E mafai faapefea e le setiina o ni sini ona fesoasoani ia te au ina ia ola tutoatasi?

O sini taua ma fuafuaina ma le faaeteete e mafai ona fesoasoani ia i tatou e faataunuu ai le galuega ua finagalo le Alii tatou te faia. O le setiina o a tatou lava sini mo o tatou olaga o se vaega taua o le ola tutoatasi. E sili atu mea e aofia ai nai lo o le moomoo po o le miti ai foi. E pei ona aoao mai Peresitene Thomas S. Monson: “O le moomoo i ai o le a le taunuu ai. O loo faamoemoe le Alii i o tatou mafaufauga. Na Te faamoemoe mai ia tatou faatinoga. Na Te faamoemoe mai ia tatou galuega. Na Te faamoemoe mai ia tatou molimau. Na Te faamoemoe i lo tatou tuuto” (“I Le Laveai,” Ensign po o le Liahona, Me 2001, 49). Afai tatou te fuafuaina ma le agaga tatalo ma galulue ma le filiga e faataunuu a tatou sini, o le a faalauteleina e le Alii a tatou taumafaiga ma fesoasoani ia i tatou e ausia lo tatou malosiaga.

Saunia oe lava ia faaleagaga

O a ni sini sa e setiina mo oe lava ia i le aluga o lou olaga? O le a le mea na e faia e ausia ai au sini? Na faapefea e le ausiaina o sini ona fesoasoani ia te oe ia ola tutoatasi atili?

O a ni sini na seti e le autalavou o e malamalama i ai? E mafai faapefea ona e uunaia i latou e seti ni sini agavaa?

Ia suesue ma le agaga tatalo ia mau ma punaoa nei. O le a se mea o le a fesoasoani i le autalavou ia iloa ai le taua o le setiina o sini ina ia ola tutoatasi atili ai?

1 Tupu 18:21; Mataio 6:24 (E le mafai ona tatou auauna i ni matai se toalua)

Filipi 3:13–14 (E mafai ona tatou galulue mo a tatou sini ma taumafai atu i luma ia faataunuuina)

2 Nifae 32:9 (E tatau ona tatou saili le taitaiga a le Alii i mea uma tatou te faia)

Alema 34:32–33 (O lenei olaga o le taimi tatou te sauniuni ai e feiloai ma le Atua)

MF&F 58:27–29 (E tatau ona tatou auai ma le naunautai i faamoemoega lelei)

M. Russell Ballard, “Toefoi Atu ma Mauaina,” Ensign po o le Liahona, Me 2017, 62–65

Quentin L. Cook, “Filifili ma le Atamai,” Ensign po o le Liahona, Nov. 2014, 46-49.

L.Tom Perry, “Siitiaina o le Fua,”Ensign po o le Liahona, Nov. 2007, 46–49.

“E Faapefea ona Seti ni Sini,” Talai Lau Talalelei (2004), 158

Vitio: “O Se Galuega o loo Faagasolo”

Aoao atu i le ala a le Faaola

Na alofa le Faaola ia i latou sa Ia aoaoina. Sa silafia e Ia mea sa latou fiafia i ai, faamoemoe, ma naunautaiga ma mea sa tutupu i o latou olaga. O le a se mea e mafai ona e faia ina ia malamalama ai i mea e fiafia i ai ma manaoga o le autalavou e te faiaoga ai? O le a faapefea ona aafia e lenei mea le auala e te aoao ai i latou?

Ia fai fesootaiga

I nai minute muamua lava o vasega taitasi, fesoasoani i le autalavou e faia fesootaiga i le va o mea latou te aoaoina i nofoaga eseese (e pei o suesuega faaletagata lava ia, seminare, isi vasega faale-Lotu, po o aafiaga ma a latou uo). E mafai faapefea ona e fesoasoani ia i latou ia iloa le taua o le talalelei i o latou olaga i aso taitasi? E mafai ona fesoasoani manatu nei:

Valaaulia le autalavou e faasoa mai ni aafiaga na latou oo i ai talu ai nei na faamalosia ai se upumoni o le talalelei na latou aoaoina.
Faasoa i le autalavou ni sini na e setiina mo oe lava ia i lou olaga atoa. Ia aofia ai uma sini uumi-taimi ma pupuu-taimi. Faamatala pe na faapefea ona e filifili e seti na sini, o a mea na e faia e ausia ai nei sini, ma na faapefea e au taumafaiga ona faamanuiaina lou olaga. Fautuaina le autalavou e faasoa mai ni o latou lava aafiaga faapea.

Aoao faatasi

O gaoioiga taitasi nei o le a fesoasoani i le autalavou ina ia ola tutoatasi atili e ala i le aoaoina o le auala e seti ai ni sini faaletagata lava ia. I le mulimuli ai i le taitaiga a le Agaga, filifili se tasi pe sili atu o le a aoga mo lau vasega:

Fai atu i le autalavou e faasoa mai nisi o sini ua latou setiina mo i latou lava. O le a le mea e fesoasoani ia i latou e ausia ai a latou sini? Fai atu i le autalavou e iloilo parakalafa muamua e sefulu o le lauga a Elder M. Russell Ballard “Toefoi Atu ma Mauaina” ma lisi i luga o le laupapa fautuaga na ia tuuina mai mo le setiina o sini. Ina ia fesoasoani i le autalavou e seti ni sini faaleagaga mo se taimi umi, vavae i latou i ni vaega se lua. Valaaulia se vaega e tasi e iloilo le “O Le Aiga: O Se Folafolaga i le Lalolagi” ma le isi vaega e iloilo le “O Le Keriso Soifua: O Le Molimau a le Au Aposetolo.” E tatau i vaega taitasi ona vaavaai mo le auala e mafai ai e o latou pepa o faamatalaga ona fesoasoani ia i latou e seti ni sini e faatotonugalemu i le avea e pei o Iesu Keriso ma ola ai i Lana talalelei.
Totofi le afa o le vasega e faitau le tala a Elder Quentin L. Cook e uiga i lona liua ma se alii talavou (mai lana lauga “Filifili ma le Atamai”), ma totofi le isi afa e faitau le tala a Elder L. Tom Perry e uiga i lona atalii o toleni i le oso maualuga (mai lana lauga “Siitiaina o le Fua”). Fai atu i le autalavou e aotele mai a latou tala ia na atofaina atu i le vaega atoa o le vasega ma faamatala mai mea sa latou aoaoina mai tala e uiga i le setiina o ni sini. Valaaulia i latou e faasoa atu ni tala talitutusa mai o latou lava olaga. O le a faapefea ona latou faaaogaina mea sa latou aoaoina mai nei tala ina ia lelei atili i le setiina ma le ausiaina o a latou sini?
Fesili atu i le autalavou i nisi o a latou sini ma pe aisea e taua ai le i ai o ni sini. Fai atu i ai e faitau le “E Faapefea Ona Seti ni Sini” i leTalai Lau Talalelei (itulau 158), ma tagai mo mafuaaga e taua ai sini, ma fai atu ia i latou e faasoa mai mea sa latou mauaina. Faatasi ai ma se faatagaga a le epikopo, valaaulia ni faifeautalai faamisiona po o se faifeautalai ua maea talu ai nei lana misiona e faamatala mai le taua o le setiina o sini i le galuega faafaifeautalai. E mafai faapefea e le aoaoina o le setiina o ni sini i le taimi nei ona fesoasoani i le autalavou ina ia avea ma ni faifeautalai lelei? Mafaufau e valaaulia nisi tagata o le uarota e talanoa ma le autalavou i le taua o le setiina o sini i isi vaega o le olaga.
Fai atu i le autalavou e lisi mai ni a latou sini o i ai mo i latou lava. Toe iloilo faatasi ma le autalavou ia taiala mo le setiina o sini o i le itulau e 158 o le Talai Lau Talalelei. O fea o nei taiala o le a fesoasoani i le autalavou e ausia ia sini sa latou lisiina? Fai atu ia i latou e filifili se tasi o a latou sini ma tusi i lalo ni auala o le a latou faaaogaina ai nei taiala e fesoasoani ia i latou i le ausiaina o lena sini. Fai atu i nisi o i latou e faasoa mea sa latou tusiaina.
Fai atu i le autalavou e faitau le Mataupu Faavae ma Feagaiga 58:27–29, ma valaaulia i latou e fai se lisi o sini latou te mananao e seti o le a fesoasoani ia i latou ina ia “auai ma le naunautai i se faamoemoega lelei” ma “aumai le amiotonu tele.” Uunaia i latou e faasoa atu a latou lisi ma se isi tagata o le vasega ma faamatala i ai le mea o loo latou faia pe e mafai ona latou faia i le taimi nei e ausia ai na sini. Fai atu i ai e faitau ni mau faaopoopo o loo fautuaina mai i lenei otootoga ma faasoa mai soo se malamalama ua latou maua mai nei mau e uiga i le setiina o ni sini.
Faaali atu le vitio “O Se Galuega o loo Faagasolo,” ma tuu atu i le autalavou ni nai minute e tusi ai i lalo mea sa latou aoaoina mai le vitio e uiga i le setiina ma le ausiaina o sini. Valaaulia i latou e faasoa mai o latou manatu i le vasega. Aisea na filifili ai Tyler e taulai atu i lana sini o le ave o se misiona, e ui o le a faalavelave i lana sini o le taalo pasiketipolo> (I le avea ma se vaega o lenei talanoaga, atonu e te manao e faitau le 1 Tupu 18:21 ma le Mataio 6:24.) Fai atu i le autalavou e mafaufau i se mea latou te faamemelo i ai. Pe sa i ai ea se taimi sa faia ai sa latou filifiliga i le va o lena mea ma se isi sini taua? O le a se mea ua latou aoao mai le faataitaiga a Tyler?

Fai atu i le autalavou e faasoa mai mea ua latou aoaoina i le aso. O latou malamalama i le auala e seti ai a latou lava sini? Pe o i ai ni a latou fesili faaopoopo? Mata e aoga le faaaluina o se isi taimi i lenei autu?

Valaaulia e faatino

Fesili i le autalavou pe o le a le mea ua latou lagona ua uunaia ai i latou e fai e tusa ai ma mea na latou aoaoina i le aso. Fautuaina i latou e faatino nei lagona. Mafaufau i ni auala e mafai ona e tulitataoina ai.