1 Ke akpanikɔ, ke akpanikɔ, ke ami ndɔhɔ mbufo nte yak mbufo enɔ mme ubuene ŋkpɔ; edi ekpeme ete ke mbufo inɔhɔ mme owo ŋkpɔ ke iso owo efen man mmɔ ekut; midihe ntre mbufo idinyeneke utip ito Ete mbufo emi odude ke heaven.

2 Ke ntak oro, ke ini mbufo edinɔde mme enɔ mbufo ekutaŋ ase, nte mbio mbubik enamde ke mme synagogue ye ke mme efak, man mme owo etoro mmɔ. Ke akpanikɔ ke ami ndɔhɔ mbufo, mmɔ ebɔ utip mmɔ.

3 Edi ke ini afo ɔnɔde mme enɔ kuyak ubɔk ufien fo ɔfiɔk se ubɔk nnasia fo anamde;

4 Man mme enɔ fo edi ke ndibe; ndien Ete fo emi okutde ke ndibe, ke idem esie ɔyɔnɔ fi usiene aŋwa-aŋwa.

5 Ndien ke ini mbufo ebɔŋde akam mbufo ekunam nte mbon mbubik, koro mmɔ ema ndida ke mme synagogue ye ke mme inuk efak mbɔŋ akam, man mme owo ekut mmɔ. Ke akpanikɔ ke ami ndɔhɔ mbufo, mmɔ ebɔ utip mmɔ.

6 Edi ama edi afo, ke ini afo ɔbɔŋde akam, duk ke esit ubet fo, ndien ke ini afo ama eberi usuŋ fo, bɔŋ akam nɔ Ete fo emi odude ke ndibe, ndien Ete fo, emi okutde ke ndibe, ɔyɔnɔ fi usiene aŋwa-aŋwa.

7 Edi ke ini mbufo ebɔŋde akam, ekuyire nditiŋ ikpikpu ikɔ, nte mme okpono ndem, koro mmɔ ekere ete ke edikop mmɔ ito ediwak utiŋ ikɔ.

8 Ke ntak oro mbufo ekubiet mmɔ, koro Ete mbufo ɔfiɔk mme ŋkpɔ emi mbufo eyomde mbemiso mbufo edibeŋe enye.

9 Ke utɔ usuŋ emi ndien mbufo ebɔŋ akam ete: Ete nnyin emi odude ke heaven, yak ikpono enyiŋ fo.

10 Yak inam uduak fo ke isɔŋ nte edide ke heaven.

11 Nyuŋ dahado nɔ nnyin ke mme isɔn nnyin, nte nnyin idahadedo inɔ mmɔ emi ekamade nnyin isɔn.

12 Kunyuŋ uda nnyin usin ke idomo, edi sio nnyin ke ubɔk andidiɔk.

13 Koro ubɔŋ, ye odudu, ye ukpono enyenede fi, ke nsinsi. Amen.

14 Edi edieke mbufo edahadedo enɔ mme owo ke mme ndudue mmɔ Ete mbufo ke heaven eyenyuŋ adahado ɔnɔ mbufo;

15 Edi edieke mbufo midahakedo inɔ mme owo ke mme ndudue mmɔ Ete mbufo ke heaven idinyuŋ idahakedo inɔ mme ndudue mbufo.

16 Ke ndidian do, ke ini mbufo etrede udia ekutie nte mbon mbubik, unim iso mbufo mfuhɔ-mfuhɔ, koro mmɔ ekpuhɔde iso mmɔ man mmɔ ewut mme owo ete ke imitre udia. Ke akpanikɔ ke ami ndɔhɔ mbufo, mmɔ ebɔ utip mmɔ.

17 Edi ama edi afo, ke ini etrede udia, yet aran ke ibuot fo, nyuŋ yet iso fo;

18 Man afo ukuwut mme owo idem ete ke itre udia, edi ɔnɔ Ete fo emi odude ke ndibe; ndien Ete fo emi okutde ke ndibe, ɔyɔnɔ fi utib aŋwa-aŋwa.

19 Ekubon mme ŋkpɔ-uto unɔ idem mbufo ke isɔŋ, emi uta-ŋkpɔ ye ŋkarafaŋ ebiatde, ye emi mme inɔ ebuŋde eduk enyuŋ eyip;

20 Edi ebon mme ŋkpɔ-uto enɔ idem mbufo ke heaven, emi uta-ŋkpɔ ye ŋkarafaŋ midibiatke, ye emi mme inɔ midibuŋke iduk inyuŋ iyip.

21 Koro ebiet emi ŋkpɔ-uto fo odude, do ke esit fo edidu ŋko.

22 Uŋwana ikpɔhidem edi enyin, edieke, ndien, enyin fo eneŋede ese, ofuri ikpɔhidem fo eyeyɔhɔ ye uŋwana.

23 Edi edieke enyin fo edide idiɔk, ofuri idem fo eyeyɔhɔ ye ekim. Edieke, ndien, uŋwana emi odude fi ke idem edide ekim, ekim odo okpon didie!

24 Owo ndomo kiet ikemeke ndinam utom nnɔ ete ufɔk iba; koro enye eyesua kiet ndien ama eken, midighe enye eyesɔŋɔ ada ye kiet ndien esin enye eken ke ndek. Mbufo ikemeke ndinam utom nnɔ Abasi ye Mammon.

25 Ndien idahaemi edikem ete ke ini Jesus ama eketiŋ mme ikɔ emi enye ese owo duopeba emi enye ekemekde, onyuŋ ɔdɔhɔ mmɔ ete: Eti mme ikɔ emi ami ntiŋde. Koro esese, mbufo edi mbon emi ami mmekde nte enam utom enɔ mbon emi. Ke ntak oro, ami ndɔhɔ mbufo nte, ekukere ubaŋa uwem mbufo, se mbufo edidiade, mme se ediŋwɔŋde; mme idem mbufo, se mbufo edisinede. Ndi uwem ikanke udia, ndien nte ikpɔkidem ikanke edisine-ŋkpɔ?

26 Ese mme inuen enyɔŋ, koro mmɔ itɔhɔ-tɔ, ndien mmɔ idɔkke-dɔk inyuŋ ibonke ke mme ubet ubon-ŋkpɔ; edi Ete mbufo ke heaven ɔbɔk mmɔ. Nte mbufo ifɔnke ikan mmɔ?

27 Anie ke otu mbufo ekeme ndida ekikere ndian ibio-idomo-okuk kiet ke idaha esie.

28 Ndien ntak emi mbufo ekerede ebaŋa edisine-ŋkpɔ? Ekere ebaŋa ekpɔŋidim ke ikɔt nte mmɔ ekɔride; mmɔ inamke ɔkpɔsɔŋ utom, inyuŋ ifiakke ndidi;

29 Ndien edi ami ndɔhɔ mbufo, nte ke Solomon ke ofuri ubɔŋ esie, ikisineke se iyede nte kiet ke otu mmɔ.

30 Ke ntre, edieke Abasi esinede mbiet iŋwaŋ ŋkpɔ ntem, emi odude mfin, ndien mkpɔŋ emen esin ke usaŋ-eyo, kpa ntre ke enye edisine mbufo, edieke mbufo midighe mbon mkpri mbuɔtidem.

31 Ke ntak oro ekukere, ete, Nso ke nnyin ididia? mme, Nso ke nnyin idiŋwɔŋ? mme, Nso ke nnyin idisine?

32 Koro Ete mbufo ke heaven ɔfiɔk ete ke mbufo emeyom mme ŋkpɔ emi.

33 Edi mbufo ebemiso eyom obio ubɔŋ Abasi ye nnen nnen ido esie, ndien eyedian kpukpru ŋkpɔ emi enɔ mbufo.

34 Ke ntak oro ekukere ubaŋa mkpɔŋ, koro mkpɔŋ eyekere abaŋa mme ŋkpɔ ɔnɔ idem esie. Idiɔk ke usen kiet ekem ye usen oro.