Aisea e taua ai le mulimuli i fautuaga e tuuina mai e taitai perisitua?

E maua e taitai perisitua musumusuga mai le Agaga Paia e fautuaina ai i latou ua valaauina i latou e taitai. O le iloa ona faalogo ma mulimuli i fautuaga e tuuina mai e o tatou taitai perisitua o le a fesoasoani e puipui ai i tatou mai lamatiaga faaleagaga ma faaletino, ma o le a fesoasoani tatou te faia ai filifiliga poto.

Saunia oe lava ia faaleagaga

Ua faapefea ona faamanuiaina oe i lou olaga patino ona o le mulimuli i fautuaga a taitai perisitua? I ou valaauga? I lou aiga?

O a ni avanoa ua maua e le autalavou e saili ai fautuaga faaleperisitua? O a ni auala e te uunaia ai le autalavou ia mulimuli i fautuaga a taitai perisitua, e aofia ai taitai o le uarota ma le siteki?

Faaaoga punaoa o loo i lalo ia malamalama ai mo oe lava pe aisea e taua ai le mulimuli i le fautuaga a taitai perisitua. Ona fuafua lea pe mafai faapefea e gaoioiga o loo totoe i lenei otootoga ona fesoasoani i lou fuafuaina o auala e faaaofia ai le autalavou i le aoaoga. O ou lava aafiaga i le mulimuli i fautuaga o le a fesoasoani e te aoao atu ai ma le mataalia.

Efeso 4:11–14 (Faamanuiaga e oo mai mai taitai o le Ekalesia)

MF&F 1:38; MF&F 21:4–5 (E fetalai mai le Alii e ala i Ana auauna)

MF&F 124:45–46 (Faalogo ma usitai i auauna a le Alii)

Dallin H. Oaks, “O Laina e Lua o Fesootaiga,” Ensign ma le Liahona, Nov. 2010, 83–86.

Aoao atu i le ala a le Faaola

E masani ona faasoa mai e le Faaola ni tala, faataoto, ma faataitaiga moni o le olaga e faapupula mai ai aoaoga ma mataupu faavae. O a ni tala e uiga i le mulimuli i taitai perisitua e mafai ona e faasoa atu i le autalavou?

Ia fai fesootaiga

I nai minute muamua o vasega taitasi, fesoasoani i le au talavou e fai ni fesootaiga i le va o mea o loo latou aoaoina i tulaga eseese (e pei o suesuega faaletagata, seminare, isi vasega i le Lotu, po o aafiaga ma a latou uo). E faapefea ona e fesoasoani ia i latou ia iloa le manaomia o le talalelei i aso taitasi o le olaga? O manatu nei e ono fesoasoani ia te oe:

Valaaulia alii talavou o le vasega e aoao atu i tamaitai talavou se mea ua latou aoaoina e uiga i le perisitua i a latou korama o le Perisitua Arona. Ona valaaulia lea o tamaitai talavou e aoao atu se mea ua latou aoaoina e uiga i le perisitua i totonu o a latou vasega.
Valaaulia le autalavou e fai se lisi o fautuaga ua latou mauaina lata mai nei mai taitai perisitua i le lotoifale (e pei o le epikopo po o le peresiteneo le siteki). O a ni faamanuiaga ua latou maua ona o le mulimuli i lenei fautuaga? Pe a musuia ai oe i le aluga o le lesona, tuu atu lau molimau i faamanuiaga e oo mai i le mulimuli i taitai perisitua.

Aoao faatasi

O le a fesoasoani gaoioiga taitasi nei i le autalavou e malamalama ai i le taua o le mulimuli i fautuaga a taitai perisitua. I le mulimuli ai i le musumusuga a le Agaga, filifili se gaoioiga se tasi pe sili atu o le a sili ona aoga mo lau vasega:

Fai atu i le autalavou e faasoa mai faataitaiga mai tusitusiga paia e uiga i se tasi sa saili ma mulimuli i le fautuaga a se taitai peristiua (e pei o le 2 Tupu 5:1–14, Mosaea 28:1–8, po o le Alema 16:5–8). Valaaulia le autalavou e talanoa i mea ua latou aoaoina mai nei faataitaiga e uiga i le mauaina o fautuaga. Na faapefea ona maua e taitai o loo i nei tala ia musumusuga e taitai ai i latou o loo latou tautuaina? Valaaulia le autalavou e faasoa mai aafiaga na faamalolosia ai a latou molimau e faapea o o tatou taitai perisitua e musuia.
Valaaulia le autalavou e faitau le Efeso 4:11–14 ma le Mataupu Faavae ma Feagaiga 1:38; 21:4–5; 124:45–46 ma tali le fesili lenei: Aisea e taua ai le mulimuli i fautuaga e tuuina mai e taitai perisitua? Fai atu i le autalavou e faasoa mai ni aafiaga sa latou mulimuli ai i le fautuaga a se taitai perisitua ma sa faamanuiaina ai i latou.
Tufa atu kopi o le lauga a Elder Dallin H. Oaks “O Laina e Lua o Fesootaiga.” Fai atu i le afa o le vasega e faitau le vaega 1, “O Le Laina Patino” ma galulue faatasi e tusi se siata e faatusa i ai mea na aoao mai e Elder Oaks. Fai atu i le isi afa o le vasega e fai foi faapena i le vaega II, “O Le Laina o le Perisitua.” A uma ona faasoa atu e vaega e lua a latou siata i le isi vaega, faitau faatasi le vaega e III, “O Le Manaomia o Laina Uma e Lua,” ma fai atu i le autalavou pe na faapefea ona faamanuiaina i latou ma o latou aiga i faaaliga patino ma faaaliga e ala mai i taitai perisitua.

Fai atu i le autalavou e faasoa mai mea ua latou aoaoina i le asō. Pe ua latou malamalama i le pogai e taua ai le mulimuli i le fautuaga a taitai perisitua? O a ni o latou lagona po o ni manatu? E i ai nisi a latou fesili faaopoopo? Mata e aoga le faaaluina o se isi taimi i lenei autu?

Motugaafa faafaiaoga

“O faiaoga o e tautatala atu i le tele o le taimi pe taliina ia fesili uma e i latou lava ua latou faamoemoe e faalotovaivaia ia tagata o loo aoaoina mai le auai” (O Le Aoao Atu, E Leai Se Isi Valaauga e Sili Ai [1999], 67).

Valaaulia e faatino

O a ni mea ua aoaoina e le autalavou i le asō e uiga i le sailia o fautuaga mai taitai perisitua? Valaaulia i latou e tusi i a latou api o talaaga ia fautuaga ua latou maua ma faamanuiaga e tuuina atu ia i latou pe a latou mulimuli i ai.