1 Ndien edikem ete ke ini Jesus ama eketiŋ mme ikɔ emi ɔnɔ Nephi, ye mbon emi ekekotde, (idahaemi ibat mmɔ emi ekekotde, enyuŋ ebɔde odudu ye unen ndiduɔk mmɔŋ, ekedi duopeba) ndien sese, enye ama anyan otu owo ubɔk esie, onyuŋ eseme ɔnɔ mmɔ, ete: Ɔfɔfɔn ɔnɔ mbufo edieke mbufo edikpaŋde utɔŋ inɔ mme ikɔ owo duopeba emi, emi ami mmekde ke otu mbufo nte enam utom enɔ mbufo, enyuŋ edi mme asaŋa-utom mbufo; ndien mmɔ ke ami nnɔ odudu man mmɔ eduɔk mbufo mmɔŋ ye mmɔŋ; ndien ke ini ema ekeduɔk mbufo mmɔŋ ye mmɔŋ, esese, ami nyɔduɔk mbufo mmɔŋ ye ikaŋ ye Edisana Spirit; ke ntak oro ɔfɔfɔn ɔnɔ mbufo edieke mbufo edibuɔtde idem ke ami enyuŋ eduɔk mmɔŋ, ke ini mbufo ekutde mi enyuŋ efiɔkde ete ke ami ndudu.

2 Ndien ŋko, eyetim ɔfɔn ɔnɔ mmɔ emi edibuɔtde idem ke mme ikɔ mbufo koro ete ke mbufo eyetie ntiense ete ke mbufo emekut mi, ndien ke mbufo emefiɔk ete ke ami ndudu. Iŋ, ɔfɔfɔn ɔnɔ mmɔ emi edibuɔtde idem ke mme ikɔ mbufo, ndien esuhɔde edi ke mme ntɔtuŋɔ nsuhɔre-idem enyuŋ eduɔk mmɔŋ, koro eyedise mmɔ ye ikaŋ ye Edisana Spirit, ndien ebɔ edifen enɔ mme idiɔk ŋkpɔ mmɔ.

3 Iŋ, ɔfɔfɔn ɔnɔ mmɔ eke ebuenede ke spirit emi edide etiene mi, koro obio ubɔŋ heaven enyene mmɔ.

4 Ndien ŋko, ɔfɔfɔn ɔnɔ mmɔ eke etuaŋade, koro eyedɔŋ mmɔ esit.

5 Ndien ɔfɔfɔn ɔnɔ mmɔ eke enyenede nsuhɔreidem eno edisana udauks, koro mmɔ eyeda isɔŋ enyene.

6 Ndien ɔfɔfɔn ɔnɔ kpukpru mmɔ eke ekopde biɔŋ ye nsat-itɔŋ nnen nnen ido, koro mmɔ eyeyɔhɔ ye Edisana Spirit.

7 Ndien ɔfɔfɔn ɔnɔ mmɔ eke etuade owo mbɔm, koro eyetua mmɔ mbɔm.

8 Ndien ɔfɔfɔn ɔnɔ kpukpru mme andisana ke esit, koro mmɔ eyekut Abasi.

9 Ndien ɔfɔfɔn ɔnɔ kpukpru mme anam emem, koro eyekot mmɔ nditɔ Abasi.

10 Ndien ɔfɔfɔn ɔnɔ kpukpru mmɔ eke ekɔbɔde kabaŋa enyiŋ mi, koro obio ubɔŋ heaven enyene mmɔ.

11 Ndien ɔfɔfɔn ɔnɔ mbufo ke ini mme owo edisuŋide inyuŋ ikɔbɔ mbufo, inyuŋ etiŋ kpukpru oruk idiɔk ke nsu edian mbufo, ke ntak mi.

12 Koro mbufo eyenyene akwa idaresit, enyuŋ enemesit ata eti eti, koro utip mbufo ke heaven eyekpon; koro ntem ke mmɔ ekekɔbɔ mme prophet emi ekebemde mbufo iso edu.

13 Ke akpanikɔ, ke akpanikɔ, ke ami ndɔhɔ mbufo, ke ami nnɔ mbufo nte edi inuŋ isɔŋ; edi edieke inuŋ adabade didie ke isɔŋ edinyene inuŋ? Tɔŋɔ ke ini oro inuŋ oro idinyeneke ufɔn, edi ana ebin esio enyuŋ edigi ke idak ikpat mme owo.

14 Ke akpanikɔ, ke akpanikɔ, ke ami ndɔhɔ mbufo, ke ami nnɔ mbufo nte edi uŋwana enɔ mbon emi. Obio emi odorode ke obot ikemeke ndidibe.

15 Esese, ndi mme owo edomo candle ndien eda abaŋ efuk? Iŋ iŋ, edi edori ke uwuk atiande, ndien enye ayama ɔnɔ kpukpru owo emi edude ke ufɔk;

16 Ke ntak oro eyak uŋwana mbufo ayama ke iso mbon emi, man mmɔ ekut nti utom mbufo enyuŋ etoro Ete mbufo emi odude ke heaven.

17 Ekukere ete ke ŋkedi ndibiat mbet mme prophet. Ami ndige ndibiat, edi ndinam osu.

18 Koro ke akpanikɔ ke ndɔhɔ mbufo, ntɔi kiet mme ekpri ŋkpɔ kiet ibehe ifep ke ibet, edi ke ami ke kpukpru osu.

19 Ndien esese, ami mɔnɔ mbufo mbet ye mme ibet Ete mi, man mbufo ebuɔtidem ke ami, ndien man mbufo ekabade esit ke mme idiɔk ŋkpɔ mbufo, enyuŋ edi etiene mi ye nbuŋɔ esit ye spirit anuakhade. Esese, mbufo emenyene mme ibet ke iso mbufo, ndien anam mbet osu.

20 Ke ntak oro edi etiene mi man enyaŋa mbufo; koro ke akpanikɔ ke ami ndɔhɔ mbufo, nte ke ibɔhɔke mbufo enim mme ibet mi, emi ami nnɔde mbufo uyo ke ini emi, mbufo ididuke obio ubɔŋ heaven ke usuŋ ndomo kiet.

21 Mbufo emekop ete ke ema edɔhɔ mbon eyo eset, ndien ewet enye ŋko ke iso mbufo, ete mbufo ukuwot owo, ndien owo ekededi emi ediwotde owo eyedu ke idak ubiere ikpe Abasi;

22 Edi ami ndɔhɔ mbufo, nte owo ekededi emi ayatde esit ye eyen eka esie eyedu ke idak ubiere ikpe esie. Ndien owo ekededi emi edidɔhɔde eyen eka esie ete, Raca, eyedu ke idak esop; ndien owo ekededi emi edidɔhɔde ete, Afo ndisime, eyedu ke idak ikaŋ hell.

23 Ke ntak oro, edieke mbufo edidide itiene mi, mme edinyenede udɔŋ ndidi ntiene mi, onyuŋ nti ete ke eyen eka fo enyene ikɔ ye afo—

24 Ka bine eyen eka fo, nyuŋ bem iso kpe emem ye eyen eka fo, ndien di tiene mi ye ɔyɔhɔ uduak ke esit, ndien ami nyeda fi.

25 Sɔp idem nam emem ye asua fo ke ini afo odude ke usuŋ ye enye, mbak ke ini ekededi enye idinyene fi, ndien man idisin fi ke ufɔk ŋkpɔkɔbi.

26 Ke akpanikɔ, ke akpanikɔ, ke ami ndɔhɔ fi, afo uduwɔrɔke do ke usuŋ ndomo kiet tutu afo ekpe akpatre senine. Ndien ke ini afo odude ke ufɔk ŋkpɔkɔbi ndi afo eyekeme ekpe kpa senine kiet? Ke akpanikɔ, ke akpanikɔ, ke ami ndɔhɔ fi, Iŋ, iŋ.

27 Esese, ewet enɔ mbon eyo eset, ete mbufo ekusin efibe.

28 Edi ami ndɔhɔ mbufo, nte owo ekededi emi esede ŋwan ke enyin, man ɔdɔrɔ itɔŋ abaŋa enye, ama esin efibe ama ke esit esie.

29 Esese, ami mɔnɔ mbufo uyo, nte mbufo ukuyak ŋkpɔ emi ndomo kiet eduk esit mbufo;

30 Koro ɔfɔn ete mbufo ekaŋ idem mbufo kabaŋa mme ŋkpɔ emi, emi mbufo edimende cross mbufo, utu ke etop mbufo esin ke hell.

31 Ewet, ete owo ekededi emi edisiode ŋwan esie ndɔ, yak enye ɔnɔ enye ŋwed uwɔrɔ ndɔ.

32 Ke akpanikɔ, ke akpanikɔ, ke ami ndɔhɔ mbufo, nte ke owo ekededi emi edisiode ŋwan esie ndɔ, ibɔhɔke edi ke ntak use, anam enye esin efibe; ndien owo ekededi emi edidɔde enye emi esiode ndɔ esin efibe.

33 Ndien ŋko ewet ete, mbufo ekutomo ke nsu, edi enam enɔ Jehovah mme uŋwɔŋɔ mmbufo;

34 Edi ke akpanikɔ, ke akpanikɔ, ke ami ndɔhɔ mbufo, ekutomo baba ŋkpɔ ndomo kiet; mme ke heaven, koro edi itie-ubɔŋ Abasi;

35 Mme ke isɔŋ, koro edi udori-ukot esie;

36 Ŋko kutomo ibuot fo, koro afo ukemeke ndinam idet kiet edi obubit mme afia;

37 Edi yak ikɔ mbufo edi Iŋ, iŋ; Iŋ iŋ, iŋ iŋ; koro se ibede ke oro oto idiɔk.

38 Ndien esese, ewet ete, enyin ke usiene enyin, ŋko edet ke usiene edet;

39 Edi ami ndɔhɔ mbufo, nte mbufo ekuŋwana idiɔk ye idiɔk, edi owo ekededi emi ediyibide fi ke mfuk nnasia, ŋwɔŋɔde eken nnɔ enye ŋko;

40 Ndien edieke owo ndomo kiet edikotde fi ikpe, inyuŋ mbɔ ekpri ɔfɔŋidem fo, yak enye ɔbɔ ewura fo ŋko;

41 Ndien owo ekededi emi edinyikde fi asaŋa itiat kiet, saŋa iba ye enye.

42 Nɔ enye emi ebeŋede fi, ndien enye emi oyomde ndibuɔt nto fi kudaha ukpɔŋ enye.

43 Ndien sese ewet ŋko, ete yak afo ama mbɔhiduŋ fo onyuŋ asua usua fo;

44 Edi sese ami ndɔhɔ mbufo, ema mme asua mbufo, ediɔŋ mmɔ emi esuŋide mbufo, enam eti enɔ mmɔ emi esuade mbufo, enyuŋ ebɔŋ akam enɔ mmɔ emi enamde mbufo isin-enyin ye emi ekɔbɔde mbufo;

45 Man mbufo edi nditɔ Ete mbufo emi odude ke heaven; koro enye anamde utin esie asiaha ɔnɔ idiɔk ye eti.

46 Ke ntak oro mme ŋkpɔ oro emi ekedide eke eyo eset, emi ekedude ke idak mbet, esu ke ami.

47 Ŋkani ŋkpɔ ema ebe efep, ndien kpukpru ŋkpɔ ekabade edi mbufa.

48 Ke ntak oro ami mɔyom nte mbufo efɔn ema kpa nte ami, mme Ete mbufo emi odude ke heaven ɔfɔnde ama.