E mafai faapefea ona faateleina lou malamalama i feagaiga?

Tatou te osia feagaiga ma lo tatou Tama Faalelagi pe a tatou auai i sauniga o le talalelei. Pe a tatou osia feagaiga, e faatulaga e le Atua ni aiaiga faapitoa, ma ua Ia folafola mai e faamanuia i tatou pe a tatou usiusitai i nei aiaiga. A o tatou malamalama atili i a tatou feagaiga, o le a mafai ona tatou faamamaluina na feagaiga ma maua faamanuiaga ua folafola mai e lo tatou Tama Faalelagi.

Saunia oe lava ia faaleagaga

Pe ua e malamalama ea i feagaiga na e osia? O a mau ma isi punaoa na fesoasoani ia te oe?

O le a le lelei o le malamalama o le autalavou i lau vasega i feagaiga—na ua uma ona latou osia ma isi o le a latou osia i le lumanai? Pe ua latou iloa le ala e suesue ai tusitusiga paia ma isi punaoa ia aoao ai e uiga i nei feagaiga?

Suesue ma le agaga tatalo mau ma punaoa nei, ma mafaufau pe faapefea ona e fesoasoani i le autalavou ia malamalama i feagaiga na latou osia ma o le a osia i se aso.

Mosaea 18:8–10; MF&F 20:37 (O feagaiga tatou te osia pe a tatou papatiso)

MF&F 20:77, 79 (O tatalo o le faamanatuga)

MF&F 84:33–44 (O le tautinoga ma le feagaiga o le perisitua)

Aperaamo 2:8–11 (O folafolaga na tuuina atu ia Aperaamo o se vaega o le feagaiga faaAperaamo)

Russell M. Nelson, “Feagaiga,” Ensign po o le Liahona, Nov. 2011, 86–89

“O Le Feagaiga Fou ma le Faavavau o le Faaipoipoga,” Faamaoni i le Faatuatua (2004), 39

Talai Lau Talalelei (2004), 63–64, 89

Aoao atu i le ala a le Faaola

I soo se tulaga lava, o le Faaola o loo avea ma se faataitaiga ma se faiaoga. Na Ia aoaoina Ona soo i le ala e tatalo ai, alofa, ma auauna atu e ala i le auala na Ia soifua ai. O le a se mea e mafai ona e faia e avea ai ma se faataitaiga lelei i le autalavou o loo e aoaoina?

Ia fai fesootaiga

Tagai i isi manatu e aoao mai ai ma aoao atu.

I nai minute muamua o vasega taitasi, fesoasoani i le autalavou e fai ni fesootaiga i le va o mea o loo latou aoaoina i tulaga eseese (e pei o suesuega faaletagata, seminare, isi vasega i le Lotu, po o aafiaga ma a latou uo). E faapefea ona e fesoasoani ia i latou ia iloa le manaomia o le talalelei i aso taitasi o le olaga? O manatu nei e ono fesoasoani ia te oe:

• Valaaulia le autalavou e faasoa mai soo se autu o le talalelei na latou talanoaina talu ai nei i le aiga pe ma a latou uo foi.

• Faaali atu ata o tagata o loo osia, tausia, po o solia foi feagaiga (tagai Tusi Ata o le Talalelei ). Valaaulia le autalavou e faamatala mai po o le a le feagaiga, aisea tatou te osia ai, ma faamanuiaga tatou te maua pe a tatou tausia. Afai latou te manaomia se fesoasoani, faasino i latou i le “Feagaiga,” Faamaoni i le Faatuatua, 67.

Aoao faatasi

Tagai i isi manatu e aoao mai ma aoao atu ai.

O gaoioiga taitasi nei o le a fesoasoani i le autalavou ina ia aoao i le ala o le a faateleina ai lo latou malamalama i feagaiga. I le mulimuli ai i le Agaga, filifili se tasi pe sili atu e aoga mo lau vasega:

• Valaaulia tagata taitasi o le vasega e faitau (tai toalua pe tai toatasi) se fuaitau o mau o loo faamatalaina se feagaiga (e pei o mau o loo lisiina i lenei otootoga). A o latou faitau, fai atu ia i latou e fai se lisi o folafolaga tatou te faia ma folafolaga ua faia e le Atua e fesootai ma le feagaiga. Tuu atu i talavou taitasi le avanoa e aoao atu ai le vasega i mea ua ia aoaoina e uiga i lena feagaiga. O a aafiaga e mafai ona faasoa mai e le autalavou e faaalia ai le ala e faataunuuina ai folafolaga a le Atua?

• Fai atu i le autalavou e filifili se feagaiga (e pei o le papatisoga, faamanatuga, po o le faaipoipoga e faavavau) ma faasoa atu mea uma ua latou iloa e uiga i lena feagaiga. Valaaulia se tagata o le vasega e tusi i le laupapa mea latou te tau maia. Valaaulia i latou ia faateleina lo latou malamalama i lenei feagaiga e ala i le suesueina o tusitusiga paia (e pei o na o loo fautuaina mai i lenei otootoga), Faamaoni i le Faatuatua, po o le Talai Lau Talalelei.

• Faitau faatasi o se vasega, se tasi o mau o loo fautuaina mai i lenei otootoga, ma fai atu i le autalavou e lisi folafolaga o loo faamatalaina i le mau. Fai atu i tagata taitasi o le vasega e filifili se tasi o nei folafolaga e suesue loloto atili i ai. E mafai ona latou maua nisi o mau o loo aoao mai e uiga i lena folafolaga (faaaoga vaefaamatalaga po o Taiala i Tusitusiga Paia), pe mafai foi ona latou saili mo faamatalaga i le Faamaoni i le Faatuatua po o isi punaoa. Fai atu ia i latou e faasoa mai i le vasega mea ua latou aoaoina ma pe faapefea ona aafia ai le auala o latou ola ai.

• Valaaulia se tasi o le au epikopo po o faifeautalai faamisiona e asiasi mai i le vasega ma faamatala mai mea o loo latou faia e fesoasoani ai i tagata ina ia saunia e osia ni feagaiga. O faapefea ona fesoasoani faifeautalai i tagata ia malamalama i feagaiga? O faapefea ona latou fautuaina tagata ia tausia a latou feagaiga? Uunaia le autalavou e fai mai soo sa latou fesili o i ai.

Fai atu i le autalavou e faasoa mai mea ua latou aoaoina i le aso. Pe ua latou malamalama pe faapefea ona faateleina lo latou malamalama i feagaiga? O a ni o latou lagona po o ni uunaiga? Pe o i ai ni a latou fesili faaopoopo? Mata e aoga le faaaluina o se isi taimi i lenei aoaoga faavae?

Tomai e suesue ai le talalelei

Faiga o lisi. I lenei lesona, ua valaaulia le autalavou e suesue i tusitusiga paia ma lisi mai ia folafolaga ua latou maua e faatatau i feagaiga o le talalelei. O le faia o lisi e mafai ona fesoasoani i le autalavou e faailoa mai mea taua ina ia mafai ona latou suesue loloto atili i ai. Uunaia i latou e faia ni lisi a o suesue i latou lava i tusitusiga paia.

Vitio: “Aoao Atu o le Tasi i le Tasi”

Matamata atili

Valaaulia e faatino

Tagai i isi manatu e aoao mai ai ma aoao atu.

Fautuaina le autalavou e saunia e faasoa mai i le vaiaso a sau se mea na latou aoaoina e uiga i sauniga ma feagaiga i taimi o a latou suesuega patino.

Faasoa atu lau molimau i faamanuiaga e oo mai i le suesueina ma le filiga o le talalelei.