Karolo ea 21
Ts’enolo e fanoeng ho Moporofeta Joseph Smith, Fayette, New York, ka la 6 ’Mesa 1830. Ts’enolo ena e fanoe nakong ea ho hlophisoa ha Kereke, ka letsatsi le boletsoeng, lelapeng la Peter Whitmer Sr. Banna ba ts’eletseng, ba neng ba se ba kolobelitsoe pele, ba ile ba nka karolo. Ka tumellano ea khetho, banna bana ba ile ba bonts’a takatso le boikemisetso ba bona ba ho hlophisa Kereke ho ea ka taelo ea Molimo (bona karolo ea 20). Ba ile ba boela ba khetha hore ba amohele le ho ts’ehetsa Joseph Smith le Oliver Cowdery e le liofisiri tse okametseng Kereke. Ka peho ea matsoho, eaba Joseph o beha Oliver e le moholo oa Kereke, ’me Oliver le eena a beha Joseph ka tsela e ts’oanang. Ka mor’a tsamaiso ea selallo, Joseph le Oliver ba ile ba beha matsoho ho e mong le e mong ea neng a nkile karolo, e le ho ba fa Moea o Halalelang le tiiso ea e mong le e mong e le setho sa Kereke.
1–3, Joseph Smith o bitselitsoe ho ba senohe, mofetoleli, moporofeta, moapostola, le moholo; 4–8, Lentsoe la hae le tla tataisa morero oa Sione; 9–12, Bahalaleli ba tla lumela mantsoe a hae ha a bua ka Mots’elisi.
1 Bonang, ho tla bolokoa tlaleho har’a lona; ’me ho eona u tla bitsoa senohe, mofetoleli, moporofeta, moapostola oa Jesu Kreste, moholo oa kereke ka thato ea Molimo Ntate, le ka mohau oa Morena oa hau, Jesu Kreste,
2 Ka ho susumetsoa ke Moea o Halalelang ho beha motheo oa eona, le ho e ahela tumelong e halalelang ka ho fetisisa.
3 Kereke eo e ileng ea hlophisoa ‘me ea thehoa ka selemo sa Morena oa lona sa makholo a leshome le metso e robeli le mashome a mararo, ka khoeli ea bone, le ka letsatsi la bots’elela la khoeli e bitsoang ’Mesa.
4 Ka baka leo, ho boleloa kereke, le tla mamela mantsoe ‘ohle a hae le litaelo tseo a tlang ho le fa tsona joaloka ha a li fumane, le tsamaea ka khalalelo eohle ka pele ho ’na;
5 Hobane lentsoe la hae le tla le fumana, joaloka ha eka le tsoa molomong oa ka, ka mamello eohle le tumelo.
6 Hobane ka ho etsa lintho tsena, likhoro tsa lihele li ke ke tsa hlola khahlanong le lona; ee, ’me Morena Molimo o tla qhalakanya matla a lefifi ka pele ho lona, a etse hore maholimo a thothomele molemong oa lona le tlotlisong ea lebitso la hae.
7 Hobane joale ho rialo Morena Molimo: Eena ke mo susumelitse hore a tsamaise morero oa Sione ka matla a maholo bakeng sa botle, ’me boikemisetso ba hae kea bo tseba, ’me le lithapelo tsa hae ke li utloile.
8 Ee, sello sa hae bakeng sa Sione ke se bone, ’me ke tla etsa hore a se ke a hlola a mo llela; hobane matsatsi a hae a nyakallo a tlile ka lebaka la ts’oarelo ea libe tsa hae, le liponts’o tsa litlhohonolofatso tsa ka mesebetsing ea hae.
9 Hobane, bonang, ke tla hlohonolofatsa bohle ba sebetsang ts’imong ea ka ea morara ka tlhohonolofatso e matla, ‘me ba tla lumela ho mantsoe a hae, ao a a filoeng ka ‘na ke Mots’elisi, a bonts’ang hore Jesu o ile a thakhisoa ke batho ba tletseng sebe bakeng sa libe tsa lefats’e, ee, bakeng sa ts’oarelo ea libe ho pelo e robehileng.
10 Ka baka leo ho lokile ho ‘na hore a behoe matsoho ke uena, Oliver Cowdery, moapostola oa ka;
11 Sena e le ts’ebeletso ho uena, hore e be u moholo tlas’a letsoho la hae, e le oa pele ho uena, hore u ke u be moholo kerekeng ena ea Kreste, e pakang lebitso la ka—
12 ‘Me moruti oa pele oa kereke ena ho kereke, le ka pele ho lefats’e, ee, ka pele ho Balichaba; ee, ‘me joana ho rialo Morena Molimo, bonang, bonang! le ho Ba-Juda. Amen.