1 Ndien edikem ete ke ntem ke ɔyɔhɔ isua anaŋ ye duop ye ition ekebe ŋko, ndien mme owo etɔŋɔ ndifre mme idiɔŋɔ ye mme utibe ŋkpɔ oro emi mmɔ ekekopde, ndien idem ɔtɔŋɔ nditre ye nditre ndikpa mmɔ mbaŋa idiɔŋɔ mme utibe ŋkpɔ emi otode heaven, tutu ete ke mmɔ etɔŋɔ ndisɔŋ esit mmɔ, enyuŋ edi nnan ke esit mmɔ, enyuŋ etre ndibuɔtidem ke kpukpru se mmɔ ekekopde enyuŋ ekutde—

2 Ekere mme ikpikpu ŋkpɔ ke esit mmɔ, ete kedi mme owo ekenam, ye ke odudu satan, man eda ewɔrɔ enyuŋ ebiaŋa mme esit owo; ndien ke ntem ke Satan akafiak ada mme esit owo enyene, tutu ete ke enye ama anam mme enyin mmɔ edi nnan, onyuŋ ada mmɔ ɔwɔrɔ ete enim ete ke ukpep ŋkpɔ Christ ekedi ndisime ye ikpikpu ŋkpɔ.

3 Ndien edikem ete mme owo etɔŋɔ ndikop odudu ke ibak ye mme mbubiam ido; ndien mmɔ ikinimke ite ke eyenɔ mme idiɔŋɔ ye mme utibe ŋkpɔ efen; ndien Satan ama asaŋa, ada mme esit owo ɔwɔrɔ, odomo mmɔ onyuŋ anam mmɔ ete mmɔ enam akwa ibak ke isɔŋ oro.

4 Ndien ke ntem ke ɔyɔhɔ isua anaŋ ye duop ye itiokiet ekebe; ŋko ye ɔyɔhɔ isua anaŋ ye duop ye itiaba; ŋko ye ɔyɔhɔ isua anaŋ ye duop ye itiaita; ŋko ye ɔyɔhɔ isua anaŋ ye duop ye usukkiet;

5 Ndien ŋko isua ikie ama ebe tɔŋɔ ke eyo Mosiah, emi ekedide edidem ɔnɔ mbon mme Nephite.

6 Ndien isua ikieitiokiet ye usukkiet ama ebe tɔŋɔ Lehi ɔkɔkpɔŋde Jerusalem.

7 Ndien isua usukkiet ama ebe tɔŋɔ ke ini emi ekenɔde idiɔŋɔ oro, emi mme prophet eketiŋde, ete ke Christ eyedi ke ererimbot.

8 Idahaemi mme Nephite ema etɔŋɔ ndibat ini mmɔ tɔŋɔ ke iniemi emi ekenɔde idiɔŋɔ, mme tɔŋɔ ke edidi Christ; ke ntak oro, isua usukkiet ama ebe efep.

9 Ndien Nephi, emi ekedide ete Nephi, emi akakamade mme ŋwed,ikinyɔŋke ika isɔŋ Zarahemla, ndien owo ikikwe enye ke ofuri isɔŋ oro.

10 Ndien edikem ete ke mme owo ema esuk edu ke ibak, isehe ediwak ukwɔrɔ ikɔ ye nditiŋ nte prophet emi ekenɔde ke ufɔt mmɔ; ndien ke ntem ke ɔyɔhɔ isua duop ekebe ŋko; ndien ɔyɔhɔ isua duopekiet ŋko ama ebe ke ukwaŋ-ŋkpɔ.

11 Ndien edikem ke ɔyɔhɔ isua duopeta, mme ekɔŋ ye mme eneni ema etɔŋɔ ndidu ke ofuri isɔŋ oro; koro mme inɔ Gadianton ema ewak eti eti, enyuŋ ewot ata ediwak owo, enyuŋ ebiat ata ediwak obio, enyuŋ esuan ata ediwak mkpa ye uwot owo ke ofuri isɔŋ oro, ndien ama ɔfɔn ete kpukpru owo, mme Nephite ye mme Lamanite mbiba, emen mme ŋkpɔ ekɔŋ ekama ebaŋa mmɔ.

12 Ke ntak oro kpukpru mme Lamanite emi ekekabarede esit enɔ Jehovah ema ediana ye nditɔ eka mmɔ, mme Nephite, ndien ema enyik mmɔ, ke ntak ifure uwem mmɔ ye iban mmɔ ye nditɔ mmɔ, nditaŋ mme ŋkpɔ ekɔŋ mbaŋa mme inɔ Gadianton oro, iŋ, ŋko ye nditim mme unen mmɔ nnim, ye mme ifet ufɔk Abasi mmɔ ye edu ukpono mmɔ, ye edibɔhɔ mmɔ ye uwɔrɔ ufin mmɔ.

13 Ndien edikem ete ke mbemiso ɔyɔhɔ isua duopeta emi edibe ke ema esin mme Nephite ndik ke idem ye ata nsobo ke ntak ekɔŋ emi, emi ɔkɔdiɔkde ata eti eti.

14 Ndien edikem ete ke ema ebat mme Lamanite oro emi ekedianade ye mme Nephite esin ke otu mme Nephite;

15 Ndien ema edorode isuŋi mmɔ efeb, ndien ikpɔkidem mmɔ ama akabade edi afia nte eke mme Nephite;

16 Ndien mkparawa mmɔ ye nditɔ iban mmɔ ema ekabade eye ata eti eti, ndien ema ebat mmɔ esin ke otu mme Nephite, enyuŋ ekot mmɔ mme Nephite. Ndien ke ntem ke ɔyɔhɔ isua duopeta eketre.

17 Ndien edikem ke ntɔŋɔ ɔyɔhɔ isua duopenaŋ, ekɔŋ ke ufɔt mme inɔ ye ikɔt Nephi ama aka iso ndien ama ɔdiɔk ata eti eti; edi, ikɔt Nephi ema ekan mme inɔ ke usuk idaha, tutu ete ke mmɔ ema ebin mmɔ efiak edem esio ke mme isɔŋ mmɔ esin ke mme obot ye ke mme ndedibe ebiet mmɔ.

18 Ndien ke ntem ke ɔyɔhɔ isua duopenaŋ eketre. Ndien ke ɔyɔhɔ isua efud mmɔ ema edi eŋwan ye ikɔt Nephi; ndien ke ntak ibak ikɔt Nephi, ye ediwak eneni ye mme utɔk mmɔ, mme inɔ Gadianton ema ekan mmɔ ke ediwak idaha.

19 Ndien ke ntem ke ɔyɔhɔ isua efud eketre, ndien ke ntem ke mme owo ekedu ke idaha ediwak ukut; ndien akaŋkaŋ nsobo ama ebet mmɔ, tutu ete ke ema ebeŋeidem ndikpi mmɔ nnim ke isɔŋ ye enye, ndien emi ke ntak ukwaŋ-ŋkpɔ mmɔ.