1 Ndien edikem ete ke akwa udim owo ema eboho ɔtɔ kiet, eke ikɔt Nephi, ekanade temple emi okodude ke isɔŋ Bountiful ekuk; ndien mmɔ ekedu ke utibe ye mkpaidem ye kiet eken, ndien ewut kiet eken akwa ye utibe ukpuhɔde emi adade itie.

2 Ndien mmɔ ŋko ekeneme ebaŋa Jesus Christ emi, emi ekenɔde idiɔŋɔ ebaŋa mkpa esie.

3 Ndien edikem ete ke ini mmɔ ekenemede ntem ye kiet eken, mmɔ ema ekop uyo nte okpoto ke heaven ɔwɔrɔ; ndien mmɔ eŋwɔŋɔre enyin mmɔ ese ekanare, koro uyo emi mmɔ ekekopde ikiŋwaŋake mmɔ; ndien ikidighe idiɔk uyo, ŋko ikidighe ɔkpɔsɔŋ uyo; edi, ndien ke misehe ke ekedi ekpri uyo, enye ama ekim mmɔ emi ekekopde ke esit, tutu ete ke ikiduhe ŋkpɔ ke idem mmɔ emi enye miki inamke ete enyek; iŋ, ama ekim mmɔ esim ukpɔŋ, onyuŋ anam esit mmɔ ofiop.

4 Ndien edikem ete mmɔ ema efiak ekop uyo oro, ndien ikiŋwaŋake mmɔ.

5 Ndien ŋko ɔyɔhɔ ikata mmɔ ema ekop uyo oro, ndien ema etat utɔŋ mmɔ man ekop enye; ndien enyin mmɔ ekese ebiet uyo oro otode edi; ndien mmɔ ema ewuk enyin ese enyɔŋ, emi uyo oro okotode.

6 Ndien sese, ke ɔyɔhɔ ikata uyo emi mmɔ ekekopde ama aŋwaŋa mmɔ; ndien enye ɔdɔhɔ mmɔ ete:

7 Esese Edima Eyen mi, emi ami nnemde esit ye enye, emi ami ntorode enyiŋ mi—ekop uyo esie.

8 Ndien edikem, nte aŋwaŋade mmɔ, mmɔ efiak emenede enyin mmɔ ese enyɔŋ; ndien sese, mmɔ ekut Owo nte ɔsuhɔrede ɔwɔrɔ ke heaven; ndien enye ekesine afia ɔfɔŋ; ndien enye ɔsuhɔde edi onyuŋ ada ke ufɔt mmɔ; ndien enyin ofuri udim owo ekese enye, ndien mmɔ ikikemeke ikubɔde inua mmɔ, ye kiet eken, ndien mmɔ ikifiɔkke se oro eɔkɔwɔrɔde, koro mmɔ ekekere ke ekedi angel ke mmɔ ekekut.

9 Ndien edikem ete enye anyan ubɔk esie onyuŋ ɔdɔhɔ mme owo, ete:

10 Esese, ami ndi Jesus Christ, emi mme prophet eketiede ntiense ete ke eyedi ererimbot.

11 Ndien esese, ami ndi uŋwana ye uwem ererimbot; ndien ami mɔwɔŋ ke ndondot cup oro emi Ete ɔkɔnɔde mi, ndien motoro Ete ke ndimen mme idiɔk ŋkpɔ ererimbot ndori ke idem mi, man ami nnam ye ime uduak Ete ke kpukpru ŋkpɔ tɔŋɔ ke editɔŋɔ.

12 Ndien edikem ete ke ini Jesus ama eketiŋ mme ikɔ emi ofuri otu owo ema eduɔ ke isɔŋ; koro mmɔ ema eti ete ke ema etiŋ nte prophet ke ufɔt mmɔ ete ke Christ eyewut mmɔ idem esie ke ini enye ama ɔkɔdɔk ke heaven.

13 Ndien edikem ete Jehovah ɔdɔhɔ mmɔ ete:

14 Edaha eda enyuŋ edi etiene mi, man mbufo ekan esin ubɔk mbufo ke ŋkaŋ mi, ndien ŋko man mbufo ekan etuk mme nde ɔkpɔ-ukwak ke mme ubɔk mi ye ikpat mi, man mbufo ekan efiɔk ete ke ami ndi Abasi Israel, ye Abasi ofuri ererimbot, ndien ekewot mi ke ntak mme idiɔk ŋkpɔ ererimbot.

15 Ndien edikem ete ke otu owo ema eka, enyuŋ esin ubɔk mmɔ ke ŋkaŋ esie, enyuŋ etuk mme nde ɔkpɔ-ukwak ke mme ubɔk esie ye ikpat esie; ndien emi mmɔ ekenam ntre, ke ndika kiet kiet tutu kpukpru mmɔ eka, enyuŋ ekut ye enyin mmɔ enyuŋ etuk ye ubɔk mmɔ, enyuŋ efiɔk ke akpanikɔ ndien etie ntiense, ete ke ekedi enye, emi mme prophet ekewetde ebaŋa, ete ke eyedi.

16 Ndien ke ini kpukpru mmɔ ema ekeka ekenyuŋ etie ntiense enɔ idem mmɔ, mmɔ ema efiori ke uyo kiet, ete:

17 Hosanna! Ekɔm enyene enyiŋ Akwa Abasi Ibom! Ndien kpukpru mmɔ ema eduɔ ke ikpat Jesus, enyuŋ ekpono enye.

18 Ndien edikem ete enye ɔdɔhɔ Nephi (koro Nephi ama odu ke otu owo oro) ndien enye ama ɔnɔ enye uyo ete enye asaŋa edi.

19 Ndien Nephi ama adaha ada aka, onyuŋ osuk ibuot esie ke iso Jehovah onyuŋ otim ikpat esie inua.

20 Ndien Jehovah ama ɔnɔ enye uyo ete enye adaha ada. Ndien enye ama adaha ada onyuŋ ada ke iso esie.

21 Ndien Jehovah ɔdɔhɔ enye ete: Ami mɔnɔ fi odudu nte afo ɔduɔkɔ mbon emi mmɔŋ ke ini ami ndifiakde ndɔk ke heaven.

22 Ndien ŋko Jehovah ama afiak okot mbon efen, onyuŋ etiŋ ukem ikɔ oro ɔnɔ mmɔ; ndien enye ama ɔnɔ mmɔ odudu ndiduɔk mmɔŋ. Ndien enye ama ɔdɔhɔ mmɔ ete: Ke utɔ usuŋ emi ke mbufo ediduɔk mmɔŋ ; ndien mme efaŋa ididuhe ke ufɔt mbufo.

23 Ke akpanikɔ ke ami ndɔhɔ mbufo, nte owo ekededi emi edikabarede esit ke mme idiɔk ŋkpɔ esie oto ke mme ikɔ mbufo, ndien enyene udɔŋ ndiduɔk mmɔŋ ke enyiŋ mi, ke utɔ usuŋ emi ke mbufo ediduɔk mmɔ mmɔŋ—Esese, mbufo eyesuhɔde eka, enyuŋ eda ke mmɔŋ, ndien ke enyiŋ mi ke mbufo ediduɔk mmɔ mmɔŋ.

24 Ndien idahaemi esese, emi edi mme ikɔ emi mbufo editiŋde, ekot mmɔ enyiŋ, edɔhɔ ete:

25 Ke nyenede unen emi Jesus Christ ɔnɔde mi, ami nduɔk fi mmɔŋ ke enyiŋ Ete, ye Eyen, ye Edisana Spirit. Amen.

26 Ndien ke ini oro ke mbufo edinyini mmɔ ke mmɔŋ, ndien efiak ewɔrɔ ke mmɔŋ edi.

27 Ndien ke utɔ usuŋ emi, ntem ke mbufo ediduɔk mmɔŋ ke enyiŋ mi; koro esese, ke akpanikɔ ke ami ndɔhɔ mbufo, nte ke Ete, ye Eyen, ye Edisana Spirit edi kiet; ndien ami ndu ke Ete, ndien Ete odu ke ami, ndien Ete ye ami idi kiet.

28 Ndien ke usuŋ emi nte ami nnɔde mbufo uyo ntre ke mbufo ediduɔk mmɔŋ. Ndien mme efaŋa ididuhe ke ufɔt mbufo, nte ekesidide; ŋko mme efaŋa ididuhe ke ufɔt mbufo kabaŋa ukpep-ŋkpɔ mi, nte ekesidide.

29 Koro ke akpanikɔ, ke akpanikɔ ke ami ndɔhɔ mbufo, nte ke enye emi enyenede spirit eneni idihe okimmɔ, edi, edi eke satan, emi edide ete eneni, ndien enye edemede esit mme owo ete eneni ye iyaresit, ye kiet eken.

30 Esese, emi idihe ukpep-ŋkpɔ mi, ndidemede esit mme owo ke iyaresit, ye kiet eken; edi emi edi ukpep-ŋkpɔ mi, ete mme utɔ ŋkpɔ oro etre.

31 Esese, ke akpanikɔ, ke akpanikɔ, Ami ndɔhɔ mbufo, ami nyanam mbufo efiɔk ukpep-ŋkpɔ mi.

32 Ndien emi edi ukpep-ŋkpɔ mi, ndien enye edi ukpep-ŋkpɔ emi Ete ɔnɔde mi; ndien ami metie ntiense mbaŋa Ete, ndien Ete etie ntiense abaŋa mi, ndien Edisana Spirit etie ntiense abaŋa Ete ye ami; ndien ami ntie ntiense nte ke Ete ɔnɔ kpukpru owo uyo, ke ofuri ebiet, ete ekabade esit enyuŋ ebuɔtidem ke ami.

33 Ndien owo ekededi emi ɔbuɔtde idem ke ami, onyuŋ ɔduɔkde mmɔŋ, ukem oro ke edinyaŋa; ndien mmɔ edi mmɔ emi edidade obio ubɔŋ Abasi inyene.

34 Ndien owo ekededi emi mibuɔtke idem ke ami, minyuŋ iduɔke mmɔŋ, eyebiom ikpe.

35 Ke akpanikɔ, ke akpanikɔ, ke ami ndɔhɔ mbufo, nte ke emi edi ukpep-ŋkpɔ mi, ndien ami metie ntiense mbaŋa enye nte ke oto ke Ete ɔwɔrɔ; ndien owo ekededi emi ɔbuɔtde idem ke ami ɔbuɔtidem ke Ete ŋko; ndien enye ke Ete editie ntiense ibaŋa mi, koro enye eyedise enye ye ikaŋ ye Edisana Spirit.

36 Ndien ke ntem ke Ete editie ntiense ibaŋa mi, ndien Edisana Spirit eyetie ntiense ɔnɔ enye abaŋa Ete ye ami; koro Ete, ye ami, ye Edisana Spirit idi kiet.

37 Ndien ami mfiak ndɔhɔ mbufo, ke ana nte mbufo ekabade esit, enyuŋ ekabade etie nte ekpri eyen, enyuŋ eduɔk mmɔŋ ke enyiŋ mi, midihe mbufo idikemeke ndibɔ mme ŋkpɔ emi.

38 Ndien ami mfiak ndɔhɔ mbufo, ana nte mbufo ekabade esit, enyuŋ eduɔk mmɔŋ ke enyiŋ mi, enyuŋ ekabade etie nte ekpri eyen, midihe mbufo idikemeke ndinyene obio ubɔŋ Abasi.

39 Ke akpanikɔ, ke akpanikɔ, ke ami ndɔhɔ mbufo, nte ke emi edi ukpep-ŋkpɔ mi, ndien owo ekededi emi ɔbɔpde ke enye, ɔbɔp ke itiat mi, ndien mme inua otop hell idikanke mmɔ.

40 Ndien owo ekededi emi edikwɔrɔde awak akan mme, ekpri akan emi, onyuŋ asiakde enye nte ukpep-ŋkpɔ mi, ukem oro oto andidiɔk, ndien ibɔpke ke itiat mi, edi enye ɔbɔp ke enyɔŋ ntan, ndien mme inua otop hell ekubɔde eda ndibɔ utɔ oro ke ini mme mmɔŋ ukwɔ edide ndien mme ofim emia mmɔ.

41 Ke ntak oro, eka ebine mbon emi, enyuŋ ekwɔrɔ mme ikɔ emi ami ntiŋde, enɔ mme utit ererimbot.