavou ni tagata e tutusa ni o latou manatu ma Korioa? Valaaulia le autalavou e mafaufau pe mafai faapefea ona latou fesoasoani i se uo e le o mautinoa e uiga i le moni o le Atua. Faaalu sina taimi e fesoasoani ai i le autalavou e fuafua po o le a se mea e mafai ona latou faia i lenei tulaga. O a ni aafiaga e mafai ona latou faasoa atu? E mafai faapefea ona latou tuu atu ma le talafeagai se molimau?
Valaaulia le afa o le vasega e faitau le Alema 18:24–40, ma valaaulia le isi afa e faitau le Alema 22:4–23. O a ni mea ua latou aoaoina mai faataitaiga a Amona ma Arona? O le a le mea na faia e Amona ma Arona na fesoasoani ai ia Lamonae ma lona tama e malamalama ai i le natura o le Atua? Aisea na amata fesili uma ai Amona ma Arona ia Lamonae ma lona tama e uiga i o la talitonuga e uiga i le Atua? Fai atu i le autalavou e faasoa mai mea ua latou aoaoina ma talanoaina pe mafai faapefea ona latou faaaogaina pe a latou maua ni avanoa e faamalamalama atu ai i isi o latou talitonuga e uiga i le Atua.
Faatasi ai ma le faatagaga a le epikopo, ia valaaulia se tasi pe sili atu o tagata liliu mai e o mai i le vasega ma faasoa mai mea na latou talitonu i ai e uiga i le Atua a o lei auai i le Ekalesia ma le auala na suia ai pe sa uunaia ai e le aoaoina o le talalelei toefuataiina o latou talitonuga. Valaaulia le autalavou e sue ni mau o loo lagolago ai le malamalamaaga fou lea na maua e tagata liliu mai e uiga i le Tama Faalelagi.

Fai atu i le autalavou e faasoa mai mea na latou aoaoina i le asō. O a ni lagona po o ni uunaiga ua latou maua? Pe ua latou malamalama i le auala e fesoasoani ai i isi e aoao e uiga i le Tama Faalelagi? O i ai nisi a latou fesili? Pe aoga le toe faaalu o se isi taimi i lenei autu?

Motugaafa faafaiaoga

“Ia tali atu ma le faaaloalo ma le migao i tali sese. Ia mautinoa o loo lagona pea e le tagata le fiafia e auai. E mafai ona e filifili e te tauaveina le tiutetauave i lou tuuina atu o se faamatalaga faapea, “Ou te faamalie atu. Ou te manatu e le’i manino lo’u tuuina atu o lena fesili. Se’i ou toe taumafai atu’” (O Le Aoao Atu, E Leai Se Isi Valaauga e Sili Ai [1999], 69).

Valaaulia e faatino

Fesili i le autalavou po o a ni mea ua musuia i latou e fai ona o mea sa latou aoaoina i le asō. Fautuaina i latou e faatino na lagona. Saili le Agaga a o e mafaufau ma le agaga tatalo i ni auala e mafai ai ona e tulitataoina.