1 Nooria, ngkai e koro bukina bwa aia uea Reimwanaite e kanakoa te katanoata i buakoia ana botanaomata, bwa a na aki katoka baia iaon Amon, ke Aaron, ke Aomna, ke Imnaai, ke tariia ake a nako ni kabwarabwara ana taeka te Atua, n taabo ake a mena iai, ni mwakoron nako abaia.

2 Eng, e kanakoa te tua i buakoia bwa a na aki katokai baia i aoia ni kabaeiia, ke n tewenakoia i nanon te nne ni kaikain, ao a na aki naba bawareia, ke n oroia, ke n teweia nako man aia auti n nebo, ke ni kammarakia; ao a na aki naba karebanaia n te atibu, ma a na riai ni kainaomataki bwa a na rin ni mwengaia, ma aia tembora naba, ma aia tabo aika a tabu.

3 Ao ngaia are a kona ni waaki ni kabwarabwara te taeka n aron are a tangiria, bwa te uea e a tia n rairaki nakon te Uea, ma kaain batana ni kabane; ngaia are e kanakoa ana katanoata ni kabuta te aba nakoia ana botanaomata, bwa e na aki tukaki ana taeka te Atua, ma e na kabutaki aon te aba, bwa aonga ana botanaomata ni kakoaua buakakan aia katei aia bakatibu, bwa aonga ni kakoaua bwa taari ngaia ni kabane, bwa a riai n aki tiritiri, ke n anai bwai, ke n iraa, ke ni wenenibure, ke ni karaoi mwakuri aika a buakaka n aekaia nako.

4 Ao e koro bukina bwa ngke te uea e kanakoa te katanoata aio, ao Aaron ma tarina a mwananga man te kaawa ae bubura teuana nakon te kaawa ae bubura teuana, ao man te bata n taromauri teuana nakon teuana, ni katei ekaretia, ma ni katabuia ibonga ao taan reirei ni kabuta te aba i buakoia Reimwanaite, bwa a na kabwarabwara man reirei ana taeka te Atua i buakoia; ao ngaia are a moanna n nako raoi aia waaki.

5 Ao ngaa ma ngaa ake a karekea ataakin te Uea, eng, ngaa ma ngaa ake a karekea kakoauan aia katei Nibwaite; ao a reireinaki rongorongo ma taeka ni burabeti ake a karuoaki rikaaki ni karokoa te tai ae ngkai.

6 Ao n aron ae koaua bwa e maiu te Uea, ao e koaua n aron ae a mwaiti ae a kakoaua, ke a mwaiti ake a kairaki nakon ataakin te koaua, man aia kabwarabwara Amon ma tarina, n aron tamnein te kaotioti ma te taeka ni burabeti, ao mwaakan te Atua are e karaoi kakai irouia—eng, I taku nakoimi, n aron ae maiu te Uea, ao n aron ae a mwaiti Reimwanaite ake a kakoaua aia kabwarabwara, man rairaki nakon te Uea, a bon aki manga tannako.

7 Bwa a riki bwa te botanaomata ae raoiroi; ao a kawenei aia bwai ni buaka ake a kakaitara iai, ao aki manga buaka ni kaitaraa te Atua, man aki naba manga kaaitaraia tariia.

8 Ao ngkanne, naakai ake a rairaki nakon te Uea:

9 Aomata ake Reimwanaite ake a mena n te aba are Itimaera;

10 Ao Reimwanaite naba ake a mena n te aba are Matonaai;

11 Ao Reimwanaite naba ake kaain naba te kaawa are Nibwaai;

12 Ao Reimwanaite naba ake a mena n te aba are Tiirom, ao ake a mena n te aba are Tiemron, ao n te kaawa are Remuera, ao n te kaawa are Timinirom.

13 Ao aikai aran aia kaawa Reimwanaite are a rairaki nakon te uea; ao aikai uaake a kawenei aia bwai ni buaka ake a kakaitara iai, eng, aia bwai ni buaka; ao bon Reimwanaite ni kabane.

14 Ao Amwarakaite a bon aki rairaki, ma ti temanna ae rairaki; ao aki naba Amuronaite; ma a bon kamatoatoai nanoia, ao nanoia naba Reimwanaite ni mwangan te aba ake a maeka iai, eng, ao n aia kaawa aika a uarereke ni kabane ma aia kaawa ni kabane.

15 Ngaia are, ti a tia n atong araia aia kaawa Reimwanaite ake a rairinanoia ma ni karekea ataakin te koaua, man rairaki.

16 Ao e koro bukina bwa te uea ma naake a rairaki a bon tangiria ni karekea araia, n te aro bwa a na kona ni kaokoroaki mai irouia tariia; ngaia are te uea e maroro ma Aaron ao aia ibonga aika a mwaiti ni kaineti ma te ara are ana katoka i aoia, bwa aonga ni kaokoroaki.

17 Ao e koro bukina bwa a aranaki n te ara ae aomata aika Aentaai-Nibwaai-Riaai; ao a bon weteaki n te ara aio ao aikoa manga aranaki bwa Reimwanaite.

18 Ao a waaki n riki bwa aomata aika a mwammwakuri; eng, ao a iraorao ma Nibwaite; ngaia are, a bon karekea te reitaki n iraorao mangaia, ao aikoa manga iraki n ana kamaraia te Atua.