E mafai faapefea ona ou faatatauina mea na tutupu i le Liliuese ma le Toefuataiga i lo’u olaga?

E tatau ona tatou “faatatauina tusitusiga paia uma ia te i matou, ina ia avea ma o matou manuia ma aoaoga” (1 Nifae 19:23). O le faatatau o tusitusiga paia o lona uiga ia vaai pe o faapefea ona avea mea na tutupu ma tulaga i tusitusiga paia i mea e tutupu ma tulaga i o tatou olaga. E ui o mea na tutupu i le Liliuese ma le Toefuataiga sa tutupu i aso ua leva lava, ae e mafai ona tatou maua ni auala e aoao ai mai nei mea na tutupu ma faatatau ia i tatou i aso nei.

Saunia oe lava ia faaleagaga

Na faapefea ona faamanuiaina oe i le faatatauina o tusitusiga paia i lou olaga? O a ni auala ua fesoasoani ia te oe e faatatau ai tusitusiga paia i lou olaga? O a ni mea na tutupu mai le Liliuese ma le Toefuataiga ua faapitoa le taua i lou olaga?

O le a faapefea ona faamanuia le autalavou i le aoaoina o le faatatauina o tusitusiga paia? O le a se fesootaiga e mafai ona e vaaia i le va o o latou olaga ma mea ua latou aoaoina e uiga i le Liliuese ma le Toefuataiga?

Ia suesue ma le agaga tatalo ia mau ma punaoa nei. O le a le mea o le a fesoasoani i le autalavou e faatatau ai mea na tutupu i le Liliuese ma le Toefuataiga i o latou olaga?

1 Nifae 19:23–24 (E tatau ona tatou faatatauina tusitusiga paia ia i tatou lava)

MF&F 61:36 (O le mea e fetalai ai le Alii i se toatasi ua fetalai foi o Ia i tagata uma)

Iosefa Samita—Talafaasolopito 1:5–20 (Sa faatatau e Iosefa Samita le Iakopo 1:5 ia te ia lava)

“Liliuese,” Faamaoni i le Faatuatua (2004), 92–93

M. Russell Ballard, “Aoaoina o Lesona mai le Taimi Tuanai,” Ensign po o le Liahona, Me 2009, 31–34

Vitio: “O le Uiga o le Toefuataiga Mo A'u”

Aoao atu i le ala a le Faaola

Sa aoao e le Faaola ia tagata ia mafaufau i tusitusiga paia mo i latou lava ma faaaoga e sue ai tali i a latou lava fesili. E mafai faapefea ona e fesoasoani i le autalavou ia malamalama i le auala e faatatau ai mea latou te faitauina i tusitusiga paia i o latou luitau?

Ia fai fesootaiga

I nai minute muamua lava o vasega taitasi, fesoasoani i le autalavou e faia fesootaiga i le va o mea latou te aoaoina i nofoaga eseese (e pei o suesuega faaletagata lava ia, seminare, isi vasega faale-Ekalesia, po o aafiaga ma a latou uo). E mafai faapefea ona e fesoasoani ia i latou ia iloa le taua o le talalelei i o latou olaga i aso taitasi? E mafai ona fesoasoani manatu nei:

Fai atu i tamaitai talavou e faasoa atu i alii talavou se mea sa latou aoaoina talu ai nei e uiga i le Liliuese po o le Toefuataiga i a latou vasega a Tamaitai Talavou. Ona fai atu lea i alii talavou e faasoa atu se mea i tamaitai talavou sa latou aoao i ai e uiga i le Liliuese po o le Toefuataiga i a latou korama o le Perisitua Arona.
Fai atu i le autalavou e faitau le 1 Nifae 19:23 ma talanoa pe o le a le uiga o le faamatalaga a Nifae o le “faatatauina tusitusiga paia uma ia te i matou” (afai e manaomia, faasoa atu i le autalavou le parakalafa i le amataga o lenei otootoga). Faaali le vitio “O le Uiga o le Toefuataiga Mo A'u,” ma valaaulia tagata o le vasega e vaavaai mo auala na faatatau ai e le autalavou i le vitio ia mea na tutupu i le Toefuataiga i o latou lava olaga.

Aoao faatasi

O le a fesoasoani gaoioiga taitasi nei i le autalavou ia malamalama ai i auala e faatusatusa ai mea na tutupu i le Liliuese ma le Toefuataiga i o latou olaga. I le mulimuli ai i le taitaiga a le Agaga, filifili se gaoioiga se tasi pe sili atu o le a sili ona aoga mo lau vasega:

Fai atu i le autalavou e faitau le Iosefa Samita—Talafaasolopito 1:5–10 e iloa ai mea sa tutupu i le soifuaga o Iosefa Samita ina ua 14 ona tausaga. Ona fai atu lea ia i latou e faitau fuaiupu e 11 e oo i le 20 ma faailoa mai po o le a le mea sa fai e Iosefa e faatusatusa ai le mau sa ia faitauina i ona aafiaga. E mafai faapefea ona fesoasoani le faataitaiga a Iosefa Samita i le autalavou e faaleleia atili ai a latou lava suesuega o tusitusiga paia? Tuu atu ia i latou se taimi e tusi ai i lalo ni auala e mafai ona latou faatusatusa ai aafiaga o Iosefa Samita i o latou olaga. Fai atu i le autalavou e faasoa atu i se isi tagata o le vasega mea sa latou tusia.
I luga o le laupapa, tusi ai autu, “Liliuese Tele” ma le “Liliuese o le Tagata Lava Ia.” Fai i talavou e faitau le “Liliuese” i le Faamaoni i le Faatuatua ma lisi i luga o le laupapa ia mea sa taitaiina atu pe na oo i ai ona o le Liliuese Tele. Fesoasoani ia i latou e faatusatusa le Liliuese Tele ia i latou lava i le talanoaina pe mafai faapefea e mea o i luga o a latou lisi ona taitaiina atu ai i le liliuese o le tagata lava ia. Mo se faataitaiga, e pei o tagata sa fasiotia le au aposetolo ina ua mavae le maliu o Keriso, o se tagata i aso nei o e teena pe faitio i aposetolo soifua ua i ai i se tulaga lamatia o le liliuese o le tagata lava ia. O le a se mea e mafai e le autalavou e puipuia ai mai le liliuese o le tagata lava ia?
Fesili atu i le autalavou pe faapefea ona latou tali atu pe afai e faapea atu se uo, “Ou te le fia faitau i tusitusiga paia; e talanoa mai i mea sa tutupu i aso lava la ua leva. O le a le latou feau i lo’u olaga i le taimi nei?” Vaevae le lauga a Elder M. Russell Ballard “Aoaoina o Lesona mai le Taimi Tuanai” i le autalavou, ma fai atu i ai e faitau a latou vaega ma vaavaai mo auala latou te ono tali atu ai i a latou uo.

Fai atu i le autalavou e faasoa mai mea ua latou aoaoina i le aso. Pe o latou malamalama i le auala e faatusatusa ai mea na tutupu i le Liliuese ma le Toefuataiga ia i latou lava? O a ni o latou lagona po o manatu o i ai? E i ai nisi a latou fesili faaopoopo? Mata e aoga le faaaluina o se isi taimi i lenei autu?

Motugaafa faafaiaoga

“O le tele o anomea e te faaaogaina, e le taua atu nai lo a latou uunaiga i olaga o i latou o loo e aoaoina. Talu ai ona e tele naua ia manatu i le taimi e tasi e mafai ona fenumiai ai tagata o loo aoaoina, e sili atu ai ona taulai atu i se mataupu faavae se tasi po o se lua” (O Le Aoao Atu, E Leai Se Isi Valaauga E Sili Ai [1999], 106).

Valaaulia e faatino

Fesili i le auatalavou po o a ni mea ua musuia i latou e fai ona o mea sa latou aoaoina i le aso. Fautuaina i latou e faatino na lagona. Mafaufau i ni auala e mafai ai ona e tulitataoina.