E faapefea ona ou foia le masalosalo i le faatuatua?

O nisi taimi e i ai fesili a tagata o le Ekalesia e uiga i le talalelei. O se tulaga masani le faia o ni fesili, ma a tatou suesue ma le faamaoni mo le upumoni, tatou te faamalosia a tatou molimau. Peitai, a amata ona tatou fesili ma loto le talitonu, e sili atu ona faigata mo le Agaga a le Alii e taitaia i tatou. A o tatou saili mo ni tali, e tatau ona tatou filifili ia faatuatua i mea ua leva ona tatou iloa e uiga i le talalelei, tautino atu ia ola i poloaiga, ma faaauau ona suesue i tusitusiga paia ma tatalo i aso uma. A tatou faia nei mea, o le a fesoasoani mai le Tama Faalelagi ia i tatou e faamalosia a tatou molimau.

Saunia oe lava ia faaleagaga

Na faapefea ona e faamalosia lou faatuatua? Na faapefea e perofeta, aposetolo, ma taitai o aso e gata ai ona aoaoina i tatou ia tali atu pe a i ai ni a tatou fesili faigata?

O a ni fesili faigata e uiga i le talalelei o ono tauivi ai nisi o le autalavou? E faapefea ona e fesoasoani ia i latou ao latou suesue ma le faamaoni mo ni tali i nei fesili?

Suesue ma le agaga tatalo ia punaoa nei. O a punaoa e mafai ona e faaaogaina e fesoasoani e aoao ai le autalavou e uiga i le faamalosia o lo latou faatuatua ma le taulimaina o fesili faigata? O a ni mea ua uunaia oe e faasoa mai?

Mareko 5:35–36; 9:14–24; Ioane 20:26–29; MF&F 6:36 (Aua e te fefe)

Helamana 5:12. (Atiina ae lou faavae ia Iesu Keriso)

1 Nifae 15:24 (Faalagolago i tusitusiga paia)

Ioane 7:17; Iakopo 2:17–18, 22; 3 Nifae 14:7–8; Eteru 12:6, 12 (Galue i le faatuatua)

2 Nifae 2:11. (O se faafeagai o mea uma)

MF&F 46:10–14 (Mo nisi ua tuuina atu ia iloa, i isi ia talitonu ia latou upu)

Quentin L. Cook, “Totoa i le Molimau ia Iesu,” Ensign po o le Liahona, Nov. 2016, 40–44

M. Russell Ballard, “A Matou O Ea Ia Te Ai?” Ensign po o le Liahona, Nov. 2016, 90–92

Vern P. Stanfill, “Filifili le Malamalama,” Ensign po o le Liahona, Nov. 2015, 55–57

L. Whitney Clayton, “Filifili e Talitonu,” Ensign po o le Liahona, Me 2015, 36–39

Jeffrey R. Holland, “Le Alii e, Ua Ou Faatuatua,” Ensign po o leLiahona, Me 2013, 93-95

Musika: “O Le Tatalo a le Tamaitiiti,” Tusipese a Tamaitai, 12

Aoao atu i le ala a le Faaola

Na alofa le Faaola ia i latou sa Ia aoaoina. Pe a latou tauivi, Na te le’i fiu ia i latou ae na faaauau ona alofa ma auauna atu ia i latou. O le a se mea e mafai ona e faia e mulimuli ai i Lana faataitaiga?

Ia fai fesootaiga

Tagai i isi manatu e aoao mai ai ma aoao atu.

I nai minute muamua o vasega taitasi, fesoasoani i le autalavou e fai ni fesootaiga i le va o mea o loo latou aoaoina i tulaga eseese (e pei o suesuega faaletagata lava ia, seminare, isi vasega faaleLotu, po o aafiaga ma a latou uo ma tagata o le aiga). E faapefea ona e fesoasoani ia i latou ia iloa le manaomia o le talalelei i aso taitasi o le olaga? O manatu nei e ono fesoasoani ia te oe:

• Faamalamalama atu e manaomia e tagata taitasi o le Ekalesia, e aofia ai alii ma tamaitai talavou taitasi, sana lava molimau o le talalelei. Valaaulia le autalavou e faasoa mai ni aafiaga lea sa aoaoina ia i latou le taua o le atinaeina o a latou lava molimau. Faamalamalama atu ao tatou atinaeina taitasi a tatou lava molimau, o le a tatou ola tutoatasi faaleagaga.

• Mafaufau e faaali i le autalavou se ata faalatalata o se mea faitino masani (matua faalatalata lava e leiloa ai le mea faitino) ma fai i ai e mate mai le mea faitino. Ona faaali lea ia i latou le mea faitino. E faapefea ona suia lo tatou malamalama pe a sao lo tatou vaaiga? Fai atu i le autalavou e mafaufau pe faapefea ona aoao e lenei faataitaiga ia i latou le taua o le mauaina o se vaaiga e faavavau. (Mo nisi manatu, tagai ia Rafael E. Pino, “O Le Vaaiga e Faavavau i le Talalelei,” Ensign po o le Liahona, Me 2015, 117–19.) A o feagai le autalavou ma fesili faigata, e faapefea e le tausia o se vaaiga e faavavau ona fesoasoani?

Aoao faatasi

Tagai i isi manatu e aoao mai ai ma aoao atu.

O le a fesoasoani gaoioiga taitasi nei i le autalavou e aoao ai e uiga i le taua o le sailia ma le faamaoni o tali i fesili faigata. I le mulimuli ai i le uunaiga a le Agaga, filifili se tasi pe sili atu e aoga mo lau vasega:

• Aumai ni maa se tolu ua uma ona faailoga i maa tu’ia ia o loo faailoa mai i le saunoaga a Elder Quentin L. Cook “Totoa i le Molimau ia Iesu.” Vaevae le vasega i ni vaega se tolu, ma tuu atu ia tofu vaega taitasi ma se maa se tasi. Fai atu i vaega taitasi e vaavaai i le saunoaga a Elder Cook e iloa ai pe faapefea ona faavaivai e a latou maa tu’ia le faatuatua ma aumai ai foi se faataitaiga o le auala e vaivai ai le faatuatua pe a faatagaina e tagata lenei maa tu’ia i o latou olaga. Ona tuu atu lea ia tofu le vaega ma se poloka po o se piliki ma fai atu ia i latou e faailoa mai se mea o le a fausia ai lo latou faatuatua. E mafai ona e faitau i le Helamana 5:12 o se vaega o lenei talanoaga.

• Fai atu i le autalavou e tusi mea  e sili ona latou fiafia i ai e uiga i le talalelei a Iesu Keriso ma Lana Ekalesia. Aisea latou te faafetai ai mo le talalelei? Fai atu i le autalavou e suesue i le saunoaga a Elder M. Russell Ballard “A Matou O Ea Ia Te Ai?” vaavaai mo nisi o faamanuiaga o le talalelei lea na ta’ua e Elder Ballard. Faasoa mai pe na faapefea e upumoni o le talalelei na faamamafa mai e Elder Ballard ona faia se eseesega i lou olaga? E faapefea e le manatuaina o faamanuiaga o le talalelei ona faamalosia lou faatuatua?

• Fai i se tagata o le vasega e sau saunia e faamatala mai le tala o i le Mareko 9:14–27, pe faitau le tala o se vasega. Vaevae le vasega i ni vaega se tolu, ma tuu atu ia tofu vaega taitasi ma se matauga e tasi mai le tolu lea na faia e Elder Jeffrey R. Holland i le tala i lana lauga “Le Alii e, Ua Ou Faatuatua.” E faapefea ona faaaoga e le autalavou ia matauga a Elder Holland pe afai o i latou po o se tasi latou te iloa o loo i ai ni fesili faigata ma masalosaloga e uiga i le talalelei?

• Vaevae le vasega i ni vaega toalaiti ma tuu atu ia tofu vaega taitasi ma se kopi o le lauga a Elder L. Whitney Clayton “Filifili e Talitonu” po o se kopi o le lauga a Elder Vern P. Stanfill “Filifili le Malamalama.” Fai atu i vaega taitasi e faitau se vaega o le lauga ma faasesega ni vaega latou te iloa e talafeagai pe anoa. Valaaulia le autalavou e faasoa mai mea sa latou aoaoina mai le Agaga ao latou suesue. E faapefea ona latou faafesootaia le tala ia Sailor Gutzler  po o le tietiega uila a Elder Stanfill i le faagasologa o le foia o le le mautonu ma le savali agai i luma i le faatuatua?

• Na aoao mai Peresitene Boyd K. Packer, “E maua se molimau i le tuuina atu o le molimau!” (“O Le Lamepa a le Alii,” Liahona, Tes. 1988, 33). Aisea e faamalosia ai i latou i le tuuina atu o a tatou molimau? Faitau le Ioane 7:17; Eteru 12:6, 12; ma le Iakopo 2:17–18, 22 ma talanoa po o a mea o aoao mai e nei mau e uiga i le galue i le faatuatua. E faapefea e le galue i le talitonuga ua tatou maua ona faaalia i le Tama Faalelagi ua tatou saunia ia maua atili le malamalama ma upumoni?

Fai atu i le autalavou e faasoa mai mea ua latou aoaoina i le aso. Pe ua latou malamalama atili i le auala e mafai ai ona latou taulimaina ma le faamaoni ni fesili faigata e uiga i le talalelei? Pe ua latou malamalama lelei atili i le auala e fesoasoani ai i isi o e o fetaiai ma ia ituaiga fesili? Afai o e popole e uiga i soo se tagata o le vasega, e mafai ona e fautuaina faalilolilo i latou e talanoa i o latou matua, se taitai o le autalavou, po o le epikopo e uiga ia latou fesili.

Valaaulia e faatino

Tagai i isi manatu e aoao mai ai ma aoao atu.

Atonu e te uunaia le autalavou e tusi se tusi agaalofa i se tagata ua le o toe toaga mai po o se tasi o loo tauivi ma ni fesili.

E mafai foi ona e uunaia i latou e tautino atu i le faamalosia o a latou molimau i le taimi nei e ala i le tatalo ma suesuega i tusitusiga paia i aso uma.