E mafai faapefea e le suesueina o tusitusiga paia ona fesoasoani ia te au e aoao e uiga i le Tama Faalelagi?

I le gasologa o tupulaga, sa faaali mai ai e perofeta upumoni e uiga i le natura o le Atua. A o tatou suesue ma le filiga i a latou molimau i tusitusiga paia, e mafai ona tatou aoao ai e faatatau i uiga paia o le Tama Faalelagi ma faatele ai lo tatou faatuatua ma molimau. O lo tatou malamalama atili i le natura o lo tatou Tama Faalelagi, o lo tatou malamalama atili foi lena i o tatou gafatia paia i le avea ai ma Ana fanau agaga.

Saunia oe lava ia faaleagaga

O faapefea ona faamalosia e au suesuega faaletagata lava ia o tusitusiga paia lou faatuatua i le Tama Faalelagi ma lau molimau e uiga ia te Ia? O a ni metotia o e faaaogaina e suesue ai tusitusiga paia ia e mafai ona faamanuiaina ai le autalavou?

Aisea e taua ai ona iloa ma malamalama le autalavou i le natura o le Tama Faalelagi? O a ni mau e te lagonaina o le a sili atu ona aoga ia i latou?

A o e suesue ma le agaga tatalo i tusitusiga paia ma isi punaoa nei, tagai mo ni fuaitau po o ni saunoaga e mafai ona faaaogaina e le autalavou e aoao atili ai e uiga i le natura o le Tama Faalelagi.

Ominae 1:17; Mosaea 1:3–7; Alema 37:8–9 (E fesoasoani mau ia i tatou e malamalama ai i le natura o le Atua)

MF&F 1:37–39; 18:34–36 (O tusitusiga paia e mafai ai ona tatou faalogo i le siufofoga o le Atua)

D. Todd Christofferson, “O Le Faamanuiaga o Tusitusiga Paia,” Ensign po o le Liahona, Me 2010, 32–35; tagai foi i le vitio “O Faamanuiaga o Tusitusiga Paia”

Aoao atu i le ala a le Faaola

Sa faaaoga e le Faaola tusitusiga paia e aoao atu ai ma molimau atu ai e uiga i Lana misiona i le fuafuaga a le Tama. E mafai faapefea ona e fesoasoani i le autalavou ia iloa faaaoga tusitusiga paia e aoao atili ai e uiga i lo latou Tama oi le Lagi?

Ia fai fesootaiga

I nai minute muamua lava o vasega taitasi, fesoasoani i le autalavou e faia fesootaiga i le va o mea latou te aoaoina i nofoaga eseese (e pei o suesuega faaletagata lava ia, seminare, isi vasega faale-Ekalesia, po o aafiaga ma a latou uo). E mafai faapefea ona e fesoasoani ia i latou ia iloa le taua o le talalelei i o latou olaga i aso taitasi? E mafai ona fesoasoani manatu nei:

Valaaulia se tasi o alii talavou i le vasega e faasoa atu i tamaitai talavou se mea na ia aoaoina e uiga i le Aiga Atua i se fonotaga talu ai nei a le korama a le Perisitua Arona. Ona valaaulia lea o se tamaitai talavou e faasoa atu i alii talavou se mea na ia aoaoina mai lana vasega a Tamaitai Talavou.
Fai atu i le autalavou e mafaufau loloto i le fesili “O le a le mea e tupu ia i latou e le o i ai pe le o faaaogaina foi ni tusitusiga paia? Valaaulia i latou e tagai mo ni tali i lenei fesili a o latou faitaua se tasi o mau o loo fautuaina mai i lenei otootoga po o le vaega ua faaulutalaina “E Faalauteleina e Tusitusiga Paia o Tatou Mafaufau” i le lauga a Elder D. Todd Christofferson “O Faamanuiaga o Tusitusiga Paia.” Fai atu ia i latou e faasoa mai mea latou te mauaina.

Aoao faatasi

O gaoioiga taitasi nei o le a fesoasoani i le autalavou ia malamalama i le auala e faaaoga ai tusitusiga paia e faaloloto ai lo latou malamalamaaga i le Aiga Atua. I le mulimuli ai i le musumusuga a le Agaga, filifili se tasi pe sili atu o mea nei o le a sili ona aoga mo lau vasega:

Valaaulia le autalavou e lisi i luga o le laupapa nisi o upumoni latou te iloa e uiga i le Atua. Fesili i ai pe na faapefea ona latou iloaina na upumoni. Faaali ia i latou pe faapefea ona faaaoga le Topical Guide e sue ai mau o loo aoao mai ai ni upumoni na latou lisiina e uiga i le Atua (mo se faataitaiga, e mafai ona latou saili le “Atua, o le Alofa” po o le “Atua, o le Atamai”). Valaaulia i latou e tusi i luga o le laupapa ni mau faasino latou te maua. Uunai le autalavou e faasoa mai soo se upumoni faaopoopo latou te aoaoina e uiga i le Tama Faalelagi a o latou faitauina nei mau ma tusi i luga o le laupapa. Aisea e taua ai tusitusiga paia e fesoasoani ia i tatou ia malamalama i le Atua?
Filifili se mataupu po o se fuaitau mai tusitusiga paia, ma faaali atu i le autalavou mea e mafai ona latou aoaoina e uiga i le Tama Faalelagi mai lena mataupu. Mo se faataitaiga, e mafai ona e faaali atu ia i latou le auala o loo aoao mai ai le 1 Nifae 1 e uiga i Lona mamalu (tagai i le fuaiupu e 8–9) ma Lona alofa mutimutivale (tagai i fuaiupu 14, 20). Tuu atu se taimi i le autalavou i le vasega e faitau ai se mataupu po o se fuaitau o mau ma fai se faamatalaga o soo se mea latou te aoaoina e uiga i le Tama Faalelagi a o latou faitauina. Atonu e te manao e fautua atu fuaitau nei: Isaia 55; 2 Nifae 26:23–33; Mosaea 2:19–25; Mataupu Faavae ma Feagaiga 1:17–39. E mafai ona latou faia taitoatasi, i vaega, po o le vasega atoa. Fai atu i le autalavou e fefaasoaai i le tasi ma le isi mea latou te maua.
Valaaulia le autalavou e faitau taitoatasi le autu “Atua” i le Bible Dictionary ma tusi i lalo se mea se tasi latou te aoaoina e uiga i le Atua le Tama mai mea latou te faitauina. Uunai i latou e sue soo se mau fesootai o loo faasino mai i le autu. Pe a maea ona faitau tagata uma, valaaulia tagata taitasi o le vasega e sue se tasi i le vasega na tusia se mea na ese ai, ma fai i ai e fefaasoaai i le tasi ma le isi mea na latou aoaoina (e aofia ai soo se mau na latou maua). Faasoa atu pe na faapefea ona e iloaina le Tama Faalelagi e ala i le faitauina o tusitusiga paia, ma valaaulia nisi o le autalavou e faasoa mai o latou lava aafiaga.

Fai atu i le autalavou e faasoa mai mea na latou aoaoina i le asō. O a ni lagona po o ni uunaiga ua latou maua? Pe o latou malamalama o le suesueina o tusitusiga paia e mafai ai ona fesoasoani ia i latou e aoao e uiga i le Tama Faalelagi? Pe i ai nisi a latou fesili? Pe aoga le toe faaalu o se isi taimi i lenei autu?

Motugaafa faafaiaoga

“E masani lava o le a i ai i se lesona ni anomea e tele atu nai lo mea e mafai ona e aoao atu i le taimi ua atofaina. I na tulaga, e tatau ona e filifili ai le anomea o le a sili ona aoga mo i latou e te aoaoina” (O Le Aoao Atu, E Leai Se Isi Valaauga e Sili Ai [1999], 98–99).

Valaaulia e faatino

Uunai le autalavou e faaaoga mea na latou aoaoina i le asō e faaleleia ai a latou suesuega faaletagata lava ia o tusitusiga paia. I lesona i le lumanai, valaaulia i latou e faasoa mai soo se malamalamaaga na latou maua e uiga i le Tama Faalelagi mai i a latou suesuega.