Eseta: E mafai faapefea ona ou faasoa atu lau molimau i le Toetu a Iesu Keriso?

I Aso Sa o le Eseta tatou te faamanatu ai, faatasi ma isi tagata Kerisiano, le mea sili ona taua na tupu i le talafaasolopito o le lalolagi—o le Toetu o Iesu Keriso. Sa Ia motusia “noataga o le oti, o le a leai ai se manumalo o le tuugamau, ma o le a tofatumoanaina le tui o le oti i faamoemoega o le mamalu” (Alema 22:14). O Lona Toetu o le taunuuga lea o Lana taulaga togiola, lea na Ia manumalo ai i agasala ma le oti mo tagata uma. A tatou faasoa atu a tatou molimau e uiga i le Toetu o le Faaola, e mafai ona tatou fesoasoani atu i isi ia maua le filemu ma le faamoemoe.

Saunia oe lava ia faaleagaga

O a ni mau po o aoaoga a perofeta o aso e gata ai na faamalosia a latou molimau e uiga i le Toetu a Iesu Keriso? Na faapefea ona faatosinaina e lenei molimau lou olaga? O anafea na e faaaoga ai nei mau po o aoaoga e fesoasoani atu ai i isi e faamalosia a latou molimau?

O anafea na e faalogo ai i le autalavou o molimau e uiga i le Faaola? O le a se mea e mafai ona e faia e uunaia ai i latou e faasoa atu i isi a latou molimau?

Ia suesue ma le agaga tatalo ia punaoa nei. O le a se mea e te lagona o le a uunaiaina le autalavou ina ia molimau atu e uiga i le Toetu o le Faaola?

Luka 24; Ioane 20 (Ua toetu Iesu Keriso)

3 Nifae 11:1–17 (Na faailoa atu le Faaola toetu ia sa Nifae)

MF&F 76:22–24; Iosefa Samita—Talafaasolopito 1:16–17 (Molimau a Iosefa Samita i le Faaola toetu)

Thomas S. Monson, “Ua Toetu o Ia!” Ensign po o le Liahona, Me 2010, 87–90

D. Todd Christofferson, “O Le Toetu o Iesu Keriso,” Ensign po o le Liahona, Me 2014

“O Le Keriso Soifua: O Le Molimau a Aposetolo,” Ensign, Apr. 2000, 2–3

Vitio: “Ona O Ia”, “O Loo Soifua o Ia - Faamanatu le Eseta Ona o Loo Soifua Iesu Keriso”, “O Le Alii o le Filemu: Mauaina o le Filemu Tumau e ala ia Iesu Keriso”

Aoao atu i le ala a le Faaola

Na faaaoga e le Faaola ia tusitusiga paia e aoao atu ai ma molimau atu ai e uiga i Lana misiona. Na ia aoaoina tagata e mafaufau i tusitusiga paia mo i latou lava ma faaaoga [tusitusiga paia] e saili ai tali o a latou lava fesili. E mafai faapefea ona e fesoasoani i le autalavou ia iloa le mamana o molimau o loo i ai i tusitusiga paia?

Ia fai fesootaiga

I nai minute muamua o vasega taitasi, fesoasoani i le autalavou e fai ni fesootaiga i le va o mea o loo latou aoaoina i tulaga eseese (e pei o suesuega faaletagata, seminare, isi vasega i le Lotu, po o aafiaga ma a latou uo). E mafai faapefea ona e fesoasoani ia i latou ia iloa le manaomia o le talalelei i aso taitasi o le olaga? O manatu nei e ono fesoasoani ia te oe:

Valaaulia le autalavou e faasoa mai le auala na latou faaaoga ai mea sa latou aoaoina i le vasega o le vaiaso ua tea i le taualumaga o le vaiaso.
Fai atu i le autalavou e faasoa mai se aafiaga lea sa faamalosia ai i latou i se molimau a se tasi ia Iesu Keriso.

Aoao faatasi

O le a fesoasoani gaoioiga taitasi nei e uunaia le autalavou e faasoa atu i isi a latou molimau e uiga i le Toetu. I le mulimuli ai i le taitaiga a le Agaga, filifili se tasi pe sili atu e aoga mo lau vasega:

Faaali ia vitio o loo fautuaina mai i lenei otootoga, ma fai atu i le autalavou e faasoa mai ni o latou manatu ma lagona e uiga i le Faaola i le tasi ma le isi. Uunaia le autalavou e faasoa atu se tasi o vitio nei i tagata o latou aiga, uo, faapea ma isi. I se vasega i le lumanai, valaaulia i latou e faamatala mai ni o latou aafiaga e uiga i le faasoaina atu o nei savali, e aofia ai tali na latou mauaina.
Valaaulia le autalavou e sue ma faasoa mai ni mau (e pei o mau na o loo lisiina atu i lenei otootoga) latou te faaaogaina e fesoasoani ai i isi e faamalosia a latou molimau e uiga i le Toetu a Iesu Keriso. Uunaia le autalavou e fai se lisi o mau o loo faasoaina i totonu o le vasega ina ia mafai ona latou toe faasino i ai.
Valaaulia le autalavou e faitau “O Le Keriso Soifua” po o se tasi o lauga o le konafesi aoao o loo fautuaina atu i lenei otootoga, ma vaavaai ai mo ni faamatalaga latou te lagona o tuuina mai ai se molimau malosi i le Toetu o le Faaola. Fai atu ia i latou e faasoa atu i le tasi ma le isi ia faamatalaga sa latou maua ma ia faamatala pe aisea e anoa ai. Fai atu i le autalavou e talatalanoa pe aisea latou te lagona ai e taua le i ai o perofeta ma aposetolo soifua o e molimau mai i le Toetu. Tuu atu lau oe lava molimau i le Toetu, ma valaaulia le autalavou ia faia lea lava mea e tasi.
Tuu atu se taimi i le autalavou e tusi ai i lalo ni auala se tolu po o le sili atu foi o loo faia ai e le Toetu a Iesu Keriso se eseesega i o latou olaga. Valaaulia tamaiti e faasoa mai mea na latou tusia. Tuu atu ia i latou ni kopi o le lauga a Elder D. Todd Christofferson “O Le Toetu o Iesu Keriso,” ma fai atu ia i latou e vaavaai mo nisi mea e mafai ona latou faaopoopoina i le latou lisi. Valaaulia i latou e mafaufau i se tasi e tatau ona iloa le Toetu a le Faaola, ma faamalosiau atu ia i latou e fuafua pe o le a faapefea ona tuuina atu le molimau i lena tagata.

Fai atu i le autalavou e faasoa mai mea ua latou aoaoina i le aso. O latou lagona le uunaia e faasoa atu i isi a latou molimau e uiga i le Toetu? O a ni o latou lagona po o ni uunaiga? Pe o i ai ni a latou fesili faaopoopo? Mata e aoga le faaaluina o se isi taimi i lenei autu?

Valaaulia e faatino

Fesili i le autalavou po o a ni mea ua musuia i latou e fai ona o mea sa latou aoaoina i le aso. Fautuaina i latou e faatino na lagona. Mafaufau i ni auala e mafai ai ona e tulitataoina.