Aisea e taua ai le aoao atu o aoaoga faavae mama?

I tausaga na sosoo mai ma le maliliu o le uluai Aposetolo e Toasefululua, sa amata ai e tagata ona faalagolago i lo latou lava poto e faamatala ai tusitusiga paia. O le taunuuga, sa aoaoina ai aoaoga faavae sese, ma pau atu ai le Ekalesia i le Liliuese. I le avea ai ma faiaoga o le talalelei, ua i ai sa tatou tiutetauave e aoao atu upumoni o le talalelei toefuataiina i lo latou mama ina ia tatou le taitaiseseina se tasi. A malamalama i latou o loo tatou aoaoina i aoaoga faavae moni, e ootia o latou loto ma sui ai o latou uiga faaalia ma amioga (tagai Boyd K. Packer, “Aua le Fefe,” Ensign po o le Liahona, Me 2004, 79).

Saunia oe lava ia faaleagaga

I le avea ai o oe ma se faiaoga, e faapefea ona e faamautinoa o loo e aoao atu aoaoga faavae mama? O anafea na e lagonaina ai le mana lea e sau mai le aoao atu o aoaoga faavae mama?

Pe o iloa e le autalavou o loo e aoaoina le mana o aoaoga faavae mama? E mafai faapefea ona e fesoasoani ia i latou ia mautinoa atili o latou gafatia e aoao atu aoaoga faavae mama?

Suesue i mau ma punaoa o loo i lalo. O le a se mea e te lagona ua uunaia ai oe e faasoa atu i le autalavou?

Luka 24:32; Iosefa Samita—Talafaasolopito 1:11–12 (Aoao atu mai tusitusiga paia e pai atu i loto)

2 Timoteo 4:3–4 (Ua vavalo Paulo e uiga i aoaoga faavae sese sa aoaoina)

Mosaea 18:19 (O mau ma saunoaga a perofeta o punavai na o aoaoga faavae mama)

Alema 4:19; 31:5 (O le afioga a le Atua e mamana)

Moronae 10:5 (O le Agaga Paia e molimau mai i upumoni)

D. Todd Christofferson, “O Le Mataupu Faavae a Keriso,” Ensign po o le Liahona, Me 2012, 86–90

Aoao atu i le ala a le Faaola

Sa faaaoga e le Faaola ia mau e aoao atu ai ma molimau atu e uiga i Lana misiona. Sa Ia faamamafaina soo ma aoao atu aoaoga faavae mama. E mafai faapefea ona e fesoasoani i le autalavou e faaaoga tusitusiga paia e iloa ai aoaoga faavae mama ma aoao atu ai i isi?

Ia fai fesootaiga

I nai minute muamua lava o vasega taitasi, fesoasoani i le autalavou e faia fesootaiga i le va o mea latou te aoaoina i nofoaga eseese (e pei o suesuega faaletagata lava ia, seminare, isi vasega faale-Ekalesia, po o aafiaga ma a latou uo). E mafai faapefea ona e fesoasoani ia i latou ia iloa le taua o le talalelei i o latou olaga i aso taitasi? E mafai ona fesoasoani manatu nei:

Fai atu i le autalavou e faasoa mai se aafiaga lea sa faapea ona latou lagonaina ai le Agaga a o aoao atu se tasi e uiga i le talalelei.
Aumai se ipu vai mama ma se ipu vai palapala i le vasega. Ia fautua atu e faapea o le vai e mafai ona faatusa i le talalelei lea tatou te aoaoina atu i isi. Afai o le vai mama e faatusa i le talalelei mama, o le a le mea e faatusa i ai le vai palapala? O a nisi o mea e mafai ona faaleagaina ai aoaoga faavae mama o le talalelei? E mafai faapefea e lenei ata faatusa ona fesoasoani i le autalavou ia malamalama i le taua o le aoaoina atu o aoaoga faavae mama?

Aoao faatasi

O le a fesoasoani gaoioiga taitasi nei i le autalavou e aoao ai e uiga i le taua o le aoao atu o aoaoga faavae mama. I le mulimuli ai i le taitaiga a le Agaga, filifili se gaoioiga se tasi pe sili atu o le a sili ona aoga mo lau vasega:

Fai atu i le autalavou e fai se lisi o auala o loo taumafai le lalolagi e sui ai amioga a tagata. Ona fai lea i ai e faitau le Alema 4:19 ma le 31:5, ma vaavaai mo le auala a le Alii e uunaia ai isi. A uma ona faasoa mai mea ua latou maua, fai atu i ai e sue i tusitusiga paia mo faataitaiga o tagata o e sa suia o latou loto ona sa aoaoina i latou i aoaoga faavae moni. Fai atu i le autalavou e faasoa mai ni faataitaiga o mataupu faavae o le talalelei sa latou aoaoina ua faatosinaina ai a latou amioga.
Fesoasoani i le autalavou e vaavaai i tusitusiga paia mo faataitaiga o tagata o e sa aoaoina atu aoaoga faavae sese (mo se faataitaiga, Serema [tagai i le Iakopo 7], Korioa [tagai i le Alema 30], po o sa Sorama [tagai i le Alema 31]). O le a se aafiaga o a latou aoaoga i tagata? O a aoaoga faavae sa aoao atu e auauna a le Alii e tali atu ai? O a ni aoaoga sese talitutusa ua fetaiai ma le autalavou i le lalolagi i aso nei? E mafai faapefea ona tali atu le autalavou ma aoao atu aoaoga faavae mama?
Fai atu i le autalavou e faitau le 2 Timoteo 3:2–4 ma le 2 Nifae 9:28–29. O faapefea ona faataunuuina nei mau i o tatou aso? O a nisi o aafiaga o aoaoga faavae sese ua tatou vaaia i le lalolagi ua siomia ai i tatou? (mo nisi o faataitaiga, tagai i le 2 Timoteo 3:1–5). O le fea mataupu faavae o le talalelei toefuataiina e mafai ona fesoasoani e foia ai nei aafiaga?

Fai atu i le autalavou e faasoa mai mea ua latou aoaoina i le aso. Pe ua latou malamalama i le taua o le aoao atu o aoaoga faavae mama? O a ni o latou lagona po o ni manatu? E i ai nisi a latou fesili faaopoopo? Mata e aoga le faaaluina o se isi taimi i lenei autu?

Motugaafa faafaiaoga

“E le tatau ona tatou faauigaina ia faamatalaga i taitai o le Ekalesia e aunoa ma le faamautuina o le faapogai o faamatalaga. Afai tatou te sii maia mau, e tatau ona tatou mautinoa o lo tatou faaaogaina o na mau e ogatasi lea ma la latou matalalaga” (O Le Aoao Atu, E Leai Se Isi Valaauga E Sili Ai [1999], 55).

Valaaulia e faatino

Fai atu i le autalavou e mafaufau i so latou avanoa o loo loma e aoao atu ai. Uunai i latou e fuafua po o le a se mea o le a latou faia e mautinoa ai latou te aoao atu aoaoga faavae mama.