1 Natiu te mwaane, aanga taningam nakon au taeka, bwa I taku nakoim, n aron are I taku nakon Ereman, bwa ngkana ko kaawakin ana tua te Atua, ao ko na riki rake iaon te aba; ma ngkana ko aki kaawakin ana tua te Atua ao ko na teweaki nako mai matana.

2 Ao ngkai, natiu te mwaane, I onimakinna bwa N na kimwareirei iroum, ibukin matoam ma am kakaonimaki nakon te Atua; bwa ngkai ko a tia ni waaki n ataeim n taataraa te Uea ae Atuam, ao I kantaningaia bwa ko na reitinako ni kaawakin ana tua; bwa e na kakabwaiaki ane e matoatoa nua te toki.

3 I taku nakoim, natiu te mwaane, bwa I a bon tia n rang kimwareirei iroum, ibukin am kakaonimaki ma am botumwaaka, ma am taotaona n nano ma taonan nanom n te tai ae maan ni karawawatakim i buakoia botanaomata aika Tioramwaite.

4 Bwa I ataia bwa ko bon kabaeaki; eng, ao I ataia naba bwa ko karebanaki n te atibu ibukin te taeka; ma ko bon rinanon bwaai aikai ma te taotaona n nano kioina ngkai bon raom te Uea; ao ngkanne ko ataia ae e kainaomatako te Uea.

5 Ao ngkanne natiu te mwaane, ae Tiburon, I tangiria bwa ko na uringa, bwa ngkana ko kabanea korakoram n onimakina te Atua ao ko na bon kainaomataki man katakim, ao am kaangaanga, ma karawawatakim, ao ko na uotaki rake n te kabanea ni bong.

6 Ngkai, natiu te mwaane, I aki tangiria bwa ko na taku bwa I bon atai bwaai aikai mai irou, ma bon Tamnein te Atua are e mena inanou are e kaoti bwaai aikai nakoiu; bwa ngke arona bwa I tuai ni bungiaki iroun te Atua ao I bon aki atai bwaai aikai.

7 Ma nooria, te Uea n ana nanoanga ao e kanakomaia ana anera bwa e na kaotia nakoiu bwa N na katoka te mwakuri n tiritiri i buakoia ana aomata; eng, ao I a tia ni kaitara ma te anera, ao e taetae nakoiu n te bwanaa ae kanga te baa, ao e ruru iai te aonaba.

8 Ao e koro bukina bwa i nanon te maan ae teniua te ngaina ao teniua te bong ao I bon rotaki n te maraki ae korakora ao e korakai tamneiu; ao ngke I a tang nakon te Uea are Iesu Kristo ibukin ana nanoanga, are I a karekea kamaunan au bure. Ma nooria, I bon tang nakoina ao I karekea raun nanou.

9 Ao ngkai, natiu te mwaane, I a tia n tuangko aio bwa ko na reireiniko te wanawana, bwa ko na reirei mai irou bwa akea riki te kawai are te aomata e kona iai ni karekea te kamaiuaki, ma ti rinanon Kristo. Nooria, ngaia te maiu ao ootan te aonaba. Nooria, ngaia taekan te koaua ao te raoiroi.

10 Ao ngkanne, ngkai ko a waaki n taekina te taeka ao I tangiria bwa ko na reitinako n reirei; ao I tangiria bwa ko na botumwaaka ma n taotaona nanom ni bwaai ni kabane.

11 Taraia bwa kam na aki tabekaki rake n te kainikatonga; eng, taraia bwa kam aki kamoamoa n oin wanawanami, ke ibukin mwaitin korakorami.

12 Ninikoria, man tai kairoro, ao taraia naba bwa ko taotaona angin am namakin, bwa ko na kaonaki n te tangira; taraia bwa ko toki man te taningaroti.

13 Tai tataro n aroia Tioramwaite, bwa ko a tia n nooria bwa a tataro bwa a tangiriia aomata bwa a na ongo aia tataro, ao bwa a na kamoamoaki wanawanaia.

14 Tai kangai: O te Atua, I karabwako bwa ti raoiroi riki nakoia tarira; ma kangai: O te Uea, kabwara buren au aki kororaoi, ao uringia tariu n te nanoanga—eng, kaota aki kororaoim i matan te Atua n taai nako.

15 Ao ke e na kakabwaia tamneim te Uea, ma ni butimwaeko n te kabanea ni bong nakon ueana, bwa ko na tekateka n rau. Ngkai nako, natiu te mwaane, ma n reirei te taeka nakoia te botanaomata aio. Taua ma nanom. Natiu, te mwaane, ti a bo.