Ana Boki Aramwa
Natin Aramwa

1 Ngkai e a koro bukina bwa n te moan ririki are a tautaeka iai taan moti i aoia ana botanaomata Nibwaai, ni moa man te tai aio, te uea ae Motiaea e a iranako kawain te aonaba ni kabane, e a tia ni buaka n te buaka ae raoiroi, n nakonako n ae eti imatan te Atua, e aki katuka temanna are e na uea i mwina, ma e ngae n anne e a tia ni katei tua ao a butimwaeaki irouia aomata mangaia ae a kabaeaki bwa a na iri taian tua ake e a tia ni karaoi.

2 Ao e koro bukina bwa n te moan ririki are e tautaeka iai Aramwa n te kaintekateka ni motikataeka, iai te mwaane are e a kairaki nako matana bwa e na motikaki taekana, te mwaane ae bubura man kinaaki ibukin korakorana ae bati.

3 Ao e a bon tia n nako buakoia aomata, ni kabwarabwara nakoia te bwai are e aranna bwa ana taeka te Atua, ni uota rikaaki man kaaitara te ekaretia; man taetae nakoia aomata bwa ni kabane ibonga ma tia reirei a riai n rangi ni kinaaki; ao a riai n aki mwakuri ni baia, ma a na riai ni kamaiuaki irouia aomata.

4 Ao e kaotiota naba ana koaua nakoia aomata ae a na bane aomata ni kabane ni kamaiuaki n te kabanea ni bong, ao a riai n aki maaku man rurubenebene, ma a na kona n tabekarake atuuia man kimwareirei; bwa te Uea e a tia ni karikiia aomata ni kabane ao e a tia naba ni kabooia aomata ni kabane, ao n tokina, ni kabane aomata a na karekea te maiu ae akea tokina.

5 Ao e koro bukina bwa e a kataua reiakinan bwaai aikai n te aro ae a mwaiti ae a kakoauai ana taeka, a mwaiti n te aro are a waaki ni kamaiua man n anganna te mwane.

6 Ao e a moanna ni kamoamoa ibukin te kainikatonga are i nanona, man ni bwaini kunnikai aika bobuaka, eng, ao man waaki ni katea te ekaretia ae boto iaon ana reirei.

7 Ao e koro bukina bwa iaoni kawaina, n nakoia ake a kakoauai ana taeka, e a kaitibo ma te mwaane ae kaain ana ekaretia te Atua, eng, ae aia tia reirei; ao e a waaki ni kauntaeka mangaia n te aro ae matoatoa, ma ni kataia ni kairia nako kaain ana ekaretia, ma te mwaane arei e tei ni kaitaraa, ni kaetia man ana taeka te Atua.

8 Ngkai aran te aomata anne bon Kiteon; ao bon ngaia te bwai ni mwakuri i nanon bain te Atua ibukin kainaomatakia ana aomata Rimwaai man te tautoronaki.

9 Ngkai, ibukina bwa Kiteon e tei ni kaitaraa ma ana taeka te Atua e un iroun Kiteon, ao e kaotinakoa ana kabaang ao e a waaki n oroia. Ngkai Kiteon e a rotaki n te kara mangaia are e a aki kona ni kaaitarai kaina ma ngaia are e a mate n te kabaang.

10 Ao te mwaane are e tiringa e anaaki irouia aomatan te ekaretia ao e a uotaki nako matan Aramwa, bwa e na motikaki taekana ni kaineti ma ana bure ake e a tia ni karaoi.

11 Ao e koro bukina bwa e tei imatan Aramwa ao e kataia ni kamaiua ma te ninikoria.

12 Ma Aramwa e taku nakoina: Nooria, aio bon te moan tai ae te nakoa n ibonga ae kewe e uotaki nako i buakoia aomata aikai. Ao nooria, ko aki ti namakina te bure ibukin te nakoanibonga ae kewe ma ko kataia naba ni kairoroia n te kabaang; ao ngkana arona bwa e na kairoroaki nakoanibonga ae kewe i buakoia aomata e na bon riki bwa kamaunakiia ni kabane.

13 Ao ko a tia ni kawawaea raraan te aomata ae e raoiroi, eng, te mwaane ae e a tia ni karaoa te raoiroi ae bati i buakoia te botanaomata aei; ao ngkana ti na kamaiuko ao raraana e na roko iaora bwa kataean kaina.

14 Mangaia ae e a tia ni motikaki taekam bwa ko na mate, ni kaineti ma te tua are ti a tia n anganaki iroun Motiaea, ara kabanea n Uea; ao e a tia ni butimwaeaki irouia te botanaomata aio, mangaia ae te botanaomata aio a na riai n ira te tua.

15 Ao e koro bukina bwa a anaia, ao arana bon Neooa; ao a uotianako nako taubukin te tabuki are Maentaai, ao ikai are e a riki iai n, ke n etina e a kaotia, imarenan karawa ma te aonaba bwa te bwai are e reirei nakoia aomata e kaitaraa ana taeka te Atua; ao ikai are e a rinanon te mate ae kamama.

16 Ma e ngae n anne, te bwai aei e aki katoka butanakon nakoa n ibonga ae kewe ni kabuta te aba; bwa are a mwaiti aika a tangiri bwain te aonaba aei ae akea bonganaia, ao a waaki nako n tataekin koaua aika a kairua; ao a karaoa aei ibukin te kaubwai ao te karineaki.

17 Ma e ngae n anne, a maaku ni kewe, bwa e rawa n ataaki, ibukin maakakin te tua, bwa taan kewe a katuaeaki; mangaia ae a bakan kabwarabwara ni kaineti ma aia koaua, ao ngkai te tua akea korakorana iaon te aomata ibukin ana koaua.

18 Ao a maaku ni kimoa, ibukin maakakin te tua, bwa aekaki aikai a katuaeaki; ao a maaku naba n ana te bwai n akea te kakaeti, man tiritiri, bwa ane e tiritiri e na katuaeaki n uaa te mate.

19 Ao e koro bukina bwa naake aki kaaina ana ekaretia te Atua a waaki ni bwainikirinia ake a kaaina ana ekaretia te Atua, ao ake a katokaa iaoia te ara ae Kristo.

20 Eng, ao a bwainikirinia, ao a karawawataia n aekakin taetae ni kawai nako, ao aio ibukin aia nanorinano; ibukina bwa aki kamoamoaia n aron tarakia, ao ibukina bwa a tibwaa ana taeka te Atua imarenaia, n akea te mwane ao boona.

21 Ao ngkai iai te tua ae matoatoa i buakoia kaain te ekaretia, bwa a na akea te mwaane ae kaain te ekaretia, ae e na teirake ma ni bwainikirinia ake aki kaaina te ekaretia, ao bwa a na akea bwainikirinaia imarenaia.

22 Ma e ngae n anne, a mwaiti i buakoia aika a waaki ni kamoamoa, ao a waaki ni kauntaeka n un ma aia kairiribai, n te aro are a oro, eng, a bon oro temanna ma temanna n aia timoi.

23 Ao aio n te kauoua n ririki n ana tai n tautaeka Aramwa, ao aio are e a karika te karawawataki ae bati nakon te ekaretia; eng, e karika te kaangaanga ae bati ma te ekaretia.

24 Bwa nanoia aika a mwaiti a matoatoa, ao a kamaunaki araia, bwa aikoa manga uringaki riki i buakoia ana aomata te Atua. Ao a mwaiti aika a nako mai i buakoia.

25 Ngkai aio bon te kataaki ae korakora nakoia ake a tei ni matoatoa i nanon te onimaki, ma e ngae n anne, a teimatoa man aki kamwaingaki ni kawakinan ana tua te Atua, ao a keiakinna ma te taotaonakin nano te bwainikirinaki are e a uatao iaoia.

26 Ao ngke ibonga a kitan tabeia bwa a na tibwaa ana taeka te Atua nakoia aomata, aomata a bon kitan naba tabeia bwa a na ongo ana taeka te Atua. Ao ngke e a tia te ibonga n tibwaua nakoia ana taeka te Atua; a bane n oki ma te nanomwaka nakon tabeia; ao te ibonga, e aki karietata riki nakoia ana taan ongora, bwa e aki raoiroi riki te tia kabwarabwara nakon te tia ongora, ao te tia reirei e aki raoiroi riki nakon te tia reireinaki; ao aio are a katiteboaki iai, ao a bane ni beku, te aomata nakon korakorana.

27 Ao a bon anga aia bwai, ni kabane te aomata nakon are iai irouna, nakoia ake bon akea aia bwai ao ake a kainnano, ma ake a aoraki, ao ake a karawawataki, ao aki bwainiia ni kunikai aika a bobuaka, ma a bon itiaki man taraaraoi.

28 Ao aio are a katea iai ana waaki te ekaretia; ao man aio are a waaki iai ni manga reke irouia te rau ae reitinako, e ngae ngke a bon bwainikirinaki.

29 Ao ngkai ibukin teimatoan te ekaretia a moanna n rianako kaubwaia, ni iai rakan bwaai ni kabane ake a kainnanoi—n raka aia nanai ni man, ma aia man aika a uarereke man marikarika n aekaia nako, ao n raka naba koraan arokaia ae kanga uteute, ao te koora, ma te tirewa, ma bwaai aika a kakawaki, man raka te tirika, ma rinen aika a raoiroi rarangakia ao aekakin kunnikai ni kabane aika a raraoi man aki katikiraoaki.

30 Ao ngkanne, n tain nakoraoin aroia, aki kanakoia aika akea karabaia, ke ake a baki, ke ake a taka, ke ake a aoraki, ke ake a tuai n amwarake man mooi; ke ake aki mena nanoia iaon te kaubwai, mangaia ae a bon akoi nakoia aomata ni kabane, ake a kara ao ake a ataei, ake a kabureaki ao ake a inaomata, te mwaane ao te aine, mai tinanikun te ekaretia ke mai i nanon te ekaretia, n akea te inanonano nakoia aomata n aron kainnanoia.

31 Ao ngkanne a bon nakoraoi aroia ao a riki n raka kaubwaia nakoia ake aki kaaina te ekaretia ae a mena iai.

32 Bwa naake aki kaaina aia ekaretia a bon waaki i nanon te tabunea, ma taromaurian te ouananti ke te aoriori, ma te bwabwarantiko ae akea nanona, ma te bakantang ao te kauntaeka, ma ni bwain kunnikai aika a bobuaka, ao a kamoamoa man taku bwa a rine riki iaoia aomata; te bwainikirinaki, te kewe, te iraa, te anaibwai, karaoan te wenenibure, ao te tiritiri, ao aekan te buakaka ni kabane; ma e ngae n anne, e kamatoaki te tua iaoia aomata ni kabane ake a karaoa te bure, n noorakin riaina.

33 Ao e koro bukina bwa man karaoan nanon te tua nakoia, n te aro ae aomata a kainnanoaki ibukin te bwai are a tia ni karaoia, a moanna n toki, man aki karaoa te bure bwa a rawa n ataaki; ngaia are, e a mwaiti te rau i buakoia ana botanaomata Nibwaai niua aia kanimaua n ririki n tautaeka taan moti.