Ibuot 23
Jesus ɔnɔ mme ikɔ Isaiah unyime—Enye ɔnɔ mme owo uyo ete eduŋɔde mme prophet—Eda mme ikɔ Samuel owo Lamanite abaŋade Eriset ke mkpa edian ke mme ŋwed mmɔ. Ŋkpɔ nte K.E. 34.
1 Ndien idahaemi, sese, ami ndɔhɔ mbufo, nte ke ana mbufo eduŋɔde mme ŋkpɔ emi. Iŋ, ami mɔnɔ mbufo ibet nte mbufo etim eduŋɔde mme ŋkpɔ emi; koro ikpɔ ke mme ikɔ Isaiah edi.
2 Koro ke akpanikɔ enye amatiŋ abaŋa kpukpru ŋkpɔ abaŋade ikɔt mi emi edide eke ufɔk Israel; ke ntak oro ana nte enye etiŋ ŋko ɔnɔ mme Gentile.
3 Ndien kpukpru ŋkpɔ emi enye eketiŋde ema etibe eyenyuŋ etibe, kpa nte mme ikɔ emi enye eketiŋde.
4 Ke ntak oro ekpaŋ utɔŋ enɔ mme ikɔ mi, ewet mme ŋkpɔ emi ami ntiŋde nnɔ mbufo; ndien ke ekemini ye uduak Ete mmɔ eyesim mme Gentile.
5 Ndien owo ekededi emi edikpaŋde utɔŋ inɔ mme ikɔ mi onyuŋ akabade esit onyuŋ ana uduɔkmmɔŋ, ukem oro ke edinyaŋa. Eduŋɔde mme prophet, koro ediwak edu emi etiede ntiense ebaŋa mme ŋkpɔ emi.
6 Ndien idahaemi edikem ete ke ini Jesus amaketiŋ mme ikɔ emi enye afiak ɔdɔhɔ mmɔ, ke ini enye ama akanam kpukpru mme ŋwed Abasi aŋwaŋa mmɔ emi mmɔ ekebɔde, enye ɔdɔhɔ mmɔ ete: Esese, mme ŋwed Abasi efen ke ami ndori enyin nte mbufo ewet, emi mbufo minyeneke.
7 Ndien edikem ete enye ɔdɔhɔ Nephi: Da ŋwed emi afo ekenimde di.
8 Ndien ke ini Nephi amakada mme ŋwed oro edi, onyuŋ enim mmɔ ke iso esie, enye ɔŋwɔŋɔre enyin esie ese mmɔ ndien ɔdɔhɔ:
9 Ke akpanikɔ ke ami ndɔhɔ mbufo, ami nkɔnɔ asaŋautom mi Samuel, owo Lamanite uyo, nte enye etie ntiense ɔnɔ mbon emi, ete ke usen oro Ete edinɔde enyiŋ esie ubɔŋ ke ami ete ke ediwak ndisana owo eyeset ke mkpa, enyuŋ ewut ediwak idem, enyuŋ enam utom enɔ mmɔ. Ndien enye ɔdɔhɔ mmɔ ete: Ndi ikedighe ntre?
10 Ndien mme mbet esie ebɔrɔ enye enyuŋ edɔhɔ ete: Iŋ, Jehovah, Samuel amatiŋ nte prophet nte asaŋade ye mme ikɔ fo, ndien kpukpru mmɔ ema esu.
11 Ndien Jesus ɔdɔhɔ mmɔ ete: Didie ke mbufo miwetke ŋkpɔ emi, ete ke ediwak ndisana owo ema eset enyuŋ ewut ediwak idem enyuŋ enam utom enɔ mmɔ?
12 Ndien edikem ete ke Nephi eti ete ke mme prophet ikiwetke ŋkpɔ emi.
13 Ndien edikem ete Jesus ɔnɔ uyo ete ewet enye; ke ntak oro ema ewet enye nte enye ɔkɔnɔde uyo.
14 Ndien idahaemi edikem ete ke ini Jesus amakanam kpukpru mme ŋwed Abasi aŋwaŋa nte kiet, emi mmɔ ekewetde, enye ɔnɔ mmɔ uyo ete yak mmɔ ekpep mme ŋkpɔ emi emi enye akanamde aŋwaŋa mmɔ.