O le a le matafaioi a le faitalia i le aoaoina o le talalelei?

Na fausia e le Tama Faalelagi i tatou o ni sui e gaoioi, ae le o ni meafaitino e tau faamalosia (tagai i le 2 Nifae 2:26). O lenei aoaoga faavae e faatatau i tulaga uma o lo tatou olaga faitino, e aofia ai a tatou taumafaiga e aoao le talalelei.E ao ia i tatou taitoatasi ona aoao le talalelei mo i tatou lava—e leai se isi e mafai ona aoaoina le talalelei mo i tatou.O le aoaoina o le talalelei e tatau ona avea o se aafiaga e faatino, ae le o se mea e na ona mafaufau i ai.Pe a tatou faaaogaina la tatou faitalia e saili ai ma le filifiliga le upumoni, e faamanuia e le Alii i tatou i le malamalama ma le poto faateleina.

Saunia oe lava ia faaleagaga

Mafaufau i se mea na e aoaoina talu ai nei. O le a le mea sa e faia e aoaoina ai lena mea? O le a se lagona na e mauaina?

O a nisi o auala eseese e mafai ai e talavou ona auai i le aoaoina o le talalelei?

O ai o lau vasega e foliga mai e auai malosi i le aoaoina? O ai e le o auai malosi? E mafai faapefea ona outou galulue faatasi ma isi faiaoga e uunaia le autalavou ina ia auai malosi i le aoaoina, i le taimi o le vasega, faapea pe a na o i latou?

Suesue punaoa o loo i lalo. O a fuaitau po o faataitaiga e mafai ona e faaaogaina e fesoasoani ai i talavou ia malamalama i le uiga o le auai malosi i le aoaoga?

Ioane 7:17 (E ao ona tatou faia le finagalo o le Tama Faalelagi ina ia iloa ai Lana mataupu)

Iakopo 1:22 (Ia fai ma e anaana i le upu, ae le na ona faalogologo i ai)

1 Nifae 10:19 (Afai tatou te saili ma le filiga le upumoni, o le a tatou mauaina)

2 Nifae 2:26 (E ao ona tatou galulue, ae le faamalosia)

MF&F 50:24 (Pe a tatou mauaina le upumoni ma galulue i ai, o le a tatou maua le upu moni sili atu)

MF&F 88:118 (Tatou te sailia le aoaoina e ala i le suesue ma le faatuatua)

David A. Bednar, “Saili e A'oa'o i le Faatuatua,” Ensign, Sept. 2007, 61–68

Aoao atu i le ala a le Faaola

Na faaaoga e le Faaola tala faigofie, faataoto, ma faataitaiga o mea moni e tutupu pe a Ia aoao atu. Sa Ia fesoasoani i isi ia maua lesona o le talalelei i o latou lava aafiaga. Faamata o le a faapefea ona e fesoasoani i le autalavou e vaai i faataitaiga o mea o loo e aoaoina atu i o latou lava olaga?

Ia fai fesootaiga

I nai uluai minute o vasega taitasi, fesoasoani i le autalavou e faia fesootaiga i le va o mea o loo latou aoaoina i tulaga eseese (e pei o se suesuega faaletagata lava ia, seminare, isi vasega a le Ekalesia, po o aafiaga ma a latou uo). E mafai faapefea ona e fesoasoani ia i latou ia iloa le faatatauga o le talalelei i olaga o aso faisoo? Atonu e mafai ona fesoasoani manatu o loo i lalo ia te oe:

Valaaulia le autalavou e faia se lisi o mea na latou aoaoina i le seminare, sauniga faamanatuga, a latou suesuega faaletagata lava ia, po o isi tulaga. Talanoaina faatasi e le vasega le auala e fesootai ai nei mea uma i le ata o le faaolataga.
Valaaulia le autalavou e faamatala se lesona na latou fiafia i ai, lea na latou auai malosi ai (mo se faataitaiga, afiafi faaleaiga, o se asiasiga faaleaiga, o se vasega o le Aoga Sa, po o le Peraimeri). O le a le mea na latou faia e auai ai? Na faapefea e le faia o o latou sao ona fesoasoani ia i latou e sili atu ai lo latou aoaoina? O a nisi auala e tofu sao ai i aoaoga? (Atonu e te faasino atu faapea o le faia o faamatalaga i le taimi o le vasega, e le na o le pau lea o le auala e auai ai i le faatinoina.)

Aoao faatasi

O gaoioiga taitasi o loo i lalo o le a fesoasoani e musuia le autalavou ina ia auai ma le malosi i le aoaoina o le talalelei. E ala i le mulimuli ai i le taitaiga a le Agaga, filifili se tasi po o le sili atu o le a sili ona lelei mo lau vasega:

Uunai le autalavou e faasoa mai nisi o faataitaiga i totonu o tusitusiga paia o tagata, o e na saili ma le malosi e aoao e uiga i le talalelei (tagai i le, mo le faataitaiga, 1 Nifae 2:14–16 [Nifae], Mataupu Faavae ma Feagaiga 138:1–11 [Iosefa F. Samita], ma le Talafaasolopito o—Iosefa Samita 1:10–18 [Iosefa Samita]). O a mataupu faavae o le aoaoina mai o le talalelei e mafai e le autalavou ona maua, a o latou faitau e uiga i nei faataitaiga? (Mo le faataitaiga, na faalogo Nifae i mea na aoao atu e lona tama, na i ai lona manao ia iloa mo ia lava, ma sa galue e tusa ma lena manao.) O a mea e mananao le autalavou e aoao e uiga i le ata o le faaolataga? E mafai faapefea ona latou faaaogaina nei mataupu faavae e taitai ai lo latou aoaoina?
Valaaulia le autalavou e faitau le vaega ua faaulutalaina “Aoao e ala i le Faatuatua: E filifili mo I Latou lava Ae Le Galueaiina,” mai le tusitusiga a Elder David A. Bednar“Saili e Aoao e Ala i le Faatuatua.” Fai atu ia i latou e vaavaai mo mea o loo fautuaina mai e Elder Bednar e mafai ona latou faia e sili ona pulea ai e i latou lava lo latou aoaoina o le talalelei. O le a le mea o le a latou faia e faaaoga ai lana fautuaga i a latou lava taumafaiga e aoao i le ata o le faaolataga?
Tusi mau faasino mai lenei otootoga i le laupapa. Valaaulia tagata taitasi o le vasega e filifili se mau se tasi e faitau i ai, ma vaavaai mo tali i le fesili lenei: O a faamanuiaga e oo mai i le auai malosi i le aoaoga? Fai atu i le autalavou e faasoa mai mea latou te mauaina. Valaaulia i latou e taitoatasi ma faauma le fuaiupu lenei. “Ua ou fuafua ina ia auai malosi i le aoaoina o le talalelei e ala i le …” Fai atu i ni nai talavou e faasoa mai a latou fuafuaga i le vasega.
Valaaulia le autalavou e faitau le Mataupu Faavae ma Feagaiga 58:26–28, ma vaavaai mo auala atonu e faaaoga ai le fautuaga a le Alii i la latou matafaioi, i le avea ai ma tagata aoao o le talalelei. Fai atu ia i latou e lisi nisi o filifiliga e ao ona latou faia, i le avea ai ma tagata aoao (e pei o le, pe tatau ea pe leai, ona ou faia se faamatalaga i totonu o le vasega, po o le, pe faapefea ona saunia faaleagaga mo le vasega). O a nisi o taunuuga o nei filifiliga?

Fai atu i le autalavou e faasoa mai mea na latou aoaoina i lenei aso. O latou malamalama ea i le matafaioi a le faitalia i le aoaoina o le talalelei? O a lagona po o uunaiga ua latou mauaina? E i ai nisi a latou fesili? Mata e aoga le faaalu o se isi taimi i lenei mataupu?

Motugaafa faafaiaoga

“Ia tuuina atu ni fesili e moomia ai ona sailia e tagata o loo aoaoina ia ni tali i totonu o tusitusiga paia ma aoaoga a perofeta o aso e gata ai” (Aoao Atu, E Leai Se Valaauga e Sili Ai [1999], 64).

Valaaulia e faatino

O le a se mea e mafai e le autalavou ona fai e faaaoga ai mea ua latou aoaoina, a o latou suesueina le ata o le faaolataga i a latou vasega a le Ekalesia?E mafai faapefea ona e lagolagoina i latou i a latou taumafaiga e avea ma tagata aoao sogasoga?
Faasoa atu lau molimau o faamanuiaga e oo mai i le saili atu ma le filiga ina ia aoaoina.