1 Ndien idahaemi sese, edikem ete kpukpru mme owo ke isɔŋ oro ema ekop mme ikɔ emi, enyuŋ etie ntiense ebaŋa enye. Ndien ke ini ema eketiŋ mme ikɔ emi ema ndopuyo ama odu ke ufaŋ ediwak hour;

2 Koro ata akamba ekedi mkpaidem mme owo tutu mmɔ ema etre ndiseme nyuŋ ntua mbaŋa editak iman mmɔ emi ekewotde; ke ntak oro ndopuyo ama odu ke ofuri isɔŋ oro ke ufaŋ ediwak hour.

3 Ndien edikem ete ke uyo ama afiak edi etiene mme owo, ndien kpukpru owo ema ekop, enyuŋ etie ntiense ebaŋa enye, ete:

4 O mbufo mbon mme akwa obio emi, emi eduɔde, emi edide nditɔ Jacob, iŋ, emi edide eke ufɔk Israel, adaŋa ediwak ini didie ke ami mbok mbufo ɔtɔ kiet nte eka unen obokde nditɔ esie ke idak mba esie, ndien mbɔk mbufo.

5 Ndien efen, adaŋa ediwak ini didie ke ami ndibok mbufo nte eka unen obokde nditɔ esie ke idak mba esie, iŋ, O mbufo mbon ufɔk Israel, emi eduɔde; iŋ, O mbufo mbon ufɔk Israel, mbufo emi eduŋde ke Jerusalem, nte mbufo eduɔde; iŋ, adaŋa ediwak ini didie ke ami ndibon mbufo nte eka unen obonde nditɔ esie, ndien mbufo ikinyimeke.

6 O mbufo ufɔk Israel emi ami nyaŋade, adaŋa ediwak ini didie ke ami ndibok mbufo nte eka unen obokde nditɔ esie ke idak mba esie, edieke mbufo edikabade esit inyuŋ inyɔŋ itiene mi ye ɔyɔhɔ uduak ke esit.

7 Edi edieke midihe ntre, O ufɔk Israel, mme ebiet iduŋ mbufo eyewure tutu ini edisu ediomi emi ekenamde enɔ mme ete mbufo.

8 Ndien idahaemi edikem ete ke ini mme owo ema ekekop mme ikɔ emi, sese, mmɔ etɔŋɔ ndifiak nseme nyuŋ ntua ke ntak mkpa iman ye mme ufan mmɔ.

9 Ndien edikem ete ke ntem ke usen ita ekebe efep. Ndien ekedi ke usenubɔk, ndien ekim ama atara ɔwɔrɔ ɔkpɔŋ iso isɔŋ, ndien isɔŋ ama etre ndinyeŋe, ndien mme itiat ema etre ndiwaha, ndien mme enyene ndik ntuaŋa ema etre, ndien kpukpru mme uyom ndutime ema ebe efep.

10 Ndien isɔŋ ama afiak adiana kiet, onyuŋ ɔsɔŋada; ndien mfuhɔ, ye eseme, ye edituaeyet mme owo emi ekenyaŋa edu uwem ama etre; ndien mfuhɔ mmɔ ama akabade edi idaresit, ndien eseme mmɔ edi itoro ye ekɔm ɔnɔ Jehovah Jesus Christ, Andifak mmɔ.

11 Ndien ke ntem ke mme ŋwed Abasi ekesu emi mme prophet eketiŋde.

12 Ndien ekedi ubak ndinen owo emi ekewakde ekan ke ekenyaŋa, ndien ekedi mmɔ ekedara mme prophet inyuŋ itɔhɔ mmɔ ke itiat; ndien ekedi mmɔ emi eketrede ndiduɔk iyip ndisana owo, emi ke ekenyaŋade—

13 Ndien ema enyaŋa mmɔ ndien mmɔ isipke inyuŋ ibuhɔke ke isɔŋ; ndien mmɔ isipke ke udem inyaŋ; ndien ikaŋ ikitaha mmɔ, ŋko ŋkpɔ ikitɔhɔ inyuŋ ifikke mmɔ iwot; ndien ofum ikitaŋke mmɔ iwɔrɔ; ŋko uye nsuŋikaŋ ye ekim ikikanke mmɔ.

14 Ndien idahaemi, owo ekededi emi okotde, yak enye enyene ifiɔk; enye emi enyenede mme ŋwed Abasi, yak enye ɔduŋɔde mmɔ, ndien okut onyuŋ ese mme ofuri mkpa emi ye mme nsobo emi ke ikaŋ, ye ke nsuŋikaŋ, ye ke mme ɔkpɔsɔŋ oyobio, ye ke mme oyobio, ye ke edikubɔde isɔŋ man ɔbɔ mmɔ, ndien kpukpru mme ŋkpɔ emi, mme idihe edisu mme prophecy eke ediwak ndisana prophet.

15 Sese, ami ndɔhɔ mbufo, Iŋ, ediwak etie ntiense ebaŋa mme ŋkpɔ emi ke ini Christ edide, ndien ema ewot mmɔ ke ntak emi mmɔ eketiede ntiense ebaŋa mme ŋkpɔ emi.

16 Iŋ, prophet Zenos ama etie ntiense abaŋa mme ŋkpɔ emi, ndien ŋko Zenock ama etiŋ abaŋa mme ŋkpɔ emi, koro mmɔ ema etie ntiense saŋa saŋa ebaŋa nnyin, emi idide nsuhɔ ubon mmɔ.

17 Sese, ete nnyin Jacob ŋko ama etie ntiense abaŋa nsuhɔ ubon Joseph. Ndien sese, ndi nnyin idihe nsuhɔ ubon Joseph? Ndien mme ŋkpɔ emi, emi etiede ntiense ebaŋa nnyin, ndi owo iwetke mmɔ ke mme usan brass emi ete nnyin Lehi akadade ɔwɔrɔ ke Jerusalem?

18 Ndien edikem ete ke utit ɔyɔhɔ isua edip ye duopenaŋ, sese, ami nyewut mbufo nte ke ikɔt Nephi emi ekenyaŋade, ŋko ye mbon emi ekekotde mme Lamanite, emi ekenyaŋade, ema ewut mmɔ akamba ufɔn, ndien mme akwa edidiɔŋ ema edoro mmɔ ke ibuot, tutu ete ke ekpri ini ke Christ ama ɔkɔdɔk ke heaven, enye ke akpanikɔ ama ayarade idem esie ɔnɔ mmɔ—

19 Owut mmɔ idem esie, onyuŋ anam utom ɔnɔ mmɔ; ndien eyenɔ mbuk utom esie ke emi ama ekebe. Ke ntak oro ke idahaemi ami metre mme ikɔ mi.