Karolo ea 36
Ts’enolo e fanoeng ka Moporofeta Joseph Smith ho Edward Partridge, haufi le Fayette, New York, ka la 9 Ts’itoe 1830 (bona sehlooho sa karolo ea 35). Nalane ea Joseph Smith e bolela hore Edward Partridge “e ne e le mohlala oa boinehelo, le e mong oa banna ba baholo ba Morena.”
1–3, Morena o beha letsoho la Hae holim’a Edward Partridge ka letsoho la Sidney Rigdon; 4–8, Monna e mong le e mong ea fumanang evangeli le boprista o lokela ho bitsoa hore a tsamaee ‘me a rute.
1 Joana ho rialo Morena Molimo, ea Matla oa Iseraele: Bona, ke re ho uena, mohlanka oa ka Edward, u lehlohonolo, ’me libe tsa hau li ts’oaretsoe, ’me u bitsetsoa ho ruta evangeli ea ka joaloka ha eka ke ka molumo oa terompeta.
2 ’Me ke tla beha letsoho la ka holim’a hau ka letsoho la mohlanka oa ka Sidney Rigdon, ’me u tla fumana Moea oa ka, Moea o Halalelang, esita le Mots’elisi, ea tla u ruta lintho tsa khotso tsa ’muso;
3 ‘Me u tla e phatlalatsa ka lentsoe le phefa, u re: Hosanna, ho bokoe lebitso la Molimo ea phahameng ka ho fetisisa.
4 ‘Me joale pitso ena le taelo ke u nea tsona malebana le batho bohle—
5 Hore joaloka ha ba bangata ba tla tla ka pele ho bahlanka ba ka Sidney Rigdon le Joseph Smith, ho amohela pitso ena le taelo, ba tla behoa matsoho le ho romeloa ho ruta evangeli e sa feleng har’a lichaba—
6 Ba hooa pako, ba re: Ipolokeng molokong oona o khopo, ’me le tsoe ka hare ho mollo, le hloile esita le liaparo tse silafalitsoeng ke nama.
7 ’Me taelo ena e tla fanoa ho baholo ba kereke ea ka, hore monna e mong le e mong ea tla e amohela ka pelo e le ‘ngoe a ka behoa matsoho le ho romeloa pele, esita le joaloka ha ke boletse.
8 Ke ‘na Jesu Kreste, Mora oa Molimo; ka baka leo, tlamang matheka a lona, ’me hang ke tla tla tempeleng ea ka. Esita le joalo. Amen.