1 Idahaemi esese, ami nyewut mbufo nte ke mmɔ ikinimke edidem ke isɔŋ oro; edi kpa ke isua emi, iŋ, ɔyɔhɔ isua edip ye duop, mmɔ ema ewot ke itie ikpe, iŋ, ema ewot ada ibuot mme ebiere ikpe isɔŋ oro.

2 Ndien mme owo ema ebahade kiet ye eken; ndien mmɔ ema ediaŋade ye kiet eken, ekabade idut, owo kiet kiet ke ufɔk emana esie ye iman ye mme ufan esie; ndien ke ntem mmɔ ema ebiat ukara isɔŋ oro.

3 Ndien idut kiet kiet ema emek ada ibuot mme ada usuŋ man ekara mmɔ; ndien ke ntem ke mmɔ ekekabade edi mme idut ye mme ada usuŋ mme idut.

4 Idahaemi sese, owo ndomo kiet ikiduhe ibɔhɔke ke enye ama enyene ediwak ufɔk emana ye ediwak iman ye mme ufan; ke ntak oro mme idut mmɔ ema ewak ata eti eti.

5 Idahaemi ema enam kpukpru emi, ndien mme ekɔŋ ikiduhe kaŋa ke ufɔt mmɔ; ndien kpukpru ukwaŋ-ŋkpɔ emi ekesim mme owo koro mmɔ ema eyak idem mmɔ enɔ odudu Satan.

6 Ndien ema ebiat mme ibet emi ukara ekenimde, ke ntak ebuana ŋkari mme ufan ye iman mbon oro emi ekewotde mme prophet.

7 Ndien mmɔ ema enam ɔkpɔsɔŋ eneni ke isɔŋ oro, tutu ete ke ubak ndinen owo emi ekewakde akan, ayak ekpiri ema ekabade edi mme idiɔk owo; iŋ, ekpri ibat owo ekedi ndinen owo ke otu mmɔ.

8 Ndien isua itiokiet ikibehe tɔŋɔ ediwak owo ekekpɔŋ nnen nnen ido mmɔ, nte ebua adiade se ɔkɔkpɔhide, mme nte edi ndiwere ke mbat.

9 Idahaemi ebuana ŋkari emi, emi akadade ata akwa ukwaŋ-ŋkpɔ ɔnɔ mme owo, ema esobo idem mmɔ ɔtɔ kiet, enyuŋ enim ke ibuot, owo emi mmɔ ekekotde Jacob;

10 Ndien mmɔ ema ekot enye edidem mmɔ; ke ntak oro enye ama edi edidem ɔnɔ idiɔk otu emi; ndien enye ekedi kiet ke otu mbon ekekponde ekan emi eketiŋde ikɔ edian mme prophet emi eketiede ntiense ebaŋa Jesus.

11 Ndien edikem ete ke mmɔ ikiwakke ke ibat nte mme idut mme owo, emi ekedianade kiet ibɔhɔke ke mme ada usuŋ mmɔ ema esiak mme mbet mmɔ, owo kiet kiet nte idut esie edide; edi mmɔ ekedi mme asua; edi mmɔ ikidihe mme ndinen owo, ŋko mmɔ ema ediana kiet ke ndisua mbon emi ekedukde ke ediomi ndibiat ukara.

12 Ke ntak oro, Jacob ke okutde ete ke mme asua mmɔ ema ewak ekan mmɔ, ke enye ekedide edidem otu emi, ke ntak oro enye ɔnɔ ikɔt esie uyo ete mmɔ efehe eka ŋkan isɔŋ ke edem edere, ndien ebɔp obio ubɔŋ do enɔ idem mmɔ, tutu mbon emi ewɔrɔde ekpɔŋ edidiana ye mmɔ, (koro enye ama abiaŋa mmɔ ete ke ediwak owo eyewɔrɔ ekpɔŋ) ndien ke mmɔ eyesɔŋ idem ekem ndiŋwana ye mme idut mme owo; ndien mmɔ ema enam ntre.

13 Ndien isaŋ mmɔ ama ɔsɔp eti eti ete ke owo ikikemeke itre tutu mmɔ ewɔrɔ eka ekpɔŋ mme owo. Ndien ke ntem ke ɔyɔhɔ isua edip ye duop eketre; ndien ntem ke edu uwem ikɔt Nephi ekedi.

14 Ndien edikem ke ɔyɔhɔ isua edip ye duop ye kiet ete ke mmɔ ema ebahade ke mme idut, owo kiet kiet ke ufɔk emana esie, iman ye mme ufan; edi mmɔ ema enyime ete ke mmɔ idikaha ekɔŋ ye kiet eken; edi mmɔ ikidianake kiet ke mme mbet mmɔ, ye edu ukara mmɔ, koro ekesiak mmɔ nte esit mbon emi ekedide mme ada ibuot ye mme ada usuŋ mmɔ edide. Edi mmɔ ema esiak mme ɔkpɔsɔŋ mbet ete idut kiet okuyom ikɔ ye kiet eken, tutu ete ke usuk usuŋ, mmɔ ema enyene emem ke isɔŋ oro; edi, mme esit mmɔ ema eŋwɔŋɔde ekpɔŋ Jehovah Abasi mmɔ, ndien mmɔ ema etɔ mme prophet ke itiat enyuŋ ebin mmɔ esio ke ufɔt mmɔ.

15 Ndien edikem ete Nephi—ke mme angel ekekesede enye ŋko ye uyo Jehovah, ke ntak oro ke okokutde mme angel, ye ke okokutde ke enyin esie, ye ke ekenɔde enye odudu man enye ɔfiɔk kabaŋa utom Christ, ye ŋko ke okokutde ke enyin esie nte esɔpde ewɔrɔ ekpɔŋ nnen nnen ido eka ibak ye mme mbubiam mmɔ;

16 Ke ntak oro, ke ɔfuhɔde ɔnɔ nsɔŋesit mmɔ ye nnan mme esit mmɔ—ama aka ke ufɔt mmɔ kpa ke isua oro, onyuŋ ɔtɔŋɔ nditie ntiense, uko uko, mbaŋa edikabade esit ye edisio ke idiɔk ŋkpɔ nto mbuɔtidem ke Jehovah Jesus Christ.

17 Ndien enye ama anam ediwak ŋkpɔ ɔnɔ mmɔ; ndien Mormon ikemeke ndiwet kpukpru mmɔ, ndien ubak mmɔ idikemke, ke ntak oro Mormon iwetke mmɔ ke ŋwed emi. Ndien Nephi ama anam utom ye odudu ye akwa unen.

18 Ndien edikem ete ke mmɔ ema eyaresit ye enye, ke ntak emi enye ekenyenede odudu akan mmɔ, koro ikimemke ete mmɔ etre ndibuɔt idem ke mme ikɔ esie, koro ata akwa ekedi mbuɔtidem esie ke Jehovah Jesus Christ tutu mme angel ema enam utom enɔ enye ke usen ke usen.

19 Ndien ke enyiŋ Jesus ke enye ekebin mme demon ye mme ndedehe spirit osio; ndien kpa eyen eka esie ke enye akanam eset ke mkpa, ke ini ema eketɔŋɔ enye ke itiat onyuŋ okut ndutuhɔ mkpa oto mme owo.

20 Ndien mme owo ema ekut enye, enyuŋ etie ntiense ebaŋa enye, ndien ema eyaresit ye enye ke ntak odudu esie; ndien enye ŋko ama anam ediwak utibe ŋkpɔ, ke iso mme owo, ke enyiŋ Jesus.

21 Ndien edikem ete ke ɔyɔhɔ isua edip ye duop ye kiet ama ebe efep, ndien ekedi ekpri ibat owo ekekabade esit enɔ Jehovah; edi kadaŋa nte ediwak emi ekekabarede esit ema ewut mme owo ke akpanikɔ ete ke odudu ye Spirit Abasi ema edise mmɔ, emi ekedude ke Jesus Christ, emi mmɔ ekebuɔtde idem.

22 Ndien kadaŋa nte ediwak emi ekebinde mme demon esio ke idem mmɔ, enyuŋ ekopde nsɔŋidem ke mme udɔŋɔ mmɔ ye mme mmemidem mmɔ, ema eyarade enɔ mme owo ke akpanikɔ ete ke edi Spirit Abasi akanam, onyuŋ ɔkɔk mmɔ; ndien mmɔ ema ewut mme idiɔŋɔ ŋko ndien ema enam mme utibe ŋkpɔ ke ufɔt mme owo.

23 Ke ntem ke ɔyɔhɔ isua edip ye duopeba ekebe ŋko. Ndien Nephi ama eseme ɔnɔ mme owo ke ntɔŋɔ ɔyɔhɔ isua edip ye duopeta; ndien enye ama ɔkwɔrɔ edikabade esit ye edisio ke idiɔk ŋkpɔ ɔnɔ mmɔ.

24 Idahaemi ami moyom nte yak mbufo eti ŋko, ete ke ikiduhe owo ndomo kiet emi ekedade edi edikabade esit emi Nephi mikiduɔke mmɔŋ ye mmɔŋ.

25 Ke ntak oro, Nephi ama enim, mme owo ɔnɔ utom emi, man eduɔk kpukpru owo emi etienede mmɔ mmɔŋ ye mmɔŋ, ndien emi nte ntiense ye ikɔ ntiense ke iso Abasi, ye mme owo, ete ke mmɔ ema ekabade esit enyuŋ ebɔ edifen ke mme idiɔk ŋkpɔ mmɔ.

26 Ndien ediwak ema edu ke ntɔŋɔ isua emi, emi ekeduɔke mmɔŋ man ekabade esit; ndien ke ntem akamba ubak isua oro ama ebe efep.