E faapefea e le tausia o poloaiga ona aafia ai lou tomai e aoao le talalelei?

O le aoaoina o le talalelei e manaomia ai le musumusuga a le Agaga Paia. E mafai e le Agaga Paia ona faamalamalama lo tatou malamalamaaga ma molimau i upu moni o le talalelei. Ina ia agavaa ai mo Lana aafiaga, e tatau ona tatou usiusitai i poloaiga. A o tatou usiusitai i mataupu faavae ua tatou aoaoina, ua tatou sauniaina i tatou lava e maua upumoni faaopoopo mai le Alii.

Saunia oe lava ia faaleagaga

O faapefea ona fesoasoani le tausiga o poloaiga ia te oe o se tagata suesue o le talalelei? O a aafiaga ua e oo i ai e faatatau i le usiusitai ma e mafai ona e faasoa atu i le autalavou o i lau vasega?

E mafai faapefea ona e fesoasoani i le autalavou ina ia latou iloa le fesootaiga i le va o le usiusitai ma le musumusuga a le Agaga?

Ia suesue ma le agaga tatalo ia mau ma punaoa nei. O le a se mea o le a fesoasoani i le autalavou e malamalama ai pe faapefea e le tausia o poloaiga ona aafia ai lo latou tomai e aoao ai i le talalelei?

Tanielu 1 (Ua faamanuiaina Tanielu ma ana soa ona o lo latou usiusitai ma le atamai ma le malamalama); tagai foi i le vitio “Na Tuu Atu e le Atua ia i Latou le Poto”

Ioane 7:17 (Afai tatou te faia le finagalo o le Atua, o le a tatou iloa le aoaoga faavae)

2 Nifae 28:30; MF&F 42:61; 50:24 (Afai tatou te faalogo i le Alii, o le a tatou maua le malamalama ma le poto sili)

MF&F 76:5–10 (E faamamaluina e le Alii i latou o e auauna atu ia te Ia)

Thomas S. Monson, “O le Usiusitai e Aumaia ai Faamanuiaga,” Ensign po o le Liahona, Me 2010, 65.

Henry B. Eyring, “O Se Molimau Ola,” Ensign po o le Liahona, Me 2011, 125–28

Richard G. Scott, “E Faapefea ona Maua Faaaliga ma Musumusuga mo Lou Lava Olaga Patino,” Ensign po o le Liahona, Me 2012, 45–47

Aoao atu i le ala a le Faaola

Sa faasoa atu e le Faaola ni tala faigofie, faataoto, ma ni faataitaiga moni i le olaga sa malamalama i ai ona soo. O a tala mai tusitusiga paia, mai tala faasolopito o le Ekalesia, pe e mai lou olaga e mafai ona e faasoa atu ma le autalavou e faailoa ai o le usiusitai i poloaiga e mafai ona fesoasoani e faaleleia ai lo latou malamalamaaga e uiga i le talalelei?

Ia fai fesootaiga

Tagai i isi manatu e aoao mai ma aoao atu ai.

I nai minute muamua lava o vasega taitasi, fesoasoani i le autalavou e faia fesootaiga i le va o mea latou te aoaoina i nofoaga eseese (e pei o suesuega faaletagata lava ia, seminare, isi vasega faale-Ekalesia, po o aafiaga ma a latou uo). E mafai faapefea ona e fesoasoani ia i latou ia iloa le taua o le talalelei i o latou olaga i aso taitasi? E mafai ona fesoasoani manatu nei:

• Fesili i le autalavou pe i ai ni a latou fesili po o ni faamatalaga e uiga i mea o loo latou aoaoina i isi a latou vasega. Valaaulia i latou e faasoa mai mea e iloa e le tagata lava ia po o ni lagona ua latou maua mai mea ua latou aoaoina.

• Tusi i le laupapa, “E faapefea ona aafia e le usiusitai lou tomai e aoao ai i le talalelei? Tuu atu i le autalavou ni nai minute e mafaufau loloto ai i lenei fesili, ona fai atu lea ia i latou e faasoa mai o latou manatu. Uunaia i latou e faaauau ona mafaufau e uiga i lenei fesili i le faagasologa o le lesona.

Aoao faatasi

Tagai i isi manatu e aoao mai ma aoao atu ai.

O gaioiga taitasi o loo i lalo o le a fesoasoani i le autalavou ina ia malamalama pe faapefea e lo latou usiusitai i poloaiga ona aafia ai lo latou tomai e aoao i le talalelei. I le mulimuli ai i le Agaga, filifili se tasi pe sili atu e aoga mo lau vasega:

• Avatu i tagata o le vasega ni kopi o parakalafa muamua e 11 o le saunoaga a Peresitene Thomas S. Monson “O Le Usiusitai e Aumaia ai Faamanuiaga,” ma valaaulia i latou e tusi ni nai fuaiupu e aotele mai ai le autu o le savali a Peresitene Monson. Ao faasoa atu e tagata o le vasega a latou fuaiupu, uunaia i latou e faasoa atu le mafuaaga latou te lagona ai le taua o lenei savali i le autalavou i lenei vaitaimi.

• Faitau faatasi e le vasega le Tanielu 1 pe matamata i le vitio “Ua Tuu Atu e le Atua ia i Latou le Poto.” Na faapefea ona faaalia e Tanielu ma ana uo le usiusitai? Na faapefea ona faamanuiaina i latou? O a aafiaga o loo feagai ma le autalavou e tali tutusa ma aafiaga oTanielu? Valaaulia talavou taitasi e faitau e uiga i se tasi tagata i tusitusiga paia sa faamanuiaina i le poto ma le malamalama ona o lona usiusitai (e pei o Nifae i le 1 Nifae 4 po o Iosefa Samita i le Iosefa Samita—Talafaasolopito 1:11–17). Fai atu ia latou e tusi se aotelega puupuu o mea sa latou faitau i ai ma aoao atu i le vasega atoa e uiga i le ala na mafai ai ona faamanuiaina le tagata ua latou filifilia i le poto ma le malamalama ona o le usiusitai.

• Valaaulia talavou taitasi e filifili se tasi o fuaitau o mau nei: Ioane 7:17; 2 Nifae 28:30; MF&F 50:24. Fai i le autalavou e faitau la latou fasifuaitau ma mafaufau loloto i mea o loo aoao ai i latou e uiga i le usiusitai ma le aoaoina o le talalelei. Ona valaaulia lea o i latou e saili se tagata o le vasega na filifilia se isi mau e ese mai ai ma faasoa atu i isi ni mea sa latou aoaoina.

• Tuu atu i le autalavou se moliuila e le ola, ma valaaulia i latou e suesue i ai ina ia iloa le mafuaaga ua le mafai ai ona maua se malamalama. Faasoa atu le faamatalaga lenei mai le saunoaga a Elder Richard G. Scott “E Faapefea ona Maua ia Faaaliga ma Musumusuga mo Lou Olaga Patino ”: “E tatau i se tagata ona mama faalemafaufau ma faaletino ma ia mama faamoemoega ina ia mafai ai ona musuia o ia e le Alii. O se tagata e usitai i Ana poloaiga ua faatuatuaina e le Alii. O lena tagata na te mauaina Ana musumusuga e iloa ai le mea e fai, ma a manaomiaina, e oo mai le mana po o le malosiaga faalelagi e fai ai.…E faamautinoa mai e lo tatou usiusitai pe a manaomia, e mafai ona agavaa i tatou mo le mana faalelagi e ausia ai se faamoemoega musuia” (itulau 47).E faapefea e le moliuila malepe ona faailoa mai ia mataupu faavae ua aoao mai e Elder Scott i lenei saunoaga? Valaaulia le autalavou e mafaufau loloto i mea e tatau ona latou faia ina ia “faatuatuaina e le Alii” ma maua ai faaaliga mai ia te Ia. Fai atu i se vaega toalaiti o i latou e faasoa mai ni o latou manatu.

• Valaaulia le autalavou e faitau se vaega o le lauga a Peresitene Henry B. Eyring “O se Molimau Ola,” mai le palakalafa e amata i le “O lea o le fatu o le faatuatua ua uma ona toto…” seia oo i le palakalafa e amata i le “O ou lagona o le olioli na oo mai….”Na faapefea ona fesoasoani le usiusitai o Peresitene Eyring e faamalosia lana molimau? O a ni mea faapitoa e mafai e le autalavou ona fai e mulimuli ai i le faataitaiga a Peresitene Eyring?

Fai atu i le autalavou e faasoa mai mea ua latou aoaoina i le aso. Pe o latou malamalama o le tausia o poloaiga e aafia ai lo latou tomai e aoao ai le talalelei? O a ni o latou lagona po o ni uunaiga? Pe o i ai ni a latou fesili faaopoopo? Mata e aoga le faaaluina o se isi taimi i lenei autu?

Tomai e suesue ai le talalelei

Aotelega.I le gaoioiga muamua i lenei vaega, ua valaaulia le autalavou e tusi se aotelega o se tala faatusipaia sa latou faitau i ai.Uunaia le autalavou ia faia foi lenei mea i taimi o a latou suesuega o tusitusiga paia faaletagata lava ia.E mafai ona latou tusia ni o latou lagona, le aoaoga faavae o loo aoaoina, o mea na tutupu, o tagata na aafia ai, ma isi mea faapena.E mafai ona latou fesili ia i latou lava, “O le a le mea o loo taumafai le Alii e faamamafa mai ma aisea?Pe e i ai se mea o loo i nei fuaiupu e faatatau tonu ia te au?

Vitio: “Faaaogaina o Fesoasoaniga Vaaia”

Matamata atili

Valaaulia e faatino

Tagai i isi manatu e aoao mai ai ma aoao atu.

Fai atu i se vaega toalaiti o le autalavou e fai se aotelega o mea sa latou aoaoina i le aso e faatatau i le fesootaiga i le va o le tausia o le poloaiga ma le aoaoina o le talalelei. Valaaulia i latou e mafaufau i mea latou te mafai ona fai po o le taofia ona fai e ono mafai ona fesoasoani e faaleleia ai lo latou tomai e aoaoina ai e le Agaga Paia. Uunaia i latou e tusi o latou manatu i a latou api o talaaga patino.