E mafai faapefea ona ou malamalama i faatusa o loo faaaoga e aoao atu ai le Afio Mai Faalua?

A o aoao atu e le Faaola ma Ana auauna le Afio Mai Faalua, na latou faaaogaina soo faailoga ma faataoto. E mafai ona faateleina lo tatou malamalama i mea o le a tutupu e taitai atu i le Afio Mai Faalua a o tatou aoao pe faapefea ona faamatalaina uiga o nei faailoga.

Saunia oe lava ia faaleagaga

O a faatusa ma faataoto i tusitusiga paia na fesoasoani ia te oe e malamalama atili ai i le Afio Mai Faalua? Na faapefea e nei faatusatusaga ona uunaia oe e saunia mo le toe afio mai o le Faaola?

O a faatusa ma faataoto e uiga i le Afio Mai Faalua e ono fiafia i ai le autalavou o loo e aoaoina? E mafai faapefea ona e fesoasoani ia i latou ia iloa le faataunuuina o nei valoaga i le lalolagi o loo siomia ai i latou?

Ia suesue ma le agaga tatalo ia mau ma punaoa nei. O le a se mea o le a fesoasoani i le autalavou e malamalama ai i faatusa ma faataoto e faatatau i le Afio Mai Faalua?

Mataio 13:24–30; MF&F 86:1–7 (O le faataoto i le saito ma le titania)

1 Tesalonia 5:2–8; 2 Peteru 3:10–14; MF&F 106:4–5; Iosefa Samita—Mataio 1:46–48 (O le a oo mai le Afio Mai Faalua e pei o se gaoi i le po)

Mataio 25:1–13; MF&F 45:56–57; 63:54 (O le faataoto i taupou e toasefulu)

MF&F 45:34–39; Iosefa Samita—Mataio 1:38–39 (O le faataoto i le laau o le mati)

Iosefa Samita—Mataio 1:49–54 (Ua faatusatusa le Afio Mai Faalua i le matai ua asiasi atu i auauna faamaoni ma auauna leaga)

Dallin H. Oaks, “Sauniuniga mo le Afio Mai Faalua,”Ensign po o le Liahona, Me 2004, 7–10.

Vitio: “O E Popoto”, “Aua le Atuatuvale”

Ia fai fesootaiga

I nai minute muamua lava o vasega taitasi, fesoasoani i le autalavou e faia fesootaiga i le va o mea latou te aoaoina i tulaga eseese (e pei o suesuega faaletagata lava ia, seminare, isi vasega faale-Ekalesia, po o aafiaga ma a latou uo). E mafai faapefea ona e fesoasoani ia i latou ia iloa le taua o le talalelei i o latou olaga i aso taitasi? E mafai ona fesoasoani manatu nei:

Fai i le autalavou e fai se lisi o upumoni o le talalelei sa latou aoaoina ma talatalanoa i le auala e fesootai ai i le tasi ma le isi.

Aoao faatasi

O gaoioiga taitasi nei o le a fesoasoani i le autalavou e malamalama ai i faatusa ua faaaogaina e aoao atu ai e uiga i le Afio Mai Faalua. I le mulimuli ai i le musumusuga a le Agaga, filifili se gaoioiga se tasi pe sili atu o le a sili ona aoga mo lau vasega:

Valaaulia le autalavou e faitau mau i lenei otootoga o loo faamatalaina ai le faataoto i taupou e toasefulu (pe faaali le vitio “O E Popoto”). Fai atu i le autalavou e fai ni koluma se lua i se fasi pepa ma faailoga koluma “Faataoto i Taupou e Toasefulu” ma le “Afio Mai Faalua” ma mafaufau le tagata lava ia i faatusatusaga na faia e le Faaola. Valaaulia le autalavou e tusi vaega o le faataoto i le koluma muamua, e pei o taupou popoto, Faatoafaiava, ma le suauu, ma tusi i le koluma lona lua mea e suitulaga i nei mea e uiga i le Afio Mai Faalua. Afai latou te manaomia se fesoasoani, faasoa atu ia i latou “O Le Faataoto i Taupou e Toasefulu” (Ensign, Mar. 2009, 48–49; po o le Liahona, Mat. 2009, 20–21). Ia talanoaina faatasi mea na latou aoaoina ma mea ua uunaia i latou e fai pe a uma ona suesueina lenei faataoto.
Fai atu i talavou taitasi e faitau mau fesootai o loo aofia i lenei otootoga o loo faatusatusa ai le Afio Mai Faalua o Iesu Keriso i se gaoi i le po. Fai atu i le autalavou e talanoaina mea ua latou aoaoina e uiga i le Afio Mai Faalua. O ai i latou o le a pei le Afio Mai Faalua o se gaoi? O le a le mea ua fai mai tusitusiga paia e mafai ona tatou faia e saunia ai? Valaaulia le autalavou e mafaufau i faatusatusaga a i latou lava ia e faamatala ai le Afio Mai Faalua ma faasoa mai faatusatusaga i le vasega.
Faitau faatasi, o se vasega le Iosefa Samita—Mataio 1:49–54. Fai atu i le autalavou e talanoaina le eseesega i le va o auauna e toalua. E faapefea ona faapei nisi tagata i o tatou aso o le auauna leaga? O a taunuuga o galuega a auauna? Fai atu i le autalavou e filifili se tasi o mau i le vaefaamatalaga o fuaiupu ma faitau i ai. Valaaulia i latou e faasoa mai soo se manatu faaopoopo ua latou aoaoina e uiga i le faatusatusaga mai le faitauga o nei mau faaopoopo.
Fai atu i le autalavou e vaai faalemafaufau faapea o se uo ua faaleo mai ni ona popolega e uiga i mea o le a tutupu a o lei oo le Afio Mai Faalua. O le a le mea o le a latou fai atu i la latou uo e faamafanafana ai o ia? Faaali le vitio “Aua le Atuatuvale,” ma fai atu i le autalavou e tusi i lalo ni mea faaopoopo e mafai ona latou faasoa atu i a latou uo, e aofia ai ni mau. Valaaulia le autalavou e faaaoga mea ua latou aoaoina e faatino ai le faamafanafanaina o se uo o loo popole e uiga i le Afio Mai Faalua.
Fai atu i le afa o le vasega e faitau le vaega III o le lauga a Elder Dallin H. Oaks “Sauniuniga mo le Afio Mai Faalua,” ma fai atu i le isi afa e faitau le vaega IV. Fai atu ia i latou e faailoa ma faasoa mai faatusa e fesootai ma le Afio Mai Faalua o loo taua e Elder Oaks. O a mea e ono suitulaga i nei faatusa? Tuu atu i le autalavou se taimi e tusi ai a latou lava tali i fesili nei a Elder Oaks: “E faapefea pe afai o taeao le aso e afio mai ai o Ia? … O le a sa tatou mea e fai i le aso? O a ni mea o le a tatou tautau atu? O a ni mea o tatou faia o le a tatou tuua? O a ni o tatou toatuga o le a faaleleia? O a ni faamagaloga tatou te tuuina atu? O a ni molimau o le a tatou faia?” ” Ensign po o le Liahona, Me 2004, 9–12

Fai atu i le autalavou e faasoa mai mea ua latou aoaoina i le aso. O a ni o latou lagona po o ni uunaiga? Pe ua latou malamalama i faataoto ma faatusa e uiga i le Afio Mai Faalua? Pe o i ai ni a latou fesili faaopoopo? Mata e aoga le faaaluina o se isi taimi i lenei autu?

Tomai e suesue ai le talalelei

Malamalamaaga i faatusa. Ina ia malamalama i faataoto ma faatusa i mau, e manaomia e le autalavou ona iloa faatusa, faailoa mai vaega o faatusa, ma faamatalaina mai. O le tasi auala e iloa ai faatusa o le vaai mo upu faapea faapei, faatusaina, e pei lava, e tutusa, po o le e pei ona sa i ai. Ona mafai ai lea e le autalavou ona faia se lisi o vaega o le faatusa (e pei o le suauu, lamepa, taupou, ma le Faatoafaiava). Ina ia faamatalaina faatusa, e mafai ona vaai i isi punaoa a le Ekalesia (e pei o mekasini a le Ekalesia, lauga o konafesi, ma isi tusitusiga paia) ma mafaufau pe faapefea ona fesoasoani faatusa ia i latou e malamalama ai i se mataupu faavae o le talalelei. Fautuaina i latou ia faia lenei mea i soo se taimi lava latou te tau ai i se faataoto po o se faatusa ia latou suesuega patino faaletalalelei.

Valaaulia e faatino

Fesili atu i le autalavou po o le a se mea ua uunaia ai i latou e fai e tusa ai ma mea ua latou aoaoina i le aso. Uunaia i latou e usitai i nei lagona. O a avanoa o loo maua e le autalavou e aoao ai isi e uiga i faatusa o le Afio Mai Faalua?